මනම්පිටිය නිමල් ජයරත්න –
පොළොන්නරුව මනම්පිටිය ප්රදේශයේදී ටිපර් රථයක් පැහැරගෙන රියදුරුගේ මුඛය හා අත් පා ගැට ගසා ඝාතනය කිරීමේ චෝදනාවකට සැකපිට අත්අඩංගුවට ගෙන රක්ෂිත බන්ධනාගාරගතව සිටි සැකකරුවන් පස්දෙනා තවදුරටත් මේ මස 22 වෙනිදා දක්වා රක්ෂිත බන්ධනාගාර ගත කරන ලෙස මනම්පිටිය මහේස්ත්රාත්, දිසා විනිසුරු, එරන්දි වික්රමසිංහ අද (08) එම නඩුව කැඳවා තිබූ අවස්ථාවේ දී නියෝග කළාය.
ඉකුත් දෙසැම්බර් 17 වෙනිදා මනම්පිටිය කොටලීය පාලම අසලදී මෙම ටිපර් රථය පැහැරගෙන රියදුරු ඝාතනය කිරීම සම්බන්ධයෙන් සැකකරුවන් පස්දෙනා මනම්පිටිය සහ පොළොන්නරුව පොලිසිය මගින් අත්අඩංගුවට ගනු ලැබීය.
මෙලෙස ඝාතනයට ලක්වූයේ,පොළොන්නරුව කුඩාවැව ගම්මානයේ පදිංචිව සිටි 29 වියති දෙදරු පියෙකු වු තුෂාර සඳුන් නමැති ටිපර් රථ රියදුරුය.
රියැදුරු ඝාතනය කොට පැහැරගත් ටිපර් රථය පොළොන්නරුව ප්රදේශයේ පදිංචි අයෙකුට රුපියල් ලක්ෂ තිහකට අලෙවි කිරීමේ සූදානමින් මෙම පැහැර ගැනීම සිදුකර ඇති බව ඒ පිළිබඳ පරීක්ෂණ සිදුකළ පොළොන්නරුව පොලිසිය විසින් අනාවරණය කර ගැනිණි.
අත්අඩංගුවට ගෙන රක්ෂිත බන්ධනාගාරගත කර ඇත්තේ,මනම්පිටිය මාගන්තොට,වැලිකන්ද මෛත්රීගම,පොළොන්නරුව වවුනියාව,සහ මැදවච්චය යන ප්රදේශවල පදිංචි ව්යාපාරිකයින් තිදෙනෙකු සහ තවත් පුද්ගලයන් දෙදෙනෙකි.
අරලගංවිල සිට කුලියාපිටිය දක්වා වැලි ප්රවාහනය කරමින් සිටියදී පසුගිය 17 වෙනිදා අලුයම තුනට පමණ, මනම්පිටිය කොටලීය පාලම අසලදී ,මෙම ටිපර් රථය පැහැරගෙන රියදුරු ඝාතනය කර ඇති අතර, මේ සම්බන්ධව රියැදුරුගේ බිරිඳ සහ ටිපර් රථ හිමිකරු පොළොන්නරුව පොලිසියට පැමිණිලි කිරීමෙන් අනතුරුව සොයා බැලීමේදී රියදුරුගේ මළසිරුර මනම්පිටිය කොටලීය පාලමට නුදුරු ප්රදේශයේ වන ලැහැබක දී හමුවිය. ඔහුව, ඛය සහ අත්පා ගැටගසා ඝාතනය කර තිබිණි
