පල්ලේකැලේ ක්රීඩා සංකීර්ණයේදී පසුගිය 21සහ 22 යන දිනවල පැවැත්වීමට නියමිතව තිබූ මධ්යම පළාත් ජාතික පාසැල් පිහිනුම් තරඟාවලිය විනිශ්චය කිරීමට පිළිගත් තරඟ විනිසුරුවරු සම්බන්ධ නොකිරීම හේතුවෙන් හදිසියේ අවලංගු කිරීම නිසා ඊට සහභගි වීමට පැමිණි ළමුන් මෙන්ම දෙමව්පියන් ද දැඩි අසීරුතාවට පත්ව තිබේ.
තරඟ විනිශ්චය කිරීමට ජල ක්රීඩා විනිසුරු සංගමයේ විනිසුරුවරු වෙනුවට මධ්යම පළාත් ක්රීඩා දෙපාර්තමේන්තුව මගින් ජවන හා පිටිය ක්රීඩා විනිසුරු කැඳවා තිබීම සම්බන්ධයෙන් ඇතැම් දෙමව්පියන් හා පුහුණුකරුවන් විරෝධය දැක්වීම හේතුවෙන් මෙම තත්ත්වය ඇතිවීමට හේතුවී ඇත.
ජල ක්රීඩා විනිසුරු සංගමයේ විනිසුරුවරුවරයෙකු තරඟ විනිශ්චය සඳහා රුපියල් 3000-5000 ත් අතර මුදලක් අය කරන බවත් පවතින චක්රලේඛණ අනුව රුපියල් 1500 කට වැඩි මුදලක් විනිසුරුවරයෙකුට ගෙවීමට නොහැකි නිසා ජවන හා පිටිය ක්රීඩා විනිසුරුවරු යොදා ගැනීමට පියවර ගත් බවත් මධ්යම පළාත් ක්රීඩා දෙපාර්තමේන්තුව පවසයි.
තරඟයට සහභාගි වීම සඳහා තරඟකරුවන් ඔවුන්ගේ දෙමව්පියන් හා පුහුණුකරුවන් සමඟ ක්රීඩාංගණයට පැමිණ සිටියදී තරඟාවලිය නොපවත්වන බව මධ්යම පළාත් ක්රීඩා බලධාරීන් දැනුම් දුන් බවත් එම අවස්ථාව වනවිට ඇතැම් තරඟකරුවන් ඇඟ උණුසුම් ව්යායාම පවා කරමින් සිටි බවත් දෙමව්පියෝ පවසති.
මෙම තරඟාවලියට සහභාගි වීම සඳහා මධ්යම පළාතේ මහනුවර, මාතලේ සහ නුවරඑළිය යන දිස්ත්රික්ක වලින් තරඟකරුවන් වැඩි පිරිසක් පැමිණ තිබුණේ පෞද්ගලිකව වාහන පහසුකම් සලසා ගනිමිනි. ඉන්ධන මිල ඉහළ යෑමත් සමඟ ප්රවාහන ගාස්තු විශාල ලෙස වැඩිවී තිබෙන පසුබිමක ඇතැම් දෙමව්පියන්ට තම දරුවන් තරඟයට සහභාගි කරවීම සඳහා රුපියල් 10000.00 ක පමණ මුදලක් වැය කිරීමට සිදුව තිබිණි.
අර්බුද රැසක් පවතින මෙවැනි කාල සීමාවක දරුවන් සහ දෙමාපියන් මෙම ක්රීඩා සංකීර්ණයට කැඳවීමට පෙර අදාළ ගැටලු සම්බන්ධයෙන් අදාළ පාර්ශ්ව එක්ව සාකච්ඡා කර තීරණයකට එළඹ තීරණයක් දැනුම් දුන්නේ නම් දරුවන් මේ ආකාර අපහසුතාවකට පත් නොවන බව දෙමව්පියෝ පවසති.
කල්දැමුණු මධ්යම පළාත් ජාතික පාසැල් පිහිනුම් තරඟාවලිය ලබන මස මැද භාගයේ පැවැත්වීමට සැළසුම් කර තිබෙන බව මධ්යම පළාත් ක්රීඩා දෙපාර්තමේන්තුව පවසයි.
