වසර ගණනාවක් තිස්සේ දෛනික වැටුප ලෙස රුපියල් 1750ක වැටුපක් ඉල්ලා සිටින මලයගම් ප්රජාවේ ඉල්ලීම මේ වසර තුළ කෙසේ හෝ ඉටු කරන බව ජනාධිපති අනුර කුමාර දිසානායක තහවුරු කළේය.
ජනාධිපති අනුර කුමාර දිසානායක මේ බව සඳහන් කළේ මලෛයගම් ජනතාවට නිවාස හිමිකම්පත් ලබා දීමේ අවස්ථාවට අද (12) පෙරවරුවේ බණ්ඩාරවෙල මහජන ක්රීඩාංගණයේදි එක් වෙමිනි.
ජනාධිපතිවරයා එහිදී මෙසේ ද කීවේය.
“මීට අවුරුදු 202කට පෙර ඒ ජනතාව ශ්රි ලංකාවට එන ගමනේ දීත් විශාල ප්රමාණයක් තැනින් තැන ලෙඩරෝග විවිධ උපද්රව හේතුවෙන් මිය ගියා. ඇත්ත ගත්තොත් මේ අවුරුද 202ත් ඔවුන් මිය යමින් ජීවත් වෙනවා.”
ඒ නිසා ආණ්ඩුවක් හැටියට සමාජයක් හැටියට අපට වගකීමක් තියනවා එම ජනතාවගේ මූලකි උවමනාවන් සම්පූර්ණ කර දී ඔවුන්ට සැපවත් ජීවිතයක් ලබා දීමට.
එහිදී අපට ක්ෂේත්ර කීපයක් කෙරෙහි අවධානය යොමු වෙලා තියනවා. අපේ රටේ බිම් අඟලක් හිමි නොවන ජන ප්රජාවක් මේ අතර ඉන්නවා. ඔවුන්ට ඉඩමක හිමිකම, නිවාසයක හිමිකම ලබා දීම රාජ්යයක වගකීමක්. ඒ සඳහා අපේ නිවාස ඇමති තුමාත් වැවිලි කර්මාන්ත ඇමති තුමත් විශාල වෙහෙසක් දරනවා. අපිට එම කාර්යය ඉටු කිරිම සඳහාවන වැඩපිළිවෙළක ඉන්නවා.”
“දෙවන කරුණ තම ජීවිතය සාධාරණ ලෙස පවත්වා ගැනීම සඳහා සාධාරණ වැටුපක් ලබා දිය යුතුයි. දිගු කාලයක් සිට දවසක රුපියල් 1750ක ඉල්ලීමක මෙම වත්තේ වැඩ කරන ප්රජාව ඉල්ලමින් සිටිනවා.”
“අප කුමන ආකාරයකින් හෝ මේ වසර ඇතුළත එම හිමිකම ලබා දීමට කටයුතු කරනවා…”
විශේෂයෙන් කෘෂ භාවය මන්දපෝෂණය සෞඛ්ය අනාරක්ෂිත භාවය ඇත්තේ මළයගම් ප්රජාව තුළ බවත්, වතු රෝහල් රජයට පවරා ගෙන නියමිත වෛද්යවරුන් කාර්ය මණ්ඩල සහ ඖෂධ ලබා දී මලයගම් ජනතාවගේ සෞඛ්ය තත්ත්වය සම්බන්ධව අස්ථාවර භාවය නැති කර එම පහසුකම් තහවුරු කරන බවත් කී ජනාධිපතිවරයා ජනතාවගේ සෞඛයේ වගකීම ඇත්තේ කොම්පැණියකට නොව රජයට බව අවධාරණය කළේය.
අධ්යාපනය හා දුප්පත්කම අතර දැඩි සම්බන්ධයක් ඇති බව කී ජනාධිපතිවරයා පැවසුවේ නූගත් නම් දුප්පතෙක් මෙන්ම දුප්පත් නම් නූගතෙක් බවය. ඔහු කීවේ ප්රජාවක් දුගී භාවයෙන් මුදවා ගැනිමේ දී වැදගත්ම දේ අධ්යාපනය බවය. වතු ආශ්රිත පාසල්වල බිඳවැටීම ගැන අපි අධ්යනයන කර ඇති බව කී ජනාධිපතිවරයා සැම දරුවෙකුටම සම අධ්යාපන අයිතිය ඇති බවට තහවුරු කළ යුතු බව කීවේය.
මෙරට ඉතිහාසයේ පළමු වතාවට පසුගිය මහ මැතිවරණයේදී තම ඥාතීන් සහ අසල්වැසියන් පාර්ලිමේන්තුවට තෝරා පත් කර ගනිමින්, මලෛයගම් ජන ප්රජාව තැබූ අපේක්ෂා කිසිවිටෙකත් බිඳ වැටීමට ඉඩ නොතබන බව මෙහිදී අවධාරණය කළ ජනාධිපතිවරයා එම විශ්වාසය තවදුරටත් ශක්තිමත් කරමින් ඔවුන්ට හිමි ආර්ථික මෙන්ම සමාජ ජිවිතයද දිනා දීමට රජය කැප වී කටයුතු කරන බව සඳහන් කළේය.
එහිදී එම ජනතාවගේ සෞඛ්ය අයිතීන් දිනා දීම, පිරිසිදු පානීය ජලය ලබා ගැනීමේ අයිතිවාසිකම තහවුරු කිරීම මෙන්ම දරුවන්ට හොඳ අධ්යාපනයක් ලබා දීම සහ වතුකරයේ මත්ද්රව්ය ජාවාරම මැඬලීම කෙරෙහිද රජය සුවිශේෂී අවධානය යොමු කර තිබෙන බව ජනාධිපතිවරයා පැවසීය.
‘පොහොසත් රටක් – ලස්සන ජීවිතයක්’ ප්රතිපත්ති ප්රකාශය යතාර්ථයක් කිරීම උදෙසා හැටන් ප්රකාශනයට අනුව යමින් මලෛයගම් ප්රජාවගේ නිවසක් සඳහා වන අයිතිය තහවුරු කිරීමේ අරමුණින් ක්රියාත්මක නිවාස 10,000ක වැඩසටහනේ ප්රතිලාභීන් 2000ක් සඳහා හිමිකම් පත්ර ලබා දීම මෙහිදී සංකේතාත්මකව ජනාධිපතිවරයා අතින් සිදු කෙරිණි.
කඳුකර ප්රදේශවල වතු ආශ්රිතව පදිංචිව සිටින මලෛයගම් ප්රජාවගේ ජීවන තත්ත්වය උසස් කිරීම මෙන්ම ආරක්ෂිත පරිසර හිතකාමී මූලික පහසුකම් සහිත නිවාස ලබා දීම මෙම ව්යාපෘතියේ මූලික අරමුණ වන අතර මෙම එක් නිවසක් සඳහා ඉන්දීය රජය විසින් රුපියල් ලක්ෂ 28ක මුදලක් සහ ශ්රී ලංකා රජය විසින් නිවසේ යටිතල පහසුකම් සඳහා රුපියල් ලක්ෂ 04ක මුදලක් වැය කර ඇත.
