ත්රීකුණාමලය – සමන් මල්ලවආරච්චි –
ත්රිකුණාමලය බෝධිරාජ විහාරස්ථානයේ සිද්ධියකට අදාළව අත්අඩංගුවට ගත්, බලංගොඩ කස්සප හිමියන් ඇතුළු භික්ෂූන් වහන්සේලා සිව්නමක් සහ තවත් හයදෙනෙකු ලබන 28 වනදා දක්වා තවදුරටත් රක්ෂිත බන්ධනාගාරගත කිරීමට ත්රි කුණාමලය මහේස්ත්රාත් අධිකරණය අද නියෝග කළේය.
ඒ අද චූදිතයින් අධිකරණයට ඉදිරිපත් කළ අවස්තාවේ දීය. ත්රිකුණාමලය ප්රධාන මහේස්ත්රාත් එම්. එස්. එම්. සම්සුදීන් ඉදිරියේ නඩුව කැඳවනු ලැබුවේය.
වලංගු බලපත්රයක් නොමැතිව ත්රිකුණාමලය ඩච් බේ වෙරළ කලාපය තුළ අනවසර ඉදිකිරීමක් සිදුකර බුදුපිළිමයක් තැන්පත් කළැයි කියන සිද්ධිය සම්බන්ධයෙන් බලංගොඩ කස්සප හිමි ඇතුළු භික්ෂූන් වහන්සේලා සිව් දෙනකු ඇතුළු 09 දෙනෙක් අද 19 දිනය දක්වා රක්ෂිත බන්ධනාගාර ගත කරන ලෙස ත්රිකුණාමලය ප්රධාන මහේස්ත්රාත් එම්. එස්. එම්. සම්සුදීන් නියෝග කළේ පසුගිය 14 වැනිදා බදාදා ය.
ත්රිකුණාමලය සම්බුද්ධ ජයන්ති විහාරාධිපති පූජ්ය ත්රිකුණාමලයේ කල්යාණවංශ තිස්ස, ත්රිකුණාමලය ප්රාදේශීය ශාසනාරක්ෂක බල මණ්ඩලයේ ලේඛකාධිකාරී බොරලුකන්ද රජමහා විහාරාධිකාරී පූජ්ය ත්රිකුණාමලයේ සුඛිතවංශ තිස්ස, වනවාසී බලන්ගොඩ කස්සප, ත්රිකුණාමලය ආනන්දාරාම (ගිරිහඩු සෑය ශාඛාව) විහාරවාසි පූජ්ය ත්රිකුණාමලය නන්ද යන හිමිවරුන් හා මේ සඳහා ආධාර අනුබල දුන් සම්බුද්ධ ජයන්ති විහාරයේ දායක සභාවේ ලේකම් විදුරංග ලොකු ගලප්පත්ති ,හිටපු නාගරික මන්ත්රීනි එක්සත් ජාතික පක්ෂ සංවිධායිකා එම්.එච්.දිපානි ලියනගේ, ව්යාපාරික තිලක් පෙරේරා, එන්.සී. පියල් හේමසිරි හා දුලාර ගුණතිලක යන අය පසුගිය 14 වැනිදා රක්ෂිත බන්ධනාගාරගත විය.
වෙරළ සංරක්ෂණ හා වෙරළ සම්පත් කළමනාකරණ පනතේ 14 (01) වගන්තිය උල්ලංඝණය කිරීම සම්බන්ධයෙන් එම පනතේ 28(01) වගන්තිය ප්රකාරව වෙරළ කලාපය තුළට අනවසරයෙන් ඇතුල් වි වලංගු බලපත්රයක් නොමැතිව අනවසර ඉදිකිරීමක් සිදුකර බුදුපිළිමයක් තැන්පත් කිරීම යන චෝදනා සම්බන්ධයෙන් පොලිසිය එදින අධිකරණයට කරුණු වාර්තා කර තිබිණි.
චූදිතයින්ට ඇප ලබා ගත නොහැකි ආකාරයෙන් පොලිසිය විසින් මෙම චෝදනා ගොනු කර තිබීම සැලකිය යුතු කරුණක් විය. නඩු විභාගය 28 වන දින දක්වා දීර්ඝ කරන ලදී.
