අසේල කුරුළුවංශ –
ප්රශ්නකාරි වෙබ් අඩවියක් 06 ශ්රේණිය ඉංග්රීසි විෂයට අදාළ මොඩියුලයට ඇතුළත් කළේ කවුද යන්න අභ්යන්තර පරීක්ෂණයක් මගින් පහසුවෙන් සොයා ගැනීමට හැකි වුවත් අපරාධ පරීක්ෂණ දෙපාර්තමේන්තුවට පැමිණිලි කළේ ඒ තුළ කිසියම් කුමන්ත්රණයක් ක්රියාත්මක වී තිබේද යන්න සොයා ගැනීමට බව අධ්යාපන අමාත්යාංශ ලේකම් නාලක කළුවැව පවසයි.
අපරාධ විමර්ශන දෙපාර්තමේන්තුවට පැමිණිල්ල කළ දවසේ සිට මේ දක්වා සමාජ මාධ්ය තුළ සංසරණය වන තොරතුරු විශ්ලේෂණය කිරීමේදී මේ තුළ යම් කුමන්ත්රණයක් තිබුණේද යන සැකය ඉස්මතු වන බවද ඔහු කීවේය.
මහනුවර දී අද (08) මාධ්ය හමුවේ අදහස් දක්වමින් අධ්යාපන ලේකම්වරයා මෙසේද පැවසුවේය.
“ඕනෑම ආයතනයක් තුළ අභ්යන්තර ක්රියාවලියක් තිබෙනවා. ඒ ක්රියාවලිය මගින් මේක කළේ කවුද කියන එක බොහොම පහසුවෙන් සොයා ගත හැකියි. ඒවා සියල්ල ලේඛන ගතව තියෙනවා. ඒක විශේෂයෙන් හොයන්න දෙයක් නෙවෙයි. “
ප්රශ්න සහගත පොත් ගත්තම ඒක ලිව්වේ කවුද කියන එක අපි දන්නවා. ඒත් එයා ඒක ඇයි ලිව්වේ කියන එක අපට අභ්යන්තර පරීක්ෂණයකින් හොයන්න බැහැ. ඒක අපේ සීමාවෙන් ඔබ්බට ගිය එකක්.
සිද්ධියේ බරපතළ කමත් මේක පසුපස කුමන්ත්රණයක් සිදු වුණාද කියන සාධාරණ සැකය අපිට අමාත්යාංශයක් විදිහට ඇති වෙනවා. පැමිණිල්ල කළ දවසේ සිට අද දක්වා සමාජ මාධ්ය වල සිදුවන කතා බහ දකින විට මට දැනුන දේ තහවුරු වෙනවා. මේක ධනාත්මකව බලලා අපෙන් වූ වැරදි පිළිගෙන ඒක නිවැරදි කරනවා වගේම මෙතන වෙනත් කාරණා කිහිපයක් සාකච්ඡා වෙනවා. මේක හිතාමත නොකළ අහිංසක වරදක්ද නැතහොත් මේ පිටුපස වෙනත් කුමන්ත්රණයක් තිබෙනවාද කියන එක අපි සොයා ගත යුතුයි.
සිද්ධිය සම්බන්ධයෙන් මේ වනවිට අභ්යන්තර පරීක්ෂණ තුනක් සිදු වෙනවා. ඒවාහි නිර්දේශ අනුව විනය ක්රියාමාර් ගන්නවා. නමුත් මෙතන ඊට එහා දෙයක් තිබෙනවා ද කියලා සෙවීම සඳහා තමයි අපරාධ පරීක්ෂණ දෙපාර්තමේනතුවට පැමිණිලි කළේ. ඔවුන් කිව්වොත් මෙතන තිබෙන්නේ අභ්යන්තරව සිදුවූ අතපසුවීමක් කියලා ඒක අපි පිළිගන්නවා.
එහෙම නැතුව මේක හිතාමතා කාගේ හරි පෙළඹවීමක් නිසාද කළේ එසේ නම් ඒ පෙළඹවීම කුමන අරමුණකින් කවුරුන් විසින් කළේද යන්න සොය ගැනීම තමයි අපේ අරමුණ.
