-
දූෂණයෙන් තොර ආර්ථිකයක් කියන්නේ ඔබේ රටේ නායකත්වයේ පොරොන්දුව… එය යථාර්තයක් වෙන මොහොතේ දී ඔබේ රටට ඔස්ට්රේලියානු ආයෝජකයින් ආකර්ශනය වේවි…
ශ්රී ලංකාවට යන ලෙසත් වෙනස් වී ඇති ශ්රී ලංකාව දකින ලෙසත් තමන් ඔස්ට්රේලියානු සංචාරකයින්ට මෙන්ම ව්යාපාරිකයින්ට ද ප්රකාශ කරන බව ඔස්ට්රේලියාවේ අග්රාණ්ඩුකාර සමැන්තා ජෝයි මොස්ටින් අද (08) පැවසුවාය.
ඇය මේ බව ප්රකාශ කළේ නූතන හා බහු සංස්කෘතික ප්රජාතන්ත්රවාදයක නායකත්වය යන මාතෘකාව යටතේ කැපිටල් මහරාජා සමූහයේ සමූහ අධ්යක්ෂ ශෙවාන් ඩැනියෙල් සමග සම්මුඛ සාකච්ඡාවකට එක් වෙමිනි.
විශාල ප්රාග්ධනයක් සහිත රටක්වන ඔස්ට්රේලියාව මැදිහත්ව ලොව පුරා සිදු කරන ඍජු ආයෝජන යන්න අමුතු දෙයක් නොවන නමුත් එවැනි ආයෝජන සිදුකරනු ලබන්නේ නීති මත පදනම් වූ පද්ධතියක් තුළ බවත්, දූෂණයෙන් තොර පරිසරයක දිගු කාලීනව ව්යාපාර පවත්වා ගත හැකි පදනම බවත් පෙන්වා දුන් ආණ්ඩුකාරවරිය අවධාරණය කළේ ශ්රී ලංකාව දූෂණයෙන් තොර ආර්ථිකයක් ගොඩනගන බවට වූ සහතිකය ලබා දුනහොත් ඍජු ආයෝජනයන් කරන ව්යාපාරිකයන් ඉන් දිරිමත් වනු ඇති බවය.
ඒ වෙනස ඇති කරගත හැකි නායකත්වයක් ශ්රී ලංකා ජනතාව විසින් පත් කරගෙන සිටින බව ඒ නායකතක්වය විසින් ලබා දුන් දූෂණයෙන් තොර ශ්රී ලංකාවක් පිළිබඳ පොරොන්දුව ඔස්ට්රේලියානුවන්ට, ඔස්ට්රේලියානු ව්යාපාරිකයින්ට සහ ආයෝජකයින්ට ඉතාම වැදගත් වනු ඇති බව ද ආණ්ඩුකාරවරිය කීවාය.
ඇය සිරස රූපවාහිනිය හා පැවති සම්මුඛ සාකච්ඡාවේ දී මෙසේ ද කීවාය.
“මම මෙතෙක් කතා නොකරපු එක දෙයක් සහ ඔබේ රටේ ආර්ථිකයට ඉතාම වැදගත් අංගයක් තමයි සංචාරක කර්මාන්තය. ඉතින් මට කියන්න තියන දේ තමයි ලංකාවට යන්න. සංචාරකයින් ලෙස ඔබම ඇවිත් අලුත් ලංකාව බලා ගන්න. ලංකාව ඉතිහාසයේ ඉඳලා නූතනත්වය දක්වා ගමන් කරන විදිහ දැකගන්න. ”
“ඔස්ට්රේලියාවට වගේම ශ්රී ලංකාවටත් ලොකු ඉතිහාසයක් තියනවා. ලෝකයේ සියලුම ශ්රේෂ්ඨ රාජ්යයන්ට ඉතිහාසයේ සිදුවු දේවල් සමග තර්ක කිරීමට සිදුවෙලා. විශේෂයෙන්ම තරුණ ඔස්ට්රේලියානුවන්ට.”
“මම දන්නවා ඔබ මේ වනවිට සංහිඳියාව ලඟා කරගැනීමට ක්රියා කරනවා කියලා. අපේ රටේ තිබෙන්නෙත් ඒකෙම වෙනස් තත්ත්වයක්. ඔස්ට්රේලියාවේ ආදිවාසීන් සහ ටොරස් සමුද්ර සන්ධි දූපත් වැසියන්ගේ ඉතිහාසය පිලිබඳ සාකච්ඡා ඊට සම්බන්ධයි. නමුත් ජාතීන් විදිහට අපව නූතනත්වයට ගෙනියන අංග මොනවා ද?… අපි ආවෙ කොහෙන්ද, අපි නූතනත්වයට මුහුණ දෙනකොට ඇතිවන අභායෝග මොනවා ද, නවීන ලෝකයට මුහුණ දෙනකොට අපට වෙලා තියෙන්නේ කුමක් ද ?. ඒ සියල්ල අපේම ක්රමයකට විසඳා ගන්නේ කොහොමද කියලා අපි හිතනවා.”
