විදුලි බිල අධික ලෙස ඉහළ දැමූ පසුගිය වසරේ අගෝස්තු මාසයේ සිට මේ දක්වා කාලය තුළදී පවුල් හාරලක්ෂ තිස්හයදහසක් විදුලි භාවිතයෙන් ඉවත් වී තිබෙන බව මහජන උපයෝගිතා කොමිසමේ සභාපති ජනක රත්නායක පවසයි.
ඔහු වැඩිදුරටත් පවසන්නේ රට තුළ සිටින විදුලි පාරිභෝගික පවුල් ලක්ෂ හැටක පමණ පිරිසෙන් පවුල් 436,000ක් මේ වසරේ පෙබරවාරි මාසය වනවිට එක විදුලි ඒකකයක් හෝ භාවිත නොකරන බවය.
මීට අමතරව ඒකක 90ට වැඩියෙන් විදුලිය භාවිත කළ ලක්ෂ හයක පමණ ප්රමාණයක් ඒකක 60ට අඩු වෙන් භාවිත කරන කාණ්ඩයට වැටී ඇති බව ඔහු පෙන්වා දෙන්නේය.
පසුගිය අගෝස්තු මාසයේ සිට මේ දක්වා කාලය තුළදී අවස්ථා දෙකක් තුළ අසාධාරණ ලෙස විදුලි ගාස්තු ඉහළ යෑමට සාපේක්ෂව මෙම බලශක්ති දරිද්රතාවය වර්ධනය වී ඇති බව ඔහු වැඩිදුරටත් කියයි.
විදුලි ඒකක 90ට අඩුවෙන් භාවිතා කළ පාරිභෝගිකයින්ගේ විදුලි බිල පෙබරවාරි මාසයෙන් පසු සියයට 150 -250 ප්රමාණයෙන් වැඩි වී තිබීම විදුලි බල පනත උල්ලංඝනය කිරීමක් බවත් මේ වනවිට සිදුවන විදුලි නිශ්පාදන පිරිවැය සැලකීමේ දී මේ ගාස්තු අය කිරීම අසාධාරණ බවත් සභාපතිවරයා පෙන්වා දෙයි.
සභාපතිවරයා කියන්නේ ඒකක 30ට අඩුවෙන් භාවිතා කළ දිළිඳු පවුල් සඳහා පසුගිය පෙබරවාරි ගාස්තු සංශෝධනය දැඩි ලෙස බලපෑ බවත් ඒ ගාස්තු සංශෝධනය තුළ ඔවුන්ගේ විදුලිබිල සියයට 1200කින් වැඩිවුන බවත්ය.
පසුගිය අවුරුද්දේ අගොස්තුවලට පෙර ඔවුන් රුපියලි 5කට මිලදී ගත් විදුලි ඒකකයට රුපියල් 67ක් ගෙවන්නට සිදුවූ බව පෙන්වා දෙන මහජන උපයෝගීතා කොමිසමේ සභාපති ජනක රත්නායක අවධාරණය කරන්නේ ඒකක 120ට අඩුවෙන් විදුලිය පිරිභෝජනය කරන පාරිභෝගියන් වෙනුවේන සහනයක් ලබා දිය යුතු බවය.
