ඉදිරි දින කීපය තුළ දේශපාලකයින් පිරිසකගේ තීරණාත්මක පක්ෂ මාරුවක් සිදුවනු ඇති බවත්, සමගි ජන බලවේගයේ ප්රබල දේශපාලකයින් පිරිසක් කණ්ඩායම් දෙකකින් එක්සත් ජාතික පක්ෂය වෙත එක් වීමත් සමග සිදුකරන ඊලඟ කැබිනට් සංශෝධනයේ දී රටේ වැදගත්ම කැබිනට් ඇමති ධූර කීපයක වගකීම බාරගනු ඇති බවත් රජයේ විශ්වාස කටයුතු ආරංචි මාර්ග සඳහන් කරයි.
ඒ සම්බන්ධව වැදගත් සාකච්ඡාවක් මීට දින දෙකකට පෙර එක්සත් ජාතික පක්ෂයේ ප්රබලයෙකුගේ කොළඹ නිවසේ දී පවත්වා තිබේ.
මේ ආගමනය ගැන ජාතික ජන බලවේගයේ නායක අනුර කුමාර දිසානායක මෙන්ම විපක්ෂ නායක මෙන්ම සමගි ජන බලවේගයේ නායක සජිත් ප්රේමදාස ද ප්රකාශ කර තිබිණි.
විපක්ෂ නායකවරයා පැවසුවේ ඡන්දය තියන්නට සල්ලි නැති බව කියන රජය තම පක්ෂයේ මන්ත්රීවරුන් බිලී බා ගැනීම සඳහා එක් මන්ත්රීවරයෙකුට ලක්ෂ දෙදහසක් දීමට සූදානම්ව ඇති නමුත් කෝටි පනස් දහසකටවත් විකිණෙන මන්ත්රීවරුන් සමගි ජන බලවේගයේ නැති බවය.
කෙසේ වෙතත් ආණ්ඩුවේ ආරංචි මාර්ග පෙන්වා දෙන්නේ පොහොට්ටුවේ බලපෑමෙන් මිදී රජය තුළ ජනාධිපතිවරයා ශක්තිමත් කිරීම සඳහා සමගි ජන බලවේගයෙන් පමණක් නොව, පොහොට්ටුවෙන් ද කණ්ඩායමක් එකතු කරගැනීමට මේ වනවිට අභ්යන්තර මෙහෙයුමක් දියත් වී ඇති බවය.
එම සැලසුම භාර ගෙන ඇත්තේ රනිල් වික්රමසිංහ ජනාධිපතිවරයා කිරීම සඳහා දියත් වූ රහස් මෙහෙයුමේ ප්රධාන භූමිකාව කළ එක්සත් ජාතික පක්ෂ දේශපාලන ප්රබලයෙක් විසින් බව ද දැනගන්නට ඇත.
ඒ අතර ඩේලි මිරර් වාර්තා කළේ ආචාරය හර්ෂ ද සිල්වා, එරාන් වික්රමරත්න, කබීර් හෂීම් ඇතුළු කීප දෙනෙක් ආණ්ඩුවට යෑමට සූදානමින් සිටින බවය.
ඊට ප්රතිචාර දක්වමින් ආචාර්ය හර්ෂ ද සිල්වා ට්විටර් පණිවිඩයක් මගින් ප්රකාශ කළේ ඩේලි මිරර් ප්රකාශය තනිකරම අනුමානයක් මත පදනම් වුන කතාවක් ලෙසය.
ආර්ථික ප්රතිසංස්කරණ අත්යවශ්ය බවත් ජාත්යන්තර මූල්ය අරමුදල (IMF) සමඟ වත්මන් ශ්රී ලංකා සැලැස්ම සමාජ ආරක්ෂණ දැල් කෙරෙහි අවධානය යොමු නොකිරීමත් හැර විපක්ෂයේ සැලැස්මට ආණ්ඩුවේ යෝජනාව සමාන යැයි තමන් කලින් ප්රකාශ කළ බව ඔහු වැඩිදුරටත් පිළිගත්තේය.
“වත්මන් සැලැස්ම මෙන් නොව සමගි ජන බලවේගයේ සැලැස්ම ශක්තිමත් දූෂණ විරෝධී සහ පාලන ව්යුහයන් ඉල්ලා සිටී. “ ඔහු පැවසීය.
පාර්ලිමේන්තු මන්ත්රී හර්ෂ ද සිල්වා වැඩිදුරටත් කියා සිටියේ මෙම රජය වඩාත් ශක්තිමත් නීති සම්පාදනය කරනවා පමණක් නොව එහි ඇති මූලිකම දේ ක්රියාත්මක කරන බවට ජාත්යන්තර මූල්ය අරමුදල සහතික විය යුතු බවයි.
