ආණ්ඩුවේ සුළු පක්ෂ නායකයින් අද (06) සවස යළිත් වරක් විශේෂ සාකච්ඡාවක් සඳහා බලශක්ති ඇමති උදය ගම්මන්පිලගේ නිවසේ දී හමුවීමට සැලසුම් කර ඇති බව වාර්තා වේ.
කෙරවලපිටිය යුගදනවි බලාගාර ගිවිසුම මුල් කරගෙන මින් පෙර අමාත්ය විමල් වීරවංශ ගේ නිවසේ පැවති සාකච්ඡාවේ දිගුවක් ලෙස මෙම සාකච්ඡා වටය සූදානම් කර ඇතැයි අභ්යන්තර ආරංචි මාර්ග කියයි.
මෙම ගිවිසුමේ අත්තනෝමතික ස්වරූපය පිළිබඳ ජනතා විමුක්ති පෙරමුණේ නායක අනුර කුමාර දිසානායක විසින් සංවාදයට ලක් කිරීමෙන් පසු ආණ්ඩුවේ සුලු පක්ෂ නායකයින් කොමියුනිස්ට් පක්ෂ මූලස්ථානයේ දී විශේෂ සාකච්ඡාවක් පැවැත්වූයේය.
කෙරවලපිටිය එල්.එන්.ජී බලාගාර සංකීර්ණයේ ආයෝජනය සම්බන්ධ ලංකා ආණ්ඩුව සමග අවසන් ගිවිසුමකට එළඹි බව ඇමරිකා එක්සත් ජනපදයේ නිව් ෆෝට්රස් එනර්ජි සමාගම සිය නිල වෙබ් අඩවියේ නිවේදනය කර තිබිණි.
කෙසේ වෙතත් මාධ්ය හමුවේ කරුණු දැක්වූ නව සමසමාජ පක්ෂ නායක, කැබිනට් අමාත්ය වාසුදේව නානායක්කාර ප්රකාශ කළේ අවසන් දේශපාලන තීන්දුවක සම්බන්ධව ප්රකාශ වනතුරු සියලුම ගිවිසුම් කොලකෑලි පමණක් බවය.
