මනම්පිටිය නිමල් ජයරත්න –
-
අද උදේත් අක්කර ගණනක අඹ වගාවක් විනාසයි… පාඩුව මිලියන ගණනක්… විනාශ වෙලා තිබෙන්නේ අවුරුදු පහක් තිස්සේ ගොවි ජනතාව විසින් ගොඩනගපු ප්රාර්ථනාව…
-
සමාගම් කාරයින් අලි මංකඩ හරස්කර අලි වැට ගහලා… ගම් බිම් වනසන වන අලි නිසා ජන ජීවිත මෙන්ම අලි ජීවිතත් අනතුරේ… ගම් වදින අලි පන්නන්න අලි වෙඩිවත් දෙන්න බැරි ඇමතිගේ විද්යානුකූල විසඳුම එන විට බඩු බනිස්…
වැලිකන්ද කඩවතමඩුව ගම්මානයට අද ( 20 ) අලුයම කඩා වැදුන වන අලි රංචුවක් ද අක්කර දෙකහමාරක, අස්වනු නෙලීමට ආසන්නව පැවැති අඹ වගාවක් සම්පූර්ණයෙන් විනාශ කර ඇති බව කඩවතමඩුව ගොවි සංවිධානය සඳහන් කරයි.
ශ්රී ලංකා මහවැලි අධිකාරියේ අනුග්රහය ඇතුව වසර පහක් තිස්සේ මෙම අඹ වගාව ගොවි සංවිධානය විසින් සිදුකරගෙන ගොස් තිබිණි.
අස්වනු නෙලීමට ආසන්නයේදී අඹ වගාව වන අලි විසින් සෑම වර්ෂයකම විනාශ කරන බවත්, රුපියල් ලක්ෂ දහයක පමණ පාඩුවක් මේ හේතුවෙන් තම ගොවි සංවිධානයට සිදුව ඇති බවත් කඩවතමඩුව ගොවි සංවිධානයේ සභාපති නිමල් අධිකාරි සඳහන් කළේය.
මහාපරිමාන සමාගම්වල කුපාඩිකම –
වැලිකන්ද ප්රදේශයේ මහා පරිමාණ සමාගම් තම තමන්ගේ වගාවන් සහ ගොඩනැඟිලි ආරක්ෂා කිරීම සඳහා පෞද්ගලික අලි වැටවල් ඉදිකිරීමත්, වන අලි ගමන් කරන අලි කොරිඩෝ හරස් කරමින් අලි වැටවල් ඉදිකිරීමත් හේතුවෙන්, සෝමාවතී හා මාදුරුඔය ජාතික වනෝද්යානයේ වන අලි ගම්වැදීම සිදුවන බව කඩවතමඩුව ගොවි සංවිධානය පෙන්වා දෙයි.
මෙලෙස කඩවතමඩුව ගම්මානයට කඩා වැදී අඹ වගා විනාශ කෙරු වන අලි වැලිකන්ද මඩකලපුව ප්රධාන මාර්ගයේ කඩවතමඩුව මංසන්දියේ තිබූ පෞද්ගලික වී වෙළඳසැලක් කඩා එහි තිබු වී මලු එළියට රැගෙන විනාශ කර ඇත.
අඛන්ඩ වන අලි තර්ජනය
මාදුරුඔය සහ සෝමාවතීය ජාතික වනෝදයෙන් පැමිණෙන වන අලි වැලිකන්ද ප්රාදේශීය ලේකම් කොට්ඨාසයේ ගම්මාන රැසකට දැඩි තර්ජනයක්ව ඇත. , වන අලියෙකු පහර දීමෙන් රුවන්පිටිය ගම්මානයේ අවුරුදු 74 ක වයසැති මවක මේ වනවිට පොලොන්නරුව මහ රෝහලට ඇතුළත් කර ප්රතිකාර ලබමින් සිටින්නීය.
මීට අමතරව වන අලියෙකු පහරදීමෙන් වැලිකන්ද නාමල්ගම ප්රදේශයේ නිවසක් සම්පූර්ණයෙන්ම විනාශ කර තිබේ.
අවුලට හේතුව වනජීවීයම කියයි
වැලිකන්ද ප්රාදේශීය ලේකම් කොට්ඨාසයේ පවතින වන අලි තර්ජන සම්බන්ධව අප වැලිකන්ද වනජීවි කාර්යාලයෙන් දුරකථනයෙන් කළ විමසීමකදී, එහි නිලධාරියෙකු සඳහන් කළේ,වන අලි ගමන් කරන මාර්ග හරස් කරමින්, පෞද්ගලික සමාගම්කරුවන් අලි වැටවල් ඉදිකර තිබීම මාදුරුඔය සහ සෝමවති ජාතික වනෝද්යානයෙන් වැලිකන්ද ප්රදේශයට වන අලි ගම් වැදී මිනිස් ජීවිත හා දේපොළවලට හානි කිරීම ප්රධාන හේතුවක් බවය.
එලෙස ගම් වදින වන අලි පලවා හැරීමට තුවක්කු සඳහා පතුරම් මෙන්ම අලි වෙඩි නොමැතිකම ප්රධාන ගැටලුවක්ව පවතින බව එම නිලධාරියා පැවසුවේය.
මෙම ගැටලුකාරී තත්ත්වය නිසා තම නිලධාරීන් මෙන්ම වැලිකන්ද ප්රාදේශීය කොට්ඨාසයේ වසම් තිස් එකක පවුල් විසිනමදහක් පමණ දැඩි අසීරුතාවට පත්ව ඇති බවත්, ගම්වදින වන අලින්ද ජීවිත තර්ජනයකට මුහුණපා ඇති බවත් වනජීවි නිලධාරීහු සඳහන් කළහ.
