-
අය – වැයෙන් සෑම අමාත්යාංශයකටම වෙන් කළ මුදලින් සියයට 5ක් කපා හැරීමේ තීරණයක්…
ජනවාරි සහ පෙබරවාරි මාසවල රාජ්ය සේවක වැටුප් ගෙවීම දැඩි ගැටලුකාරි තත්ත්වයක් මතුකර ඇති බවත්, සමෘද්ධි දීමනාව ලබාදීමට සති දෙකක් පමණ ප්රමාද විය හැකි බවත් කැබිනට් ප්රකාශක බන්දුල ගුණවර්ධන පවසයි.
අද (10) ගෙවීමට තිබූ විශ්රාම වැටුප්වල යම් ප්රමාදයක් ඇති බව උදෑසන වනවිට විශ්රාමික ප්රජාවගෙන් විමසීම් ලැබෙමින් තිබිණි.
අද කැබිනට් තීරණ ප්රකාශයට පත්කරමින් අමාත්ය බන්දුල ගුණවර්ධන කීවේ මේ වනවිට භාණ්ඩාගාරය දරුණු මුල්ය අර්බුදයකට මුහුණ දී ඇතැයි ජනාධිපතිවරයා අමාත්ය මණ්ඩලය වෙත දැනුම්දුන් බවය.
කෙසේවෙතත් මෙයට පිළියමක් ලෙස සියලුම අමාත්යාංශවලට අයවැය ලේඛනයෙන් වෙන්කර ඇති මුදලින් 5%ක් කපාහැරීමට යෝජනා වී තිබේ.
බන්දුල ගුණවර්ධන ඇමතිවරයා කැබිනට් තීරණ දැනුම් දෙමින් මෙසේ පැවසීය.
“ජනාධිපතිතුමා විසින් කැබිනට් මණ්ඩලයට දැනුම් දුන්නා ලැබුවා වු 2023 වසරේ දී අපි අපේක්ෂා කළ ප්රමාණයට වඩා දරුණු මුල්ය අර්බුදයකට භාණ්ඩාගාරය මුහුණදි සිටින බව.“
ආර්ථිකය 2022 හැකිලීම කරණකොට ගෙන බදු මගින් රැස්කර ගත හැකි ආදායම් ප්රමාණය වර්ෂය මුල විශාල ලෙස අඩුවෙලා තියෙනවා. ඒ නිසා ජනවාරි, පෙබරවාරි, මාර්තු මාසවල රජයට බදුවලින් ලැබෙන ආදායම විශාල ලෙස පහත ගියත් අත්යවශ්යයෙන්ම ගෙවිය යුතු වියදම් දැරීමට සිදුවෙනවා.
රාජ්ය සේවක වැටුප්, විශ්රාම වැටුප්, රාජ්ය ණය සඳහා ගෙවන පොලී, වෙනත් සුබ සාධන වියදම් වැනි එදිනෙදා පවත්වාගෙන යෑමට ප්රමාණවත් කිසිදු ආදායමක් භාණ්ඩාගාරයට නෑ.
ඒ නිසා ප්රධාන ගැටලුව ලෙස මුහුණදී සිටින්නේ සෑම මසකම අග රාජ්ය සේවක වැටුප් ගෙවීමේ දී. ඒ බිල සහ විශ්රාම වැටුප් ගෙවීම සඳහා තමයි ප්රමුඛතාවය ලබාදෙන්නේ. ඒ ප්රමුඛතාවය ලබාදීමෙන් පසු ඇතිවෙන අත්යවශ්ය සුබ සාධන පිරිවැය දරන්නවත් ප්රමාණවත් ආදායමක් නොමැති නිසා.
මේ වර්ෂය පුරාවට මේ ආදායම් ගැටලුව පවතින නිසාත් කැබිනට් මණ්ඩලයට දැනුම් දුන්නා සියලූම අමාත්යාංශවල අයවැය ලේඛනයෙන් වෙන්කළ මුදල්වලින් සියයට 5ක් කපා හරින්න.
ජනවාරි මාසයේ දී වැටුප් ගෙවීමේ දී තියෙන දුෂ්කරතාවය නිසා සමෘද්ධි සහනාධාරය ගෙවීම සතියකට දෙකකට කෙටි පමාවක් සිද්ධවෙන්න ඉඩතියෙන බව එතුමා කැබිනට් මණ්ඩලයට දැනුම්දුන්නා.
ඒ තරම්ම දරුණු මුල්ය අර්බුදයක් මේක. අපි කවුරු ආණ්ඩු කළත් භාණ්ඩාගාරයට ලැබෙන්නේ මහජනතාවගෙන් ලබාගන්න බදු මුදල් හා බදු නොවන ආදායම් මගින් තමා මේ සියලු වියදම් දරන්න වෙන්නේ. අපි කාගේවත් පුද්ගලික මුදලින් වියදම් දැරීමක් නෑ. සෑම වියදමක්ම දරන්නේ මහජනතාවගේ බදු මුදල්වලින්. මහජනතාව වෙත විශාල පීඩනයක් බදුවලින් පැටවිලා තියෙනවා.
