ඉතිහාසයේ පළමු වරට අධිකරණය විසින් වැඩ තහනමකට ලක් කළ පොලිස්පතිවරයා වු දේශබන්දු තෙන්නකෝන් පිළිබඳව ලබා දුන් අධිකරණ තීන්දුව ප්රශ්න කරන ආකාරයේ වැඩ පිළිවෙළක් රට පුරා සංවිධානය වෙමින් ඇතැයි පොලිස් දෙපාර්තමේන්තුවේම අභ්යන්තර ආරංචි මාර්ග හෙළි කරයි.
එහි එක් අංගයක් ලෙස රට පුරා ජනතාව විසින් ඇතිකරන විරෝධයක් සේ පෙන්වා දෙමින් පෝස්ටර් ව්යාපාරයක් දියත් කිරීමට සැලසුම් කර ඇති බවට ආරංචි පැතිර යන බවට වූ තොරතුරු සමාජ මාධ්ය ඔස්සේ ප්රකාශයට පත් වෙමින් ඇත.
ඊයේ (25) මාතර ප්රදේශයේ එවැනි පොස්ටර් කීපයක් අතින් ලියා තැන් තැන්වල අලවා තිබී හමුවුන බව පොලිසියේ අභ්යන්තර ආරංචි මාර්ග පවසයි.
මේ අතර ඊයේ දිනයේ දී පැවිදි හඬ සංවිධානය සංවිධානය කළ මාධ්ය සාකච්ඡාවක් අතර කොළඹ විශ්වවිද්යාලයේ කුලපති හාමුදුරුවන්වන මුරුත්තෙට්ටුවේ ආනන්ද හිමියන් අභයාරාමයේ දී මාධ්ය සාකච්ඡාවක් පවත්වා දේශබන්දු තෙන්නකෝන් ගේ “වැඩ තහනම් කළ බලවේගය ” ගැන සිය අදහස් පළ කළේය.
මුරුත්තෙට්ටුවේ හාමුදුරුවන් කීවේ දේශබන්දු තෙන්නකෝන් පොලිස්පතිවරයා ලෙස මේ රටේ මත් කුඩු සහ පාතාලය මර්ධනය කිරීම සඳහා ඉතා අවංකව කැපවීමෙන් විශාල මෙහෙවරක් කෙටි කාලසීමාවක් තුළ කරගෙන පැමිණි බවය.
“සියල්ලම පැහැදිලි කරන්න අපට මේ වෙලාවෙ බෑ. තහනම් වචනයක් තියනවා. ඒ නිසා. එතුමා ඉතාම හොඳන් දූරදර්ශීව මේ වැඩේ ( මත් කුඩු මර්ධනය) කරගෙන ආවා. ”
“දැන් පොඩ්ඩක් අඩපණ වෙන තත්ත්වයකට පත් වෙයිද කියලා මම දන්නේ නෑ කියන්න. ”
“කෙසේ වෙත්ත ඇස් ඇත්තෝ කන් ඇත්තෝ මේ ගැන ටිකක් බලලා මේක සක්රීය කරන්න කියන එක තමයි අරමුණ. වෙන මොකක්වත් නමෙයි. ”
“මේ වෙලාවෙ හැටියට අපට අධිකරණය ගැන කතා කරන්න පුලුවන් කමක් නෑ. කුමණ හෝ බලවේගයක් තුළින් මෙවැනි තත්ත්වයක් ආවා නම් ඒ බලවේගවලට ඇස් ඇරේවා කියන එක තමයි අපේ බලාපොරොත්තුව.”
ඊයේ (25) දිනයේ දීම මාතර දිස්ත්රික්කයේ හිමිවරු පිරිසක් වැඩ තහනමට ලක් වූ පොලිස්පතිවරයාගේ රුව සහිත බැනරයක් පසුබිමෙහි මාතර බෝධිය යට මාධ්ය හමුවක් කැඳවා තිබිණි. මාතර දිස්ත්රික් ශාසන ආරක්ෂක බල මණ්ඩලයේ ලේකඛාධිකාරි පරදූවේ සිරිධම්ම හිමි කීවේ මත් උවදුරු සියයට හැටක් හැත්තෑවක් නැති වුන බවත් රටේ පාතාලය නිමා කරන්නට කුඩු ජාවාරමට එරෙහිව නැගිටපු එකම පොලිස්පති වරයා දේශබන්දු තෙන්නකෝන් බැවින් එතුමාට මේ අත් වූ තත්ත්වය සම්බන්ධව කම්පනයක් ඇති බවය.
කෙසේ වෙතත් මහ ජනතාව අතින් වියදම් කරගෙන පොස්ටර් ව්යාපාරයක් කවර පොලිස් ප්රධානියෙකුව ඉලක්ක කරගෙන දියත් වුව ද ඒ සම්බන්ධව ගැඹුරින් විමසා බැලිය යුතු බව බොහෝ පොලිස් ප්රධානීන්ගේ මතය වී ඇතැයි වාර්තා වේ.
