ජනාධිපති අනුර කුමාර දිසානායකගේ විශේෂ ආරාධනයකට අනුව මෙරට නිල රාජ්ය සංචාරයක නිරත වන මාලදිවයින් ජනාධිපති ආචාර්ය මොහමද් මුයිසු පිළිගැනීමේ නිල උත්සවය අද (04) පෙරවරුවේ ජනාධිපති කාර්යාල පරිශ්රයේදී ඉතා උත්කර්ෂවත් අන්දමින් පැවැත්විණි.
මෙම රාජ්ය සංචාරයේ ප්රධානතම අරමුණ වන්නේ ඉන්දියන් සාගර කලාපයේ සමීපතම අසල්වැසියන් වන මාලදිවයින සහ ශ්රී ලංකාව අතර පවතින ආර්ථික, සංස්කෘතික සහ සමාජයීය සබඳතා නව මානයන් ඔස්සේ පුළුල් කර ගැනීමය. විශේෂයෙන්ම දෙරට අතර පවතින බහුවිධ හවුල්කාරිත්වය තවදුරටත් ශක්තිමත් කරමින් කලාපීය සහයෝගීතාවය වර්ධනය කර ගැනීමට මෙම සංචාරය හරහා අපේක්ෂා කෙරේ.
මාලදිවයින් ජනාධිපති ආචාර්ය මොහමද් මුයිසු සහ එරට ජනාධිපති ආර්යාව වන සජිදා මොහොමඩ් ජනාධිපති කාර්යාල පරිශ්රය වෙත පැමිණෙන විට ඔවුන්ව පොලිස් අශ්වාරෝහක බලකාය පෙරටු කරගත් විශේෂ රථ පෙළපාලියකින් කැඳවාගෙන එනු ලැබීය. එහිදී ජනාධිපති අනුර කුමාර දිසානායක විසින් ඔවුන් ඉතා සුහදශීලීව සහ ගෞරවාන්විතව පිළිගනු ලැබූ අතර, එම අවස්ථාව මහත් හරසරින් පිරී තිබිණි.
උත්සවයේ ආරම්භය සනිටුහන් කරමින් දෙරටේම ජාතික ගී වාදනය කෙරුණු අතර, ඉන් අනතුරුව මාලදිවයින් ජනාධිපතිවරයා වෙත පූර්ණ රාජ්ය ගෞරව සහිතව සම්මාන වෙඩිමුර 21 ක් පවත්වමින් සිය ගෞරවාචාරය පුද කිරීමට ශ්රී ලංකා රජය කටයුතු කළේය.
පසුව මාලදිවයින් ජනාධිපතිවරයා විසින් ශ්රී ලංකා සන්නද්ධ හමුදා නියෝජනය කළ සම්මාන ආචාර පෙළපාලියේ ගෞරවය ද පිළිගන්නා ලදී. මෙම උත්සව අවස්ථාවේදී රාජ්ය නායකයන් දෙපළ අන්යෝන්ය වශයෙන් සිය රාජ්ය නියෝජිත කණ්ඩායම් හඳුන්වා දීම ද සිදු කෙරිණි.
මෙහි විශේෂ අවස්ථාවක් ලෙස මාලදිවයින් ජනාධිපතිවරයා විසින් ජනාධිපති කාර්යාලයේ තැන්පත් කර ඇති විශේෂ අමුත්තන්ගේ සමරු පොතෙහි සමරු සටහනක් තබමින් මෙම ඓතිහාසික සංචාරය සනිටුහන් කළේය.
මෙම අවස්ථාවට මාලදිවයින් රජය නියෝජනය කරමින් ඉහළ පෙළේ දූත පිරිසක් සහභාගී වූ අතර, ඒ අතර විදේශ කටයුතු අමාත්ය ඉර්තිෂාම් ආදම් (Iruthisham Adam), ආර්ථික සංවර්ධන, ප්රවාහන සහ වෙළඳ අමාත්ය මොහොමඩ් සයීඩ් (Mohamed Saeed), ධීවර, කෘෂිකර්ම සහ සාගර සම්පත් අමාත්ය අහ්මඩ් ෂියාම් (Ahmed Shiyam), රාජ්ය ආරක්ෂක, කම්කරු සහ තාක්ෂණ අමාත්ය අලි ඉහුසාන් (Ali Ihusaan) සහ ජනාධිපති කාර්ය මණ්ඩල ප්රධානී අබ්දුල්ලා ෆයාස් (Abdulla Fayaz) ඇතුළු පිරිසක් වූහ. මීට අමතරව විදේශ සබඳතා පිළිබඳ ජනාධිපති ප්රධාන ලේකම් මොහොමඩ් නසීර්, රජයේ ප්රධාන ප්රකාශක මොහොමඩ් හුසේන් ෂරීෆ් සහ ශ්රී ලංකාවේ මාලදිවයින් මහ කොමසාරිස් මසූඩ් ඉමාද් ද මෙම අවස්ථාවට එක්ව සිටියහ.
ශ්රී ලංකා රජය නියෝජනය කරමින් විදේශ කටයුතු, විදේශ රැකියා හා සංචාරක අමාත්ය විජිත හේරත්, කම්කරු අමාත්ය සහ මුදල් හා ක්රමසම්පාදන නියෝජ්ය අමාත්ය අනිල් ජයන්ත ප්රනාන්දු, විද්යා හා තාක්ෂණ අමාත්ය ක්රිෂාන්ත අබේසේන, නියෝජ්ය කතානායක රිස්වි සාලි සහ ජනාධිපති ලේකම් ආචාර්ය නන්දික සනත් කුමානායක යන නිලධාරීහු සහභාගී වූහ. තවද, ආරක්ෂක අමාත්යාංශයේ ලේකම් එයාර් වයිස් මාර්ෂල් (විශ්රාමික) සම්පත් තුයියකොන්තා, විදේශ කටයුතු අමාත්යාංශයේ අතිරේක ලේකම් එම්. ආර්. කේ ලෙනගල සහ මාලදිවයින්හි ශ්රී ලංකා මහ කොමසාරිස් මොහොමඩ් රිස්වි හසන් ද මෙම නිල පිළිගැනීමේ උත්සවයට එක්ව සිටියහ.
