දශක එක හමාරකටත් වැඩි කාලයකට පසු දළදා වහන්සේ හුදී ජන අපට පෙන්වීම සඳහා ආණ්ඩුව ගත් තීන්දුව මරුය.
එමෙන්ම එන සියල්ලන්ට පොදු ප්රවේශයක් සපයමින් එනවානම් පෝලිමේ එන ලෙසත් විශේෂ අමුත්තන් වෙනුවෙන් ද්වාර විවර වෙන්නේ නැති බවත් කී විට එයම සාධාරණ සමාජයක් පිළිබඳ ස්ථාවරය පල කරන්නක් බැවින් දළදා ප්රදර්ශනය සම්බන්ධ නිවේදනයට වඩා අප බොහෝ දෙනෙක් කුල්මත් කළේ එම විශිෂ්ට තීන්දුවය. අපේ සමාජයේ මෙතෙක් නොතිබුණු යමක් පිළිබඳව අපට දැනුනේය.
එහෙත් වැඩේ වෙනකොට ඒ කියැවෙන වචනවල බර ලොවෙත් නැත. ලොවි ගහෙත් නැත. වීඅයිපී පෝලිම් ඇත්තේ නොදැනෙන්නටය. වැඩේ සිද්ධ වෙන්නේ මෙසේය.
දළදා වහන්සේ මහජන ප්රදර්ශනය සදහා වඩමවා අදාල විශේෂිත පුද සත්කාර කර නිමා කරන්නේ 11.45ට ය. ඒ අවස්ථාවේ සිට මාළිගා පරිශ්රයේ පිටුපසින් 12.30 තෙක් අති විශේෂ පුද්ගලයින් සඳහා පෝලිමක් නොමැතිව ගොස් දළදා දැක වැඳ පුදා ගැනීමට අවස්ථාව රහසිගතව විවර කර ඇත්තේය.
12.30ට ජනතාවට දළදා දැක්ම විවෘත කරන අවස්ථාව වනවිට වීඅයිපී පෝලිම වැසෙන්නේය. මිනිස්සු කවුරුවත් ඒ පොලිම ගැන දන්නේ නැත.
විශේෂයෙන් කිව යුත්තේ අපේ රටේ හැටි තේරුම් අරන් ප්රකාශ නිකුත් නොකළහොත් කුජීත වෙන බවය. එය නොදැන දාර ටෝක් දෙනවා යැයි අප විශ්වාස කරන්නේ නැත. මෙවැනි හොර පාරක් දළදා වන්දනාවට ඇතැයි කොහේදෝ ඉන්න නසරානියෙක් වීඩියෝ කර එවන තුරු මේ ලියන අපත් එවැනි පාරක් ගැන දැනගෙන සිටියේ නැත.
කියන දෙයක් කරන්න. කරන දෙයක් කියන්න. කරන්න අමාරුවුනත් කළ යුතු දෙයක් ඇතිනම් එයත් කියන්න. පවතින සමාජ පරිසරය තුළ මිනිස්සු අන්දවන්නට පුලුවන් කාලය ඉතාම සීමිතය.
