දිනසේන රතුගමගේ –
රාමනාදන් අර්චුනා සහ එස්. ඉලංකුමරන් මන්ත්රීවරුන් අතර ඇති වූ බහින් බස් වීමක් පාලනය කර ගැනීමට නොහැකි වීම නිසා යාපනය දිස්ත්රික් සංවර්ධන කමිටු රැස්වීම කල් දැමීමට එහි සභාපතිවරයාට ඊයේ ( 25) සිදුව තිබේ.
යාපනයේ වලිකාමම් පළාතට විදුලිය ලබාදීමේ ප්රශ්නයක් සම්බන්ධයෙන් ජාතික ජන බලවේග පක්ෂයේ යාපනය දිස්ත්රික් පාර්ලිමේන්තු මන්ත්රී එස්.ඉලංකුමරන් කතා කළ අවස්ථාවේදී ඔහුගේ ප්රකාශයන් කීපයක් ගැන අර්චුනා මන්ත්රීවරයා ප්රශ්න කොට තිබේ.
මේ අවස්ථාවේදී ලබා දුන් පිළිතුරු සම්බන්ධයෙන් අර්චුනා මන්ත්රීවරයා සෑහීමකට පත් නොවන බවත් ඉලංකුමරන් මන්ත්රීවරයා ප්රකාශ කරණුයේ අසත්ය ප්රකාශයන් බවත් අර්චුනා මන්ත්රීවරයා කියා සිටිද්දී ඔවුන් දෙදෙනා අතර ඇති වූ බහින් බස්වීම විශාල ගාලගෝට්ටියක් බවට පත්ව ඇත.
මේ අවස්ථාවේදී කමිටුවේ මූලාසනය හෙබ වූ ධීවර අමාත්ය හා ජාතික ජන බලවේග පක්ෂයේ යාපනය දිස්ත්රික් පාර්ලිමේන්තු මන්ත්රී රාමලිංගම් චන්ද්රසේකරන් අමාත්යවරයා දෙදෙනාටම අවවාද කළත් ඒවා පිළිගැනීමට මන්ත්රීවරු දෙදෙනාම එකඟ වී නැත.
මෙහිදී අර්චුනා මන්ත්රීවරයා සභාපතිවරයාට චෝදනා කරමින් ආණ්ඩුවේ පිරිස ආරක්ෂා කිරීමට තමන්ව නිහඬ කරවීම් ආසාධාරණ බව ප්රකාශ කොට තිබේ.
මේ අවස්ථාවේදී කමිටු රැස්වීම පාලනය කර ගැනීමට නොහැකි සභාපතිවරයෙකු යටතේ සාකච්ඡා වලට සහභාගී වීමෙන් පලක් නැති බව කියමින් ඉලංකෙයි තමිල් අරුසු කච්චි පක්ෂයේ නායක හා කිළිනොච්චිය දිස්ත්රික් පාර්ලිමේන්තු මන්ත්රී එස්. ශ්රීධරන් මන්ත්රීවරයා සභාවෙන් පිටව ගොස් තිබේ.
ඒ සමගම කමිටු රැස්වීම පවත්වා ගෙනා යාමට නොහැකි තරමට රැස්වීම් ශාලව තුළ විශාල ගාලගෝට්ටියක් ඇතිවීම නිසා සභාපතිවරයා දින නියමයක් නොමැතිව යාපනය දිස්ත්රික් සංවර්ධන කමිටු රැස්වීම කල් දමා තිබේ.
