තාවකාලික ආර්ථික අර්බුදයකට මුහුණදී සිටින ශ්රී ලංකාව ඉන් මුදවා ගැනීම සඳහා අඛණ්ඩව චීනයේ සහයෝගය හිමිවන බව ශ්රී ලංකාවේ චීන තානාපති කී ෂෙන්හොං (H.E. Qi Zhenhong) පවසයි. මෙම ආර්ථික අර්බුදය එක් රැයකින් නිමා නොවුණත් කෙටි සාධාරණ කාලයක් තුළදී ශ්රී ලංකාවට ඉන් මිදීමට හැකියාව පවතින බව චීන තානාපතිවරයා කියයි.
මහනුවරට පැමිණි චීන තානාපතිවරයා ඊයේ (27) පස්වරුවේ අස්ගිරි මහා විහාර පාර්ශවයේදී අස්ගිරි පාර්ශවයේ මහා නායක අතිපූජ්ය වරකාගොඩ ඤාණරතන හිමියන් බැහැ දුටු අතර මල්වතු මහා විහාරයේදී මහා නායක අතිපූජ්ය තිබ්බටුවාවේ ශ්රී සිද්ධාර්ථ සුමංගල හිමියන් බැහැ දැක ආශිර්වාද ලබා ගත්තේය.
චීන රජයේ සහයෝගීතා ආධාර ප්රදානයට අමතරව චීන බෞද්ධ සංගමය මගින් විහාරස්ථාන හා බුදු දහමේ පුනර්ජීවනය උදෙසා ආධාර ලබා දීමේ වැඩපිළිවෙළක් සැලසුම් කොට ඇතැයි චීන තානාපතිවරයා මහා නායක හිමියන් හමුවේ ප්රකාශ කළේය.
ඉකුත් කාලයේදී ශ්රී ලංකාව තුළ විවිධ වෙනස්කම් සිදුවුවත් ශ්රී ලංකා – චීන මිත්රත්වය තුළ කිසිදු වෙනස්වීමක් සිදු නොවුණු බව කී තානාපතිවරයා ද්වීපාර්ශවීය සබඳතා අඛණ්ඩව පවත්වා ගන්නා බව සඳහන් කළේය.
පවතින අසීරු තත්ත්වයෙන් මිදීමට ශ්රී ලංකාවට හැකි බවත් ඒ සඳහා චීනයේ නොමඳ සහයෝගය පළ කරන බව ද ශ්රී ලංකාවේ චීන තානාපති චී ෂෙන්හොං වැඩිදුරටත් සඳහන් කළේය.
මහනුවර චන්දානන්ද බෞද්ධ විදුහලේ විදුහල්පති ශ්රාස්ත්රපති පූජ්ය ගොඩගම ධම්මකිත්ති හිමියන් ද මෙම අවස්ථාවට එක්වූහ.
