විනිසුරුවරුන්ගේ විශ්රාම වයස දීර්ඝ කිරීම සම්බන්ධයෙන් රජය මේ වන තෙක් කිසිදු නිල තීරණයක් ගෙන නොමැති බව අධිකරණ හා ජාතික ඒකාබද්ධතා කටයුතු අමාත්ය හර්ෂණ නානායක්කාර අද (11) පාර්ලිමේන්තුවේ දී ප්රකාශ කළේය.
අමාත්යවරයා මේ බව කියා සිටියේ ශ්රී ලංකා නීතිඥ සංගමයේ විරෝධතාවයක් ද උපුටා දක්වමින්, විපක්ෂ නායක සජිත් ප්රේමදාස ස්ථාවර නියෝග 27/2 යටතේ මතු කළ ප්රශ්නයකට පිළිතුරු ලබා දෙමිනි.
එහිදී වැඩිදුරටත් කරුණු පැහැදිලි කළ අමාත්යවරයා මෙසේ ද පැවසීය.
“අප යම් විදේශ රටවල් අරන් බැලුවොත් එංගලන්තයේ විශ්රාම වයස 75යි, කැනඩාවේ ෆෙඩරල් සහ සුපිරීයර් කෝට් 75යි, ඔස්ට්රේලියාවේ ෆෙඩරල් නම් 70යි, බ්රසීලය වගේ රටක් ගත්තොත් විශ්රාම වයස 75ක්, ජර්මනිය වගේ රටක් බැලුවොත් අවුරුදු 68ක්.”
“ඒ නිසා විනිසුරුවන්ගේ සහ අධිකරණ නිලධාරීන්ගේ විශ්රාම යන වයස දීර්ඝ කිරීම සම්බන්ධයෙන් එය තහවුරු කරමින් හොඳ පියවරක් බවට ආණ්ඩුවේ කරුණු ඉදිරිපත් කරමින් පවතිනවා. ඒ වගේම විපක්ෂ නායකවරයා කියපු ආකාරයට මේ ආකාරයේ අයුක්තියක්, අසාධාරණයක්, යුක්තිය ඉෂ්ඨ කිරීමේ ක්රියාවලියට බාධාවක් සහ අධිකරණයේ ස්වාධීනත්වයට බාධාවක් ලෙස තවත් පාර්ශවයක් විසින් කරුණු ඉදිරිපත් කරමින් සිටිනවා.”
“ඒ සියලුම කරුණු අපි සලකා බලමින් සිටිනවා. නමුත් මේ දක්වා නිල වශයෙන් විශ්රාම වයස දීර්ඝ කිරීම සඳහා කැබිනට් තීන්දුවක් අරගෙන නෑ. එහෙම දීර්ඝ කරනවා නම් කොහොමද දීර්ඝ කරන්නේ කියලා කිසිවක් තීන්දු කරලා නෑ.”
