ඉරානයේ බලශක්ති යටිතල පහසුකම් ඉලක්ක කර එල්ල වූ ප්රහාරවලින් හානි වූ තෙල් පිරිපහදු සහ බෙදාහැරීමේ මධ්යස්ථානවලින් 70%ත් 80%ත් අතර ප්රමාණයක් ඉදිරි මාස දෙක ඇතුළත යථා තත්ත්වයට පත් කිරීමට අපේක්ෂා කරන බව ඉරාන තෙල් අමාත්යාංශයේ නියෝජ්ය අමාත්ය මොහමඩ් සදෙක් අසිමිෆාර් උපුටා දක්වමින් විදෙස් මාධ්ය වාර්තා කරයි.
ඉරාන තෙල් අමාත්යාංශයේ නියෝජ්ය අමාත්ය මොහමඩ් සදෙක් අසිමිෆාර් (Mohammad Sadeq Azimifar) විසින් Student News Network වෙත අදහස් දක්වමින් කියා ඇත්තේ අදාළ අලුත්වැඩියා කටයුතු මේ වන විටත් ආරම්භ කර ඇති බවය. විශේෂයෙන්ම සතුරු ප්රහාරයට ලක් වූ ලවාන් (Lavan) තෙල් පිරිපහදුවේ කටයුතු ඉදිරි දින දහය ඇතුළත අර්ධ වශයෙන් ආරම්භ කිරීමට සැලසුම් කර ඇති බව හෙතෙම සඳහන් කර ඇත.
2026 ඉරාන යුද ගැටුම්වල කොටසක් ලෙස එල්ල වූ මෙම ප්රහාර හේතුවෙන් ඉරානයේ බලශක්ති ක්ෂේත්රයට දැඩි බලපෑම් එල්ල විය. අප්රේල් 8 වැනිදා සතුරු ප්රහාරයකට ලක් වූ ලවාන් පිරිපහදුව දිනකට තෙල් බැරල් 55,000ක ධාරිතාවයකින් යුක්ත වූවකි.
මීට අමතරව ෂහීඩ් ඩොලටි (Shahid Dolati) සහ ෂාර්-ඊ රේ (Shahr-e Rey) වැනි තෙල් ගබඩා මධ්යස්ථානවලට ද චන්ද්රිකා ඡායාරූප මගින් තහවුරු කළ හැකි මට්ටමේ විශාල හානි සිදුව ඇති බව වාර්තා වේ.
ඉරානයේ ප්රධාන තෙල් නිෂ්පාදන සහ අපනයන මධ්යස්ථානයක් වන ඛාර්ග් දූපත (Kharg Island) ද මීට පෙර අවස්ථාවලදී ප්රහාරයන්ට ලක් විය. 2025 දත්ත අනුව දිනකට තෙල් බැරල් මිලියන 2.4ක ධාරිතාවක් සහිත පිරිපහදු 10කට අධික සංඛ්යාවක් ඉරානය සතු වූ අතර, වත්මන් හානිය හේතුවෙන් එරට අභ්යන්තර ඉන්ධන සැපයුමට මෙන්ම ගෝලීය තෙල් මිල ඉහළ යාමට ද එය සෘජුව බලපා ඇත.
කෙසේ වෙතත්, හානි වූ උපකරණ ප්රතිස්ථාපනය කරමින් සහ සුන්බුන් ඉවත් කරමින් ඉතා කඩිනමින් පිරිපහදු ඒකක යළි ක්රියාත්මක කිරීමට බලධාරීන් කටයුතු කරමින් සිටින බව නියෝජ්ය අමාත්යවරයා වැඩිදුරටත් අවධාරණය කළේය.
