සෞඛ්ය හා ශාරීරික අධ්යාපන විෂයට අදාලව 2018 වර්ෂයේ වයඹ පළාත මගින් 8 ශ්රේණියේ සිසුන් වෙත ලබා දුන් වාර පරීක්ෂණ ප්රශ්න පත්ර ම අද (15) පැවති වාර විභාගයේ දී කුරුණෑගල අධ්යාපන කලාපය මඟින් එම කලාපයේ සිසුන් වෙත ලබා දීම හේතුවෙන් සිසුන් අරත බරපතල නොසන්සුන්තාවයක් ඇතිවීම පිළිබඳව කුරුණෑගල අධ්යාපන කලාපයෙන් වාර්තා වේ.
සිසුන් වාර විභාග ප්රශ්නපත්රය අතට ගත් වහාම පැමිණිලි කර තිබුනේ මේ විභාග ප්රශ්නපත්රයට මින් පෙර තමන් පිළිතුරු ලියා ඇති බව පවසමිනි. පැරණි විභාග ප්රශ්නතපත්ර සඳහා පිළිතුරු ලියා හුරු කිරීම බොහෝ පාසල්වල හා පුද්ගලික උපකාරක පන්තිවල දී සිදුකිරීම සාමාන්ය දෙයක් බව මේ පිළිබඳව කළ විමසීමක දී කුරුණෑගල පාසල් බලධාරීන් පිරිසක් ලංකාසරට පැවසීය.
වාර්තාවන පරිදි සිද්ධිය මෙසේය. මේ දිනවල දිවයිනේ බොහෝ පළාත්වල පාසල් සිසුන් සඳහා වාර පරීක්ෂණ පැවැත්වේ. ඊට සමගාමීව වයඹ පළාතේ ද කලාප මට්ටමින් දෙවන වාර පරීක්ෂණ ය පැවැත්වේ.
ප්රශ්න පත්ර සකස් කර ඇත්තේ කලාප මට්ටමිනි. ඒ අනුව කුරුණෑගල අධ්යාපන කලාපයේ 6-9 ශ්රේණි සඳහා අද දින පැවැත්වෙන්නේ සෞඛ්යය හා ශාරීරික අධ්යාපන විෂයයි.
ඒ විෂය වෙනුවෙන් කුරුණෑගල අධ්යාපන කලාපය මඟින් 8 ශ්රේණිය සඳහා සකස් කල ප්රශ්න පත්ර සිසුන් වෙත බෙදා දෙන ලදී. නමුත් බොහෝ පාසල්වල සිසුන් නොසන්සුන් වූයේ එම ප්රශ්න පත්රය ඔවුන් මීට පිළිතුරු ලියූ එකක් බව පවසමිනි.
ඒ පිළිබඳව සොයා බැලීමේදී දැන ගන්නට ලැබුණේ 2018 වර්ෂයේ වයඹ පළාත මගින් 8 ශ්රේණිය සිසුන් වෙත ලබා දුන් වාර පරීක්ෂණ ප්රශ්න පත්ර ම මෙවර කුරුණෑගල අධ්යාපන කලාපය මඟින් එම කලාපයේ 8 ශ්රේණිය සිසුන් වෙත ලබා දී ඇති බවයි.
අවුරුදු ගණනාවක් හරිහැටි අධ්යාපන ලබා ගැනීමට නොහැකි ව විවිධ ගැටලුවලට මැදි වී සිටි මේ සිසුන්ට සිදුව ඇත්තේ බලවත් අසාධාරණ යක් බවට කුරුණෑගල අධ්යාපන කලාපයේ ගුරුවරු මැසිවිලි නගති.
