නුවරඑළිය ග්රෙගරි වැව ආසන්නයේ පිහිටි පර්චස් 17.6 ක ඉඩමකට ව්යාජ ඔප්පුවක් සකස් කර එය රුපියල් එක්කෝටි දස ලක්ෂ පනස් දහසක මුදලකට මහනුවර පුද්ගලයෙකුට විකුණු අනුරාධපුර ප්රදේශයේ යුවළක් මහනුවර පොලීසියේ විශේෂ විමර්ශන අංශය මගින් සැකපිට අත්අඩංගුවට ගෙන තිබේ.
අදාළ යුවළගෙන කළ ප්රශ්න කිරීම් වලින් අනතුරුව ඔවුන් ට එම ව්යාජ ඔප්පුව සහ පත්තිරු සකස්කර දුන් අනුරාධපුර ප්රදේශයේ ව්යාජ කච්චේරියක් වැටලු පොලීසිය එහි තිබූ ව්යාජ ඔප්පු තොගයක් සමඟ පුද්ගලයෙකු අත්අඩංගුවට ගෙන ඇත.
ග්රෙගරිවැව ආසන්නයේ ඉඩම මහනුවර ව්යාපාරිකයාට මිලට ගැනීම සඳහා තැරව්කරුවෙකු ලෙස කටයුතු කළ හොරණ ප්රදේශයේ පුද්ගලයෙකු ද පොලීසිය අත්අඩංගුවට ගෙන තිබෙන අතර අදාළ යුවළ අත්අඩංගුව ගෙන ඇත්තේ ඔහු විසින් ලබාදුන් තොරතුරු පදනම් කරගෙනය.
අදාළ යුවළ සතුව තිබූ ජාතික හැඳුනුම්පත් හා රියදුරු බලපත්ර ව්යාජ ඒවා බවට තහවුරු වීමෙන් පසු පොලීසිය එ් සම්බන්ධයෙන් ද විමර්ශනයක් සිදුකර තිබේ. ඒ අනුව අනුරාධපුරයේ තවත් ව්යාජ කච්චේරියක් වැටලු පොලීසිය එහි තිබී ව්යාජ හැඳුනුම්පත්, රියදුරු බලපත්ර, විභාග සහතික, රජයේ කාර්යාල ලිපි ශීර්ෂ, දෙපාර්තමේන්තු ප්රධානීන් ගේ නිල මුද්රා,උප්පැන්න සහතික, මරණ සහතික, විදේශ ගමන් බලපත්ර ඇතුළු තොගයක් පොලීසිය භාරයට ගෙන ඇත්තේ සැකකරුවන් තිදෙනෙකු ද සමඟය.
මෙම ව්යාජ කච්චේරි දෙකම පවත්වාගෙන ගොස් ඇත්තේ එකම පුද්ගලයෙකු විසින් වන අතර ව්යාජ සහතික සකස් කිරීමට මෙම ස්ථානය මගින් රුපියල් 3000 සිට 50000 දක්වා මුදල් ලබාගෙන තිබෙන බව පොලිස් පරීක්ෂණ මගින් අනාවරණය වී තිබේ.
මධ්යම පළාත් ජ්යෙෂ්ඨ නියෝජ්ය පොලිස්පති ලලිත් පතිනායක, නියෝජ්ය පොලිස්පති මහින්ද දිසානානයක යන මහත්වරුන්ගේ උපදෙස් මත මහනුවර කොට්ඨාස භාර ජ්යෙෂ්ඨ පොලිස් අධිකාරි අනුරුද්ධ බණ්ඩාරනායක මහතාගේ මෙහෙයවීමෙන් පොලිස් අධිකාරි ඉලංගකෝන්, මහනුවර පොලිස් මූලස්ථානාධිපති ප්රධාන පොලිස් පරීක්ෂක රසික සම්පත් යන මහත්වරුන් ගේ මග පෙන්වීමෙන් විශේෂ වංචා විමර්ශන අංශයේ ස්ථානාධිපති ප්රධාන පොලිස් පරීක්ෂක එච්.එම්.පී හේරත්, උප පොලිස් පරීක්ෂක අබේරත්න, පොලිස් කොස්තාපල් වරුන් වන වසන්ත, හෙට්ටිආරච්චි,චන්දන,රණසිංහ,නුවන්, ප්රේමසිරි යන නිලධාරීන් මෙම වැටලීම සිදුකර තිබේ.