“ඒ කියන්නේ මම කියන්නේ ශ්රී ලංකාවට එන්න. සංචාරය කරන්න. මීට වසර විස්සකට පෙර මම ශ්රී ලංකාවට ආපු ගමන සංකීර්ණයි. මම ආවේ සුනාමි ව්යසනයෙන් පරිසරය විනාශ වෙලා තියනකොට. යටිතල පහසුකම් විනාශ වුන ඒ ප්රදේශවලට මිනිස්සු ගෙන්වා ගැනීමේ අවශ්යතාවයන් දැඩි ලෙස මතුවෙලා තිබුණා. අපි ඒ අවශ්යතාවයට පිලිතුරු දුන්නෙ මෙහි පැමිණ මුදල් රට තුළට ගෙන ඒමෙන්. මෙහෙ කාලය ගත කිරීමෙන්. මෙහෙ ඉන්න පුද්ගලයින් හඳුනා ගැනීමෙන් වගේම ඔවුන්ට සවන් දීමෙන්.
මට කවදාවත් ඒක අමතක වෙන්නේ නෑ. ”
“මම නැවත ලංකාවට ආපසු පැමිණීම ගැන කියනවා නම් ඒ වසර ගණනාව පුරාවටම වෙනස් වෙලා නැති දෙයක් තමයි මේ රටෙන් ලැබෙන උණුසුම් පිළිගැනීම සහ මෙරටට පැමිණෙන අය සමග ශ්රී ලාංකික සංස්කෘතිය බෙදා ගැනීමට රටේ මිනිස්සුන් තිබෙන උනන්දුව.”
“ඉතින් මම හිතනවා ලෝකයේ මිනිසුන් මේ රටට පැමිණිය යුතුයි කියලා. සංචාරක කර්මාන්තය වර්ධනය වෙයි කියලා මම බලපොරොත්තු වෙනවා.”
“දූෂණයෙන් තොර ආර්ථිකයක් ගොඩනැගිය හැකි බව ඔබ තහවුරු කළහොත් විශේෂ ඍජු ආයෝජන සහ ව්යාපාරවලට වගේම ව්යාපාරිකයින්ට ඉන් දිරිමත් වේවි කියලා මා හිතනවා. එය ඔබගේ රටේ නායකත්වය දීලා තියන පොරොන්දුවක්. එය ඔස්ට්රේලියානුවන්ට, ඔස්ට්රේලියානු ව්යාපාරිකයින්ට සහ ආයෝජකයින්ට ඉතාම වැදගත්.”
“අපට විවිධාකාරයෙන් ආයෝජනය කරන්න විශාල ප්රාග් ධනයක් තියනවා. විදෙස් ඍජු ආයෝජන කියන්නෙ අපි ලොව පුරා කරන දෙයක්. අපි ඒක කරන්නේ නීති මත පදනම් වූ පද්ධතියක් තුළ. දූෂණයෙන් තොරව දිගු කාලීනත්වය මත අපට එක්ව ගොඩනැගිය හැකි ස්ථානවල.”
“ඒ නිසා මම ඔස්ට්රේලියානුවන්ට කියන්නේ අප ඉතිහාසය තුළ ගමන් කළ ආකාරය ගැන සිතනවා වගේම ශ්රී ලංකාව ආ ගමන ගැනත් සිතන්න. නමුත් ශ්රී ලංකාව මේ සියල්ල කළේ සිවිල් යුද්ධයකට මුහුණ දෙමින් කියන එකත් මතක් කරගන්න. ඉන් පසුව ආර්ථික කඩා වැටීමකට මුහුණ දුන්නා. දැන් එ් අර්බුදයෙන් බැහැර විය හැකි නායකත්වයක් තෝරා ගැනීමට ඔබ ජාතියක් ලෙස කටයුතු කරලා තියනවා. ප්රගතිශීලිව ඉදිරියට යන්නත් කටයුතු කරලා තියනවා. අපි ඔබ සමග එක්ව කටයුතු කළ යුතුයි. ඒක තමයි මගේ විශ්වාසය. ”
