ලබන අඟහරුවාදා වනවිට රජය ජාත්යාන්තර මූල්ය අරමුදල හා ඇතිකරගත් එකඟතාව පාර්ලිමේන්තුවට හෙළිදරව් කළ යුතු බවත් එසේ නොකළහොත් තමන් නිශ්චිත තීන්දුවක් ගන්නා බවත් රාජ්ය මුදල් කාරක සභාවේ සභාපති ආචාර්ය හර්ෂ ද සිල්වා අවධාරණය කරයි.
ඔහු පවසන්නේ රාජ්ය මුදල් කාරක සභාවේ සභාපතිවරයා ලෙස තමන්ට මේ රටේ ජනතාවට වගකීමක් ඇති බවය.
අද කොළඹදී පැවති මාධ්ය හමුවක් අමතමින් ආචාර්ය හර්ෂ ද සිල්වා මෙසේ ද පැවසීය.
“ රජය ජාත්යාන්තර මූල්ය අරමුදලත් සමග මාණ්ඩලික එකඟතා ගිවිසුමකට අත්සන් කරලා තියනවා. තවම අපි දන්නෙ නෑ මේ එකඟතාවය මොකක්ද කියලා.“
“ බොහෝම සන්තෝසයට පත් වෙලා ඉන්නවා රජයේ පාර්ශවයන්. අයිඑම්එෆ් එකත් එක්ක ඔවුන්ට හැකිවුනා කියලා මණ්ඩලික එකඟතාවයකට එන්න. මොකක් ද මේකෙ ඇතුළෙ තියෙන්නෙ කියන එක ගැන තවම ජනතාවට කිසිම අවබෝධයක් නෑ.“
ගෝඨාභය රාජපක්ෂ ඇතුළු රාජපක්ෂලගෙ ආණ්ඩුව එකතු වෙලා කරපු විනාශය ඉතා විශාලයි. මුළු ලෝකයම ලංකාවට කියනවා ඔහෙලා පල් හොරු කියලා. රටේ මිනිස්සුන්ගේ සල්ලි ඔහෙලා හොරකම් කරලා කියලා.
දූෂණය නවත්වන්න මොනවද කරන වැඩපිළිවෙළ. අලුත් නීති ගේන්න වෙයි. හොරකම් කළ මිනිස්සුන්ට දඬුවම් දෙන්න වෙයි. නමුත් දඬුවම් දෙන්න පුලුවන් ද රනිල් වික්රමසිංහ ජනාධිපතිවරයාට. ඒක තමයි අපි කිව්වෙ කොහාගෙයි කපුටගෙයි කතාව. දඬුවම් දෙන්න රනිල් වික්රමසිංහ ලෑස්ති වෙනකොට කාක්කො ටික ඉන්න දෙන්නෙ නෑ.
මේක ජාත්යාන්තරයට ගිහින් තියන කොන්දේසියක්. පිටරවල මුදල් හංගලා තියනවා නම් ගිහිල්ලා ගේන්න කියලා මේක කියන්නෙ . එහෙම නැතිව මල් මාලා දාලා පිලිඅරන් මේක කරන්න බෑ.
මම කියන්නෙ මෙතන වෙලා තියන්නෙ කොලේ වහලා ගැහිල්ලක්. කිසි කෙනෙක් දන්නෙ නෑ මොකද වෙන්නෙ කියලා. ජනාධිපතිවරයා දන්නවා. කැබිනට් එක දන්නවා. පාර්ලිමේන්තුවට මේක ඉදිරිපත් කරලා නෑ.
අඟහරුවාදට මේක ඉදිරිපත් කළේ නැතිනම් රාජ්ය මුදල් කාරක සභාවේ සභාපතිවරයා ලෙස මම තීරණ වගයක් ගන්නවා. ඒක මෙතන කියන්න මා ලෑස්ති නෑ… නමුත් මට වගකීමක් තියනවා මේ රටේ මිනිස්සු වෙනුවෙන්.
