ඖෂධ සමාගම වලින් මාසිකව වැටුප් ලබන මාධ්යකරුවන් සිටින බවත් ඒ සම්බන්ධ කරුණු අනාවරණය කර ගැනීමෙන් පසු අපරාධ පරීක්ෂණ දෙපාර්තමේන්තුවට පැමිණිල්ලක් සිදුකර තිබෙන බවත් සෞඛ්ය හා ජනමාධ්ය නියෝජ්ය අමාත්ය වෛද්ය හංසක විජේමුණි පවසයි.
නියෝජ්ය ඇමතිවරයා අද (15) මේ බව පැවසුවේ රජයේ ප්රවෘත්ති දෙපාර්තමේන්තුවේ මහනුවර දිස්ත්රික් කාර්යාලය නිරීක්ෂණයට එක් වූ අවස්ථාවේ දී මාධ්ය අමතමිනි. එහිදි නියෝජ්ය ඇමැතිවරයා මෙසේද පැවසුවේය.
“මෙම මාධ්යවේදීන් තමන් සේවය කරන ආයතනය වෙනුවට සේවය ලබාදෙන ඖෂධ සමාගම් වලින් වැටුප් ලබනවා. මුදල් වෙනුවෙන් මොවුන් නොයෙකුත් සාවද්ය ප්රවෘත්ති සමාජගත කරනවා.”
“මාධ්යවේදීන් ලෙස පෙනී සිටිමින් ඔවුන් සෞඛ්ය අමාත්යාංශයෙන් තොරතුරු ලබාගෙන ඒවා ඒ මොහොතේදීම ඖෂධ සමාගම් නියෝජිතයින් ගේ අතට පත් කරන බව අනාවරණ්ය වුණා. සෞඛ්ය අමාත්යාංශට අභූත චෝදනා එල්ල කරමින් මඩ ගැසීම මොවුන් ගේ එක් කාර්යභාරයක්. මොවුන් ගේ ප්රහාරයනට වැඩිපුර ලක්වන්නේ සෞඛ්ය අමාත්යාංශයේ සිටින නීතියට අනුවම කටයුතු කරන නිලධාරීන් වීම විශේෂයි. ”
“පසුගිය කාලය තුළ ඇතැම් ඖෂධ සමාගම් ඒකාධිකාරයක් පවත්වා ගනිමින් ඖෂධ වර්ග රටට ආනයනය කළා. එය බිඳ දමා සමාගම් කිහිපයකට අදාළ අවස්ථාව ලබාදීමෙන් ඇතැම් ඖෂධවල මිල 200 ගුණයකින් පමණ අඩුකර ගැනීමට හැකි වුණා. ”
“එලෙස රුපියල් 70000 ට සෞඛ්ය අමාත්යාංශය මිලට ගත් ඖෂධයක මිල රුපියල් 370 ක් දක්වා පහත වැටුණා. ඒකාධිකාරයක් පවත්වාගෙන යන ඖෂධ සමාගම් වලින් යැපෙමින් ඇතැම් මාධ්යවේදීන් සිදු කරන ක්රියාව කිසිවෙකුත් අනුමත කරන්නේ නැහැ. ”
“ඒකාධිකාරිය බිඳ දමා සමාගම් කිහිපයකට ඖෂධ ගෙන්වීමේ අවස්ථාව ලබා දී තිබෙනවා. ඉදිරියේ දී සැලකිය යුතු ලෙස මෙරට ඖෂධ ගණනාවක මිල පහත වැටේවි. ජනමාධ්යවලට බලපෑම් කිරීම හෝ පාලනය කිරීම රජයේ අපේක්ෂාව නොවෙයි. රජයට අයත් මාධ්ය ආයතනවලට පවා කිසිදු බලපෑමකින් තොරව නිදහසේ කටයුතු කරන්න අවශ්යය පසුබිම උදාකර දී තිබෙනවා.ජනමාධ්යකරුවන් වෙනුවට වෘත්තිය තත්ත්වයක් ඇති ආචාරධර්ම ගරු කරන ජනමාධ්යවේදීන් රටට අවශ්යය යි. ජනමාධ්ය ආයතන මෙන්ම මාධ්ය සංවිධානද මේ සම්බන්ධයෙන් අවධානය යොමු කළ යුතුයි.”
