සෙනසුරාදා ප්රචාරක රැලියක් අතරතුර ඩොනල්ඩ් ට්රම්ප් ඝාතනය කිරීමේ ප්රයත්නයක් දියත් විය. ඔහුගේ කනට වෙඩි වැදී තිබිණි. ඔහුගේ ජීවිතය බේරී තිබුණේ අනූ නවයෙනි.
රිපබ්ලිකන් ජනාධිපති අපේක්ෂකයාගේ මුහුණේ ලේ වැගිරීමක් විය. ඔහු වෙඩි පහරත් සමග බිම ඇදවැටුනේය. රැළියට එක් වී සිටි මිනිස්සු ඒ වෙඩි ප්රහාරයත් සමග දැඩි කම්පනයකට පත් වූහ.
ට්රම්ප්ගේ ආරක්ෂක නිලධාරීහු ඔහුව වටකොට ගෙන ආවරණය කරගනිමින් පිටතට රැගෙන එනු පෙනුණි. පිටතට පැමිණි ට්රම්ප් සිය හස්ථය ඉහළට ඔසවා ජනතාවට දැක්වීමට පෙර මහ හඬින් හඬ ගෑවේය.
” සටන් කරන්න… සටන් කරන්න… සටන් කරන්න…”
සිදුවූයේ කුමක් ද?
ෆෙඩරල් විමර්ශන කාර්යාංශය ඩොනල්ඩ් ට්රම්ප්ට ඝාතන තැත ගැන මේ වනවිට පුළුල් විමර්ශන ආරම්භ කර සිටිති. ට්රම්ප් ට වෙඩි ප්රහාරය එල්ල වූයේ පෙන්සල්වේනියාවේ බට්ලර්හි මැතිවරණ රැළියක් අමතමින් සිටියදී ය.
රිපබ්ලිකන් නීති සම්පාදකයින් පවසා තිබුණේ ස්නයිපර් කරුවෙක් රහස් සේවා නියෝජිතයන් මගහැර ඩොනල්ඩ් ට්රම්ප් කතා කරමින් සිටි ස්ථානයට නුදුරින් පිහිටි ගොඩනැගිල්ලක වහලය මතට නැග මෙම ප්රහාරය එල්ල කර ඇති බවය. ප්රහාරකයා රහස් ඔත්තු සේවා සාමාජිකයෙක් විසින් වෙඩි තබා ඝාතනය කර තිබිණි.
සිද්ධිය පිළිබඳ තොරතුරු තවමත් විරලය. මුල් මාධ්ය වාර්තා පැවසුවේ වෙඩික්කරු පෙන්සිල්වේනියාවේ බට්ලර් හි මැතිවරණ රැලිය පිහිටි ස්ථානයේ ආරක්ෂක සීමාවෙන් පිටත සිටි බවය.
බීබීසීය විසින් සම්මුඛ සාකච්ඡාවට ලක් කළ එක් අයෙක් පවසා තිබුණේ තමන් දුටු ස්නයිපර්කරුවා ගැන පොලිසියට සහ රහස් ඔත්තු සේවයට දැනුම් දීමට උත්සාහ කළත් සිද්ධිය වැළැක්විය නොහැකි වූ බවය.
” මම දැක්කා මිනිහා වහලය උඩ ඉන්නවා. මම නිලධාරියෙකුට කිව්වා ඔහු එතන ඉන්නවා කියලා. එයා ඔහුව හොයන්න ගියා” බීබීසි සමග සම්මුඛ සාකච්ඡාවකට එක් වූ මාසර් නැමැති වෑද්දුම් කරුවෙක් පවසා තිබිණි.
සිද්ධිය පිළිබඳ සමාජ මධ්ය තුළ ද සංවාදයක් ඇති වෙමින් තිබිණි. “සම්පූර්ණ රයිෆල් කට්ටලයක් සහිත ස්නයිපර්වරයෙකුට ජනාධිපති අපේක්ෂකයෙකුට ආසන්නතම වහලය මතට රිංගා ගැනීමට ඉඩ ලැබුනේ කෙසේද” මිනිස්සු විමසා සිටියහ.
එෆ්බීඅයි කියන්නේ කුමක් ද?
එෆ්බීඅයි පිට්ස්බර්ග් ක්ෂේත්ර කාර්යාලය භාර විශේෂ නියෝජිත කෙවින් රොජෙක් පැවසුවේ එෆ්.බී.අයි තවමත් වෙඩික්කරු හඳුනා ගෙන නැති බවය. මෙම වෙඩි තැබීමේ සිද්ධියෙන් එක් අයෙකු මිය ගොස් දෙදෙනෙකුට තුවාල සිදු වී තිබිණි. මිය ගොස් තිබුණේ ඝාතනයට උත්සාහ කළ ස්නයිපර් කරුය.
- රාජ්ය නීතිය ක්රියාත්මක කරන නිලධාරීන්ට අනුව
ඔවුන් තවමත් මෙම වෙඩි ප්රහාරය එල්ල කිරීම පසුපස ඇති චේතනාව කුමක්දැයි හඳුනාගෙන නැත. - එක් සැකකටයුතු වෙඩික්කරුවෙකු සිටී. ඔහු පිරිමි අයෙකි. ඔහු මරා දමා ඇත. ඔහු කවරෙක් දැයි මේ වනතුරු බලධාරීන් විසින් හඳුනාගෙන නොමැත. තවත් දෙදෙනෙක් තුවාල ලබා ඇත. ඔවුන් වැඩිහිටි පිරිමිය. තුවාල ලද එක් පුද්ගලයෙක් ඩොන්ල්ඩ් ට්රම්ප් ය.
- වෙඩි තැබීමේ සිද්ධිය හුදකලා සිදුවීමකි., සිද්ධියෙන් අනතුරුව එහි වෙනත් තර්ජනයක් නැත.
- මෙම වෙඩි තැබීම සිදුකළ ආයුධය හඳුනාගෙන ඇත. ඔවුන්ගේ ප්රමුඛතාවය වන්නේ ඩොලන්ල්ඩ් ට්රම්ප් ඝාතන තැතෙහි චේතනාවක් හඳුනා ගැනීමය මාස ගණනක් පරීක්ෂණ පැවැත්වෙනු ඇති බව විමර්ශකයෝ කියති.
ට්රම්ප් මේ වනවිට ප්රතිකාර ලබා ආරක්ෂිතව පිටවී ගොස් ඇතැයි විදෙස් මාධ්ය වාර්තා සඳහන් කරයි.
