තෙල් හිඟයක් නොමැතිව පසුබිමක කෘතිම ඉන්ධන හිඟයක් ඇති කරනු ලැබ රජය අස්ථාවර කිරීම සඳහා කුඩා කණ්ඩායමක් කුමන්ත්රණකාරී වැඩපිළිවෙළක් දියත් කර ඇතැයි මේ වනවිට පැනනැගී ඇති තත්ත්වය යටතේ සැකයක් ඇතිවන බවත්, මේ පසුපස යම් දේශපාලනයක් ඇතිනම් කිව යුතු වන්නේ එවැනි කඩාකප්පල්කාරී කටයුතුවලට රජය ඉඩ නොදෙන බවට අවධාරණය කරන බවත් ඉන්ධන පොලිම් ගැන පාර්ලිමේන්තුවේ විශේෂ ප්රකාශයක් කළ මුදල් නියෝජ්ය අමත්ය ආචාර්ය අනිල් ජයන්ත නවරත්න අවධාරණය කළේය.
ඔහු මේ බව පැවසුවේ පාර්ලිමේන්තු මන්ත්රී දයාසිරි ජයසේකර විසින් මතුකළ ප්රශ්නයකට පිළිතුරු දෙමිනි. දයාසිරි ජයසේකර කීවේ ඉන්ධන ඇනවුම් කිරීම විශාල ලෙස අඩු වී තිබෙන බවය. කිව්.ආර්. කේතය භාවිතා කරන අවස්ථාවටත් වඩා තුනෙන් අඩකට වැඩි අඩුවක් පසුගිය 27 වැනිදා වාර්තාවන බව ද ඔහු කීවේය.
“ඊයේ තිබුණ රැස්වීමට බෙදුම්කරුවො සියලු දෙනා ඇවිත් තිබුණා. ඔවුන් එක හෙළා ඒකමතික තීරණයට පැමිණියා. කරුණාකරලා මේ අයත් එක්ක සාකච්ඡා කරලා යම් තීන්දුවකට එන්න. ඒ අය නැවත වරක් රිට් එකකට යන්න හදන්නේ. මේක නතර වෙන්නේ උසාවියෙ.” මන්ත්රීවරයා කීවේය.
එහිදී නැගී සිටි ආචාර්ය අනිල් ජයන්ත නවරත්න මෙසේ පැවසුවේය.
“කිසිදු තෙල් හිඟයක් ඇත්තේ නෑ. තෙල් හිඟයක් ඇති වෙන්න දෙන්නේ නෑ. පෝලිම් තියනවා. තියෙන්නේ නිර්මාණය කරගත්ත පෝලිම් ටිකක්. ”
“බෙදුම්කරුවො සාකච්ඡා කරනවා ඛණිජ තෙල් නීතිගත සංස්ථාවත් එක්ක. ඔවුන් ඒකාබද්ධව සම්බන්ධයෙන් වැඩ කරන්නේ. වෘත්තීය සමිතියක් සමාජ මාධ්යයන්ට බෙදා හැරිය ප්රවෘත්තියක් නිසා තමයි මේ තත්ත්වය ඇති වෙලා තියෙන්නේ. තෙල් සංස්ථාවත් බෙදුම්කරුවොත් වෙන වෙනම ගනුදෙනු කරනවා. වෘත්තීය සමිතියක් එක්ක ගනුදෙනු කරන්නේ නෑ. අපි මේවා ඇනවුම් කරන්නේ නෑ කියලා පොඩි කණ්ඩායමක් එළියෙ ගිහින් කියනවා. නමුත් එහෙම නෑ. ඉන්ධන ඇනවුම් කරනවා. බෙදා හරිනවා. අපි සාකච්ඡාවට සූදානම්. අපි සාකච්ඡා කරමින් ඉන්නවා. තොරතුරු බෙදා ගන්නවා. ”
“නව මිල සූත්රය ගණනය කිරීම් තාක්ෂණිකව කරුණු මත පමණක්ම නොවේ මේ ගැටලුවට විසඳුම් හෙව්වේ. වඩා දිගු කාලයක් පුරා සීපීසී එක්ක වැඩ කළාට පස්සේ වේගයෙන් අපි තොරතුරු හුවමාරු කළා. ඔවුන් කොච්චර ලෝඩ් ප්රමාණයක් ගන්නවද, විකුණනව ද?, පිරිවැය කොච්චර ද වාගේ තොරතුරු මත තමයි කිසිම කෙනෙකුට අසාධාරණයක් නොවන විදිහට සාධාරණ ලාභ ප්රතිශතයට වඩා වැඩි ප්රතිශතයක් පිරිවැය මත ලැබෙන විදිහට බෙදුම්කරුවන් උදෙසා මේ දීමනාව සකස් කරලා තියෙන්නෙ. මම හිතනවා ඒ පැත්තෙන් ගත්තට පස්සේ මේක ඉතාම සාධාරණයි. ”
“මේ තත්ත්වය පදනම් කරලා වෙළෙඳපලේ අනවශ්ය තත්ත්වයක් ඇති කරලා යම් හිඟයක් ඇති කරන්න උත්සාහ කරනවා නම් මේක කඩාකප්පල්ලකාරී වැඩක්. කුමන්ත්රණකාරී වැඩක්. මේ පසුපස දේශපාලන බලවේගයක් තියෙන්න පුලුවන්. අපි කවුරුත් දන්නවා මේ ආණ්ඩුව රට ඉස්සරහට අරන් යනකොට විවිධ උපක්රම භාවිතා කරනවා මේ ආණ්ඩුවේ ගමන ආපස්සට හරවන්න.”
“එවැනි දේවල් අපි අනිවාර්යයෙන්ම නැති කරනවා. දයාසිරි මන්ත්රී තුමා උසාවිය ගැන කතාවක් මතු කළා. ඇත්තටම 28 වැනිදා මේ කට්ටිය උසාවියට කරුණු ඉදිරිපත් කරලා නෑ. පැහැදිලිව පෙනෙනවා කරුණු ඉදිරිපත් කිරීමක් කරනවා නම් කරන්න තිබුණා. මොකද මේ අයට මේක සාධාරණීකරණය කරන්න කිසිම තොරතුරක් නැති නිසා. ”
“ඔබතුමා දන්නවා බදු මත ලාභාන්තික ගන්න බෑ. මේක අසාධාරණ තත්ත්වයක්. ” නියෝජ්ය ඇමතිවරයා පැවසුවේය.
