මනම්පිටිය නිමල් ජයරත්න-
ආගමික දේශන පවත්වා මියගිය බව කියන රුවන් ප්රසන්න ගුණරත්න නමැත්තාගේ අවමංගල උත්සවයට සහභාගි වු බව කියන දිඹුලාගල සිරිපුර අංක 31 පළුදෙනිය ලිපිනයේ පදිංචි, 26 වියති එක්දරු පියෙක් පෙරේදා ( 03 ) සවස වස පානය කිරීමෙන් දෙහිඅත්තකන්ඩිය රෝහලට ඇතුළත් කර ඇති බව සිරිපුර පොලිසිය කියයි.
මෙලෙස වස පානය කර දෙහිඅත්තකණ්ඩිය රෝහලේ ප්රතිකාර ලබන්නේ, අංක 31 පළුදෙනිය, සිරිපුර ලිපිනයේ පදිංචිව සිටි උනප්පුවේ ගෙදර සසිඳු අමල්ක විමලරත්න අය බව පිළිබඳ පරීක්ෂණ කරන සිරිපුර පොලිස් ස්ථානාධිපති පොලිස් පරීක්ෂක ජීී.ආර්.ජී නෙත්තසූරිය අප කළ විමසීමකදී සඳහන් කළේය.
ඔහු සමග ඇගේ බිරිදද ආගමික දේශන පැවැත්වු රුවන් ප්රසන්න ගුණරත්නගේ අවමංගල කටයුතු සඳහා ගොස් ඇති අතට එම ගමනට නුවරගල ප්රදේශයේ පස්දෙනෙකු පමණ සහභාගී වී ඇති බවට තොරතුරු අනාවරණය වී ඇති බවද පරීක්ෂණ සිදුකරන පොලිසිය සඳහන් කරයි.
වසබී දෙහිඅත්තකන්ඩිය රෝහලේ අසාධ්යව ප්රතිකාර ලබන පුද්ගලයා දේශනවලට සහභාගි වූවාද නැද්ද යන්න මෙතෙක් තහවුරු කර ගැනීමට නොහැකී වු බවත්, අවමංගල කටයුතුවලට සහභාගි වූ කාන්තාවක් ප්රදේශයේ ආගමික මතයක් පතුරුවමින් දේශන කිහිපයක් පවත්වා ඇති බවට තොරතුරු තහවුරු වී ඇති බවත් සිරිපුර පොලිසිය කියයි.
දේශන පැවැත්වූ බව කියන රුවන් ප්රසන්න ගුණරත්න යන අය දෙහිඅත්තකණ්ඩිය පොලිස් කොස්තාපල් වරයෙකුට අයත් නිවසක වසර හයක පමණ කාලයක් කුලියට සිටි ඇති බවද පරීක්ෂණවලින් තහවුරු ඇති බව සිරිපුර පොලිස් ස්ථානාධිපති පොලිස් පරීක්ෂක ජී.ආර්.ජී. නෙත්තසුරීය අප කල විමසමකදී පැවසීය.
රුවන් ප්රසන්න ගුණරත්න නමැත්තා දෙසැම්බර් 28 හෝමාගම මාකුඹුර ප්රදේශයේදී උග්ර වස වර්ගයක්, භාවිතා කර සියදිවි හානි කරගෙන තිබූ බවත්, ඊට දින දෙකකට පසු ඔහුගේ බිරිය සහ දරුවන් තිදෙනා එලෙසම සියදිවි හානි කරගෙන තිබුණි.
රුවන් ප්රසන්න ගුණරත්න නමැත්තාගේ දේශනවලට සහභාගි වූ කිහිප දෙනකු පොළොන්නරුවේ ප්රදේශ කිහිපයක සිටින බවට මෙවන විට තොරතුරු අනාවරණ වෙමින් පවතින බවද ආරක්ෂක බුද්ධි අංශ සඳහන් කරයි.
මෙම සිද්ධිය සම්බන්ධ වැඩිදුර පරීක්ෂණ පොළොන්නරුව ජ්යෙෂ්ඨ පොලිස් අධිකාරි නිශාන් ද සිල්වාගේ උපදෙස් පරිදි වැලිකන්ද ප්රදේශය භාර සහකාර පොලිස් අධිකාරී සුදත් ආස්මඩලගේ මෙහෙයවීමෙන් සිරිපුර පොලිස් ස්ථානාධිපති පොලිස් පරීක්ෂක ජී,ආර්.ජී. නෙත්තසූරීය ඇතුළු පොලිස් නිලධාරි කණ්ඩායමක් වැඩිදුර පරීක්ෂණ සිදු කරයි.
අප මෙම සමාජ ඛේදවාචකය පිළිබඳ ඓතිහාසික දිඹුලාගල ආරණ්ය සේනාසනාධිපති දිඹුලාගල රාහුලාලංකාර නාහිමියන්ගෙන් කළ විමසීමකදී උන්වහන්සේ මෙලෙස අදහස් දැක්වූහ.
“මනුෂ්ය ජීවිතයක වටිනාකම ගැන අමුතුවෙන් ඔබට කිව යුතු වන්නේ නැහැ. කිසිම ආගමික දර්ශනයක මනුෂ්ය ඝාතනය හෝ සිය දිවි නසා ගැනීම තහවුරු කරන්නේ නැහැ. ලංකාවේ මෑත කාලීනව විවිධ ආගමික මත දරන විවිධ ආගමික අන්තවාදීන් විවිධ අන්තවාදී ඉගැන්වීම් සිදු කරමින් ඒ සඳහා අනුගාමිකයින් පොළඹවා ගනිමින් තම මිථ්යාදෘෂ්ටික ආගමික අදහස් ඉටුකරගැනීමට කටයුතු කරන බවක් පේන්න තියෙනවා. ඊට හොඳම නිදසුනක් තමයි රුවන් ප්රසන්න ගුණරත්න නම් පුද්ගලයාගේ අන්තවාදී ඉගැන්වීම්. “
“මෑතක ඔහු තම දේශනා තුළින් අන්තවාදී ඉගැන්වීම් සිදු කරමින් සියදිවි නසාගෙන හෝ මෙලොව ජීවිතයෙන් සමුගෙන වඩා යහපත් මතු භවයක් ලබන්න කටයුතු කිරීම සඳහා තම අනුගාමිකයින් පොළඹවා ඇති අතර මේ වන විට ඔහු, ඔහුගේ පවුලේ සියලු දෙනා ඇතුලුව 07 දෙනෙකුට එහා අනුගාමිකයින් සියදිවි නසාගෙන ඇති බව තොරතුරු වාර්තා වෙනවා. “
“බුදු දහමේ සියදිවි නසාගැනීම ප්රාණඝාතයක් ලෙසයි සැලකෙන්නේ. සියදිවි නසාගැනීම මනුෂ්ය ඝාතනයක් කළා හා සමානයි. ඒක නිසා මේ මොහොතේ ඔහුගේ දේශන වලට සම්බන්ධ වූ සැමටත් පොදුවේ සියලු මහජනතාවටත් සිහිපත් කර සිටින්නේ ආගමික මුවාවෙන් සිදුකරන අන්තනවාදීන්ගේ මිථ්යාදෘෂ්ඨික පුහු ඉගැන්වීම්වලින් මිදී මනුෂ්ය ජීවිතයේ වටිනාකම තේරුම්ගෙන අවබෝධයෙන් කටයුතු කරන ලෙසයි.”
