2022 වසරේ ගාලු මුවදොර ‘ගෝඨා ගෝ ගම’ සාමකාමී අරගලයට එල්ල වූ ප්රහාරය සම්බන්ධයෙන් හිටපු පොලිස්පති දේශබන්දු තෙන්නකෝන්ට එරෙහිව මාසයක් ඇතුළත අධිචෝදනා ගොනු කිරීමට අපේක්ෂා කරන බව නීතිපතිවරයා ශ්රේෂ්ඨාධිකරණයට දැනුම් දී තිබේ.
අදාළ සිදුවීමේ සැකකරුවකු ලෙස හිටපු පොලිස්පතිවරයා නම් කරමින් අපරාධ පරීක්ෂණ දෙපාර්තමේන්තුව වෙත නීතිපතිවරයා යොමු කළ ලිපියක් බලරහිත කිරීමට අභියාචනාධිකරණය මීට පෙර තීන්දුවක් ලබා දී තිබුණි. එම තීන්දුවට එරෙහිව නීතිපතිවරයා ඉදිරිපත් කළ අභියාචනා පෙත්සමක් ඊයේ (25) කැඳවූ අවස්ථාවේදී මෙම ප්රකාශය සිදු කෙරුණි.
ඒ.එච්.එම්.ඩී. නවාස්, අචල වෙංගප්පුලි සහ සම්පත් විජේරත්න යන ත්රිපුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ මෙම අභියාචනා පෙත්සම සලකා බලන ලදී.
එහිදී නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජෙනරාල් සුහර්ෂි හේරත් අධිකරණය හමුවේ කියා සිටියේ වගඋත්තරකාර දේශබන්දු තෙන්නකෝන්ට එරෙහිව අධිචෝදනා ඉදිරිපත් කිරීමට පියවර ගන්නා බවය. එහිදී විනිසුරු මඩුල්ලේ සභාපති විනිසුරු නවාස් නැගූ ප්රශ්නයකට පිළිතුරු දෙමින් නියෝජ්ය සොලිසිටර් ජනරාල්වරිය සඳහන් කළේ ඒ සඳහා මාසයක කාලයක් ගතවනු ඇති බවය.
කෙසේ වෙතත් දේශබන්දු තෙන්නකෝන් වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා අධිකරණයට පෙන්වා දුන්නේ තම සේවාදායකයාට එරෙහිව අධිචෝදනා ගොනු කරන්නේ නම් මෙම නඩුකරය තවදුරටත් පවත්වාගෙන යාම ඵලක් නොවන බවය.
දෙපාර්ශවයේම කරුණු සලකා බැලූ ත්රිපුද්ගල විනිසුරු මඩුල්ල පෙත්සම සලකා බැලීම එළඹෙන සැප්තැම්බර් මස 2 වනදා දක්වා කල් තැබීමට නියෝග කළේය.
