රටේ පවතින නීතිය කඩකරමින් දුම්කොල සමාගම විසින් රස ගැන්වූ සිගරට් අලෙවි කිරීමට එරෙහිව පවරා තිබුණු තහනම අභියෝගයට ලක් කරමින් අභියාචනාධිකරණයේ ගොනු කළ පෙත්සමේ තීන්දුව දුම්කොල සමාගමට එරෙහිව වාචිකව ප්රකාශයට පත් වුවද එහි ලිඛිත තීන්දුව සුපුරුදු ලෙස අධිකරණ දෙපාර්තමේන්තුවේ වෙබ් අඩවියේ පළ නොකීරීම පසුපස ඇති සැක කටයුතු තත්ත්වයක් පිළිබඳව විපක්ෂ නායක සජිත් ප්රේමදාස අද පාර්ලිමේන්තුවේ දී විමසුවේය.
සිය මුදල් බලය සහිතව රටේ සෑම ක්ෂේත්රයක්ම ආක්රමණය කරමින් සිටින දුම්කොළ සමාගමේ නඩුව සම්බන්ධව අධිකරණ තීන්දුව ප්රසිද්ධ මාධ්යයේ ප්රකාශයට පත් නොවීම ගැටලුවක් බව පසුගිය දින කීපය තුළම වෘත්තියින් අතර කථිකාවක් ඇති කර තිබිණි.
මේ සම්බන්ධව විපක්ෂ නායකවරයා අධිකරණ ඇමතිවරයාගෙන් අද පාර්ලිමේන්තුවේ දී විමසා සිටියේය.
“ඩන්හිල් ස්විච්, ඩන්හිල් ඩබල් කැප්සියුල්, ජෝන් ප්ලේයර් ගෝල්ඩ් ෆ්රෝ කූල් කියන සිගරට් වර්ග තුනක් දුම්කොල හා මධ්යසාර පිළිබඳ ජාතික අධිකාරිය 2016.09.01 දිනැති අංක 1982/33 දරන අති විශේෂ ගැසට් පත්රය ප්රකාරව නෛතික ප්රශ්න කිරීමකට භාජනය කළා. එහිදී ප්රධාන වශයෙන්ම රස ගන්නවන ලද ඩන්හිල් සිරගරැට්ටුව අලෙවියට එරෙහිව මාතර අනුරාධපුර කොළඹ දිස්ත්රික්කවල නඩු පැවරුවා. එම නඩුවලින් මේ රස ගන්වන ලද සිගරට් අලෙවිය තහනම් කෙරුණා.
එම තීන්දුව අභියෝගයට ලක් කරමින් දුම්කොල සමාගම අභියාචනාධිකරණයේ නඩුවක් පැවරුවා. ඒ සියලුම නඩු කටයුතු සැලකිල්ලට ගෙන අභියාචනාධිකරණය විසින් 2023.11.17 දින මීට අදාලව තීන්දුව ලබා දීලා තියනවා. එම තීන්දුව අනුවත් සිද්ධ වුනේ පහළ උසාවියෙන් ලබා දුන් තීන්දුව අනුමත වීම.
එහෙත් මේ සම්බන්ධව වාචිකව පවලා තිබුණට ලිඛිතව ප්රකාශ නොවීම සම්බන්ධව ගැටලුවක් තියනවා. මේ ගැන සොයලා බලන්න කියලා අධිකරණ ඇමතිවරයාගෙන් ඉල්ලා සිටිනවා.
