මහජන ආරක්ෂක අමාත්යාංශයේ ලේකම් මේජර් ජෙනරාල් (විශ්රාමික) ජගත් අල්විස්, ගෝල්ෆේස් අරගලකරුවන්ට පහර දීම සම්බන්ධයෙන් මේ වනවිට අධිකරණයේ විභාග වෙමින් ඇති නඩුවේ අධිකරණ කටයුතුවලට ඇඟිලි ගැසීමක් සිදුකිරීමට උත්සාහ කළේ ද යන්න පිළිබඳව පැහැදිලි කිරීමක් කරන ලෙස ශ්රී ලංකා නීතිඥ සංගමය අගවිනිසුරුවරයාගෙන් සහ නීතිපතිවරයාගෙන් ඉල්ලා ඇත.
විරෝධතාකරුවන්ට පහර දිමේ සිද්ධියට අදාල නඩු සම්බන්ධයෙන් අධිකරණයේ කටයුතුවලට මැදිහත් වීමට ජගත් අයිවිස් උත්සාහ කළ බවට පළ වූ වාර්තා සම්බන්ධයෙන් නීතිඥ සංගමය දීර්ඝ ප්රශ්නකිරීමක් සහිතව මෙම ලිපි අගවිනිසුරුවරයා වෙත සහ නීතිපතිවරයාට යොමු කර තිබේ.
මැයි 09 වැනි දින ශ්රී ලංකාවේ සිදු වූ ප්රචණ්ඩත්වයට පහළ අධිකරණ විනිසුරුවරුන් වගකිව යුතු බවට එම නිලධාරියා චෝදනා කර ඇති බව එම ලිපිවල සඳහන් වේ.
ප්රචණ්ඩත්වය ප්රවර්ධනය කිරීම සම්බන්ධයෙන් විනිසුරුවරුන්ට සහ නීති වෘත්තියේ සාමාජිකයින්ට අසත්ය චෝදනා කරමින් අධිකරණය සහ නීතිඥ මණ්ඩලය අපකීර්තියට පත් කිරීමට ඇතැම් පාර්ශ්වයන් ඒකාබද්ධ උත්සාහයක නිරතවන බව ශ්රී ලංකා නීතිඥ සංගමය සිය ලිපියේ සඳහන් කර ඇත.
ඇතැම් අවස්ථාවල දී අධිකරණ නිලධාරීන් විසින් කරන ලද නියෝගවලට අවනත නොවන මට්ටමට මෙම තත්වය වර්ධනය වී ඇති බව ද නීතිඥ සංගමය පෙන්වා දෙයි.
එම සංගමය පෙන්වා දෙන්නේ මහජන ආරක්ෂාව පිළිබඳ අමාත්යාංශයේ ලේකම්වරයා එවැනි ලිපියක් අගවිනිසුරුවරයාට සහ නීතිපතිවරයාට සත්ය වශයෙන්ම යවා තිබේ නම් එයත් අධිකරණය අපකීර්තියට පත් කිරීමට දරන උත්සාහයේ කොටසක් විය හැකි බවය.
ප්රජාතන්ත්රවාදී රාජ්යයක් තුළ සාධාරණ සහ නිදහස් සමාජයක් සඳහා අධිකරණයේ ස්වාධීනත්වය අත්යවශ්ය බැවින් යුක්තිය පසිඳලීමට නීතිවිරෝධී ලෙස මැදිහත් වීමට දරන ඕනෑම උත්සාහයක් සම්බන්ධවම ශ්රී ලංකා නීතිඥ සංගමය දැඩි ලෙස සංවේදී බව ද එහි දක්වා තිබේ.
අධිකරණයට ඇඟිලි ගැසීමක් ලෙස සැලකෙන ඕනෑම උත්සාහයක ප්රතිඵලයක් ලෙස යුක්තිය පසිඳලීම පිළිබඳ මහජන විශ්වාසය නැති වී යා හැකි බව නීතිඥ සංගමය වැඩිදුරටත් පෙන්වා දෙයි.
“ඉහත සඳහන් තත්ත්වයන් තුළ එවැනි ලිපියක් ලැබී තිබේද යන්න පිළිබඳව අගවිනිසුරුවරයාගෙන් සහ නීතිපතිවරයාගෙන් අපි ගෞරවයෙන් පැහැදිලි කිරීම් ඉල්ලා සිටිමු.“ ශ්රී ලංකා නීතිඥ සංගමය කියයි. මේ සම්බන්ධයෙන් දැනටමත් ගෙන ඇති ක්රියාමාර්ග පිළිබඳව දැනුම්වත් කරන ලෙස ද එම සංගමය ඉල්ලා සිටී.
