මනම්පිටිය නිමල් ජයරත්න –
සෝමාවතිය පුදබිමේ වැසිකිලි මළ අපද්රව්ය ගලි බවුසර් යොදා ගනිමින් පුරවා පිටතට රැගෙන යන ආකාරයට රැගෙන විත් බුදුරජාණන් වහන්සේගේ දකුණු දළදාව වැඩසිටින ඓතිහාසික සෝමාවතිය චෛත්යරාජයන් වහන්සේට මීටර් තුන්සියකට නුදුරින් පිහිටි ප්රදේශයට බැහැර කරන බව වන ජීවී දෙපාර්තමේන්තුවේ පොලොන්නරුව කාර්යාලය සඳහන් කරයි,
සෝමාවතිය ජාතික වනෝද්යානය තුළ වළවල් හාරා ඒ තුළට බැහැර කරන මළ අපද්රව්ය නිසා දාගැබ්වහන්සේ වැඩ සිටින ප්රදේශය පුරාම දුගද හමන බවත්, ඒ අවට වෙසෙන වල්ඌරන් රංචු හා වනසතුන් සතා සිව්පාවුන් එම මලපහ ආහාර ලෙස ගැනීමටද හුරුපුරුදුව සිටින බවත් පොලොන්නරුව වනජීවී කාර්යාලයේ අඩවිය ආරක්ෂක ඩබ්ලිව්. එම්. කුමාරසිරි විජේකෝන් අප කළ විමසීමකදී සඳහන් කළේය.
සෝමාවතිය පුදබිමට හෙවත් ජාතික වනෝද්යානයට මළ අපද්රව්ය බැහැර කිරීම සම්බන්ධව සුංගාවිල ප්රදේශයේ පුද්ගලයෙකුගෙන් ප්රශ්න කර කරුණු වාර්තා කරගෙන ඇති බවත්, ඒ සම්බන්ධව බී වාර්තාවක් හරහා 8 වෙනිදා පොලොන්නරුව මහේස්ත්රාත් අධිකරණයට කරුණු වාර්තා කිරීමට කටයුතු කර ඇති බවත් කුමාරසිරි විජේකෝන් වැඩිදුරටත් කීවේය,
තමා ඇතුළු වනජීවී නිලධාරීන් 2022 දෙසැම්බර් 11 වෙනිදා මෙහි අහිතකර තත්ත්වය, පිළිබඳ ප්රදේශයේ යුද හමුදා කදවුර මෙන්ම සෝමාවතිය මහා විහාරයේ නායක ස්වාමීන් වහන්සේ දැනුවම්ත් කර කරුණු පැහැදිලි කළ බවද එනමුත් මෙම තත්ත්වය තවදුරටත් සිදුවෙමින් පැවතීම කණගාටුව කරුණක් බවද ඔහු පෙන්වා දුන්නේය.
පසුගියදා වැසිකිලි මළ අපද්රව්ය බැහැර කරන අවස්ථාවේදී සැකකරුවකු අත්අඩංගුවට ගැනීමට යෑමේදී සෝමාවතිය රජමහ විහාරයේ ස්වාමීන් වහන්සේලා තුන්නමක් ඊට එරෙහිව කරුණු දැක්වූ අවස්ථාවේදී පැවති වාතාවරණය සලකා බලා අත් අඩංගුවට ගැනීම සිදු නොකළ බවද වනජීවී දෙපාර්තමේන්තුව පොලොන්නරුව මහේස්ත්රාත් අධිකරණයට බී වාර්තාවක් හරහා කරුණු දැක්වීමේදී සඳහන් කර තිබේ.
2023 ජුනි 05 වෙනිදාද ගලි බවුසර් හරහා වැසිකිලි මළාපද්රව්ය වනෝද්යානයට මුදාහැර ඇති බවත්, ඒ අනුව 1964 අංක 44,1970 අංක 01 ,1993 අංක 49 , 2009 ,අංක 22, දරන අණ පනත් වලින් සංශෝධිත, 1937 අංක 2 දරන, වන සත්ව හා වෘක්ෂලතා ආරක්ෂක ආඥා පනත ඔවුන් විසින් උල්ලංඝනය කර ඇති බවට තමා ඇතුළු වනජීවී නිලධාරි කණ්ඩායමට නිරීක්ෂණය වී ඇති බවත් වනජීවී නිලධාරීන් පොලොන්නරුව මහේස්ත්රාත් අධිකරණයට බී වාර්තාව හරහා කරුණු දක්වා ඇත.
සෝමාවතියේ වැසිකිලි මළ අපද්රව්ය බැහැර කරන මෙම ප්රදේශයේ සංවේදී කලාපයක් බවත්, විශාල වළවල් හෑරීම හේතුවෙන් පුරාවස්තු විනාශ වී පුරාවිද්යා ආඥා පනත උල්ලංඝණය වී ඇත්ද යන්න සොයා බලන බවත් වනජීවි දෙපාර්තමේන්තුව පොළොන්නරුව කාර්යාලයේ නිලධාරීන් සඳහන් කරයි.
අප මෙම තත්ත්වය පිළිබඳ ඓතිහාසික සෝමාවතී රජමහා විහාරාධිපති පහමුණේ සුමංගල නායක ස්වාමීන් වහන්සේගෙන් දුරකථනයෙන් කළ විමසීමකදී සඳහන් කළේ වනජීවී දෙපාර්තමේන්තුවේ උපදෙස් අනුව එම කටයුතු නතර කර ඇති බවත්, එම ස්ථානවලට බැහැර කලේ ජලය පමණක් බවත්ය.
යම් යම් පුද්ගලයන් කිහිපදෙනෙකු එම ස්ථානවලට විශාල වලවල් කපා මළ අපද්රව්ය බැහැර කළේ , එක්කෙනාගේ දුර්වලතා නිසා බව කී උන්වහන්සේ එම තත්ත්වය දැන් සම්පූර්ණයෙන් නතර කර ඇතැයි පැවසූහ,
