දිනසේන රතුගමගේ –
නාවික හමුදාව විසින් මන්නාරමේ වංකාලේ ප්රදේශයේ සහ යාපනයේ ඩෙල්ෆ්ට් දූපතට ඔබ්බෙන් වූ ප්රදේශයේ ඊයේ (30) සිදු කළ මෙහෙයුමකදී රුපියල් දෙකෝටි හැත්තෑ ලක්ෂයක් වටිනා කේරළ ගංජා කිලෝ ග්රෑම් 125 ක් සමග ඩිංගි යාත්රා දෙකක්ද සැකකරුවන් පස් දෙනෙක්ද අඩංගුවට ගෙන තිබේ.
ඩෙල්ෆ්ට් දූපතට ඔබ්බෙන් වූ මෙරට මුහුදු ප්රදේශයේ සිදුකළ සෝදිසි මෙහෙයුමකදී, එම මුහුදු ප්රදේශයේ යාත්රා කළ සැක කටයුතු ඩිංගි යාත්රා දෙකක් නිරීක්ෂණය කර පරීක්ෂාවට ලක් කෙරිණි.
එහිදී එම ඩිංගි යාත්රා තුළ උර හතරක අසුරා තිබූ කේරළ ගංජා කිලෝ එකසිය දහනවයයි ග්රෑම් පන්සියයක පමණ තොගයක් සමඟ සැකකරුවන් සිව්දෙනෙකු සහ එම ඩිංගි යාත්රා දෙක නාවික හමුදා භාරයට ගැනීමට කටයුතු කෙරිණි.
එමෙන්ම, උතුරු මැද නාවික විධානයට අයත් ශ්රි ලංකා නාවික නෞකා පුස්සදේව සහ ශ්රි ලංකා නාවික නෞකා ගජබා ආයතන, මන්නාරම පොලිස් කොට්ඨාස අපරාධ විමර්ශන අංශය හා එක්ව මන්නාරම වංකාලේ ප්රදේශයේ සිදුකළ සෝදිසි මෙහෙයුමකදී, කේරළ ගංජා කිලෝ දෙකයි ග්රෑම් තුන්සියක ප්රමාණයක් සමඟ සැකකරුවකු නීතියේ රැහැනට හසුකර ගැනීමට කටයුතු කෙරිණි.
ඩෙල්ෆ්ට් දූපතට ඔබ්බෙන් වූ මුහුදේදී නාවික හමුදා භාරයට ගත් සැකකරුවන් අවුරුදු 26 ත් 51ත් අතර වන මාදම්පේ සහ කයිට්ස් යන ප්රදේශයන්හි පදිංචිකරුවන් බවට හඳුනාගෙන ඇත.
මන්නාරම වන්කාලෛයි ප්රදේශයේදී නීතියේ රැහැනට හසුකරගත් සැකකරු වයස අවුරුදු 19ක් වන වන්කාලෛයි ප්රදේශයේ පදිංචිකරුවෙකු බවට හදුනාගෙන තිබේ.
එම සැකකරුවන් පස්දෙනා කේරළ ගංජා තොගය සහ ඩිංගි යාත්රා දෙක ඉදිරි නීතිමය කටයුතු සඳහා ඩෙල්ෆ්ට් සහ වන්කාලෙයි යන පොලිස් ස්ථාන වෙත භාරදීමට කටයුතු කෙරිණි.
