පළාත් පාලන ආයතනවල නිල කාලය දින නියමයක් නොමැතිව දීර්ඝ කිරීමටත් දැනටමත් විසුරුවා හැර ඇති පළාත් පාලන ආයතන යළි පිහිටුවීමේ ව්යවස්ථා සංශෝධනයක් ගෙන ඒමේ නින්දිත උත්සාහයක ආණ්ඩුව නිරත වන බව ජනතා විමුක්ති පෙරමුණේ ප්රධාන ලේකම් ටිල්වින් සිල්වා මාධ්ය සාකච්ඡාවකදී ඊයේ (29) කියා සිටියේය.
මේ සංශෝධනය අනුව පළාත් පාලන ආයතන කාල සීමාවකින් තොරව දීර්ඝ කිරීමටත් විසුරුණු පළාත් පාලන ආයතන නැවත කැඳවීමටත් ඇමතිවරයාට අත්තනෝමතකි බලතල හිමි වෙතැයිද ඔහු කියා සිටියේය.
ජ නතා විමුක්ති පෙරමුණේ ප්රධාන ලේකම් ටිල්වින් සිල්වා මෙසේද කීවේය.
විසුරුවා හැර තිබෙන පළාත් පාලන ආයතන නැවත කැඳවීම සඳහා ව්යවස්ථා සංශෝධනයකට යාම වෙනුවෙන් ජූනි 23දා පෞද්ගලික මන්ත්රී යෝජනාවක් ලෙස ගැසට් නිවේදනයක් නිකුත් කර තිබෙනවා. කඩිමුඩියේ පළාත් පාලන පනතේ වගන්ති සංශෝධනය කරන්න උත්සාහ කරන්නේ දැනට තිබෙන අවුරුදු හතරක ධුර කාලය විශේෂ තත්වයක් යටතේ මාස 12කින් දීර්ඝ කරන්න ඇමතිවරයාට දී තිබෙන බලතල සම්බන්ධවයි. තිබෙන පනත අනුව එසේ කළ හැකි උපරිම කාලය අවුරුදු 05යි. මේ කියන සංශෝධනය අනුව කාල සීමාවකින් තොරව දීර්ඝ කරන්නත් විසුරුණු පළාත් පාලන ආයතන නැවත කැඳවන්නත් තක්කඩි උත්සාහයක යෙදී ඉන්නවා.
කලින් නම්, ඇමතිවරයාට පළාත් පාලන ආයතනයක් කල්දැමිය හැක්කේ මාස 12යි. මේ පනතේ අඩුම ගණනේ කාලසීමාවක් වත් නැහැ. “අමාත්යවරයා විසින් තීරණය කරනු ලබන යම් කාලසීමාවකට” කියලා දැක්වෙන්නේ. වුවමනානම්, මේ පනත සම්මත කරගෙන ජීවිත කාලයටම වුණත් ඇමතිවරයාගේ තීරණය අනුව කාලය කල්දමා ගන්න පුළුවන්. ඊටත් වඩා බරපතළ දේ විසුරුවා හැරි පළාත් පාලන ආයතන නැවත කැඳවීමේ බලයක් ඇමතිවරයාට දෙන්න සූදානම් වීමයි. 2018 පැවැත්වූ පළාත් පාලනවල නිල කාලය 2022 අවසන් වුණා. පනතට අනුව 2023 මාර්තු දක්වා අවුරුද්දකින් කල් දැමුවා. යැයිද කීවේය.
