තුෂාරී කළුබෝවිල –
උතුරු අන්දමන් මුහුද සහ දකුණු අන්දමන් මුහුද ආශ්රිත සහ ගිණිකොණ දිග බෙංගාල බොක්ක ආශ්රිත ව පවතින අඩු පීඩන කලාපය සුළි කුණාටුවක් දක්වා වර්ධනය විය හැකි බවට අනතුරු ඇඟවේ.
එසේ හෙයින් ඉදිරි දින කිහිපයේ එකී මුහුදු ප්රදේශවල ධීවර හා නාවික කටයුතු අවධානම් බව කාලගුණ විද්යා දෙපාර්තමේන්තුව නිවේදනය කරයි.
දැනට පවතින පීඩන කලාපය එම ස්ථානයෙන් බටහිර-වයඹ දෙසට ගමන් කර ඔක්තෝබර් 22 වනදා වනවිට එම මුහුදු කලාපය තුළ ම පීඩන අවපාතයක් දක්වා වර්ධනය වෙමින් ඔක්තෝබර් 23 වැනිදා වනවිට ගැඹුරු පීඩන අවපාතයක් දක්වාත්, ඔක්තෝබර් 24 වන විට සුළි කුණාටුවක් දක්වාත් තීව්ර වීමට හැකි බව කාලගුණ විද්යා දෙපාර්තමේන්තුව පවසයි.
අනතුරුව එය ක්රමයෙන් උතුරු-ඊසාණ දෙසට ගමන් කර ඔක්තෝබර් 25 වන දින බටහිර බෙංගාල වෙරළ ආසන්නයට ළඟා වනු ඇතැයි ඔවුහූ පවසති.
උතුරු අක්ෂාංශ 05 ත් 17 ත් සහ නැගෙනහිර දේශාංශ 85 සහ 100 ත් අතර මුහුදු ප්රදේශවල සුළඟේ වේගය
පැ.කි.මී. 40-50 අතර ද එය විටින් විට පැ.කි.මී. 60-70 දක්වා ද වැඩිවිය හැකි බැවින් එකී මුහුදු ප්රදේශ ඉතා රළු වන අතර තද වැසි හෝ ගිගුරුම් සහිත වැසි ද ඇතිවිය හැකි බව අවධාරණය කෙරේ.
මෙම තත්ත්වය යටතේ තවදුරටත් දිවයිනේ බොහෝ ප්රදේශවලට අඩු වැඩි වශයෙන් වැසි ඇති වේ.
