එංගලන්තය පහසු ලකුණු 26ක ජයග්රහණයක් වාර්තා කළේය. කාසියේ වාසිය වැඩක් වුනේම නැත. ලකුණු 164ක් හඹා ගිය ශ්රී ලංකා කණ්ඩායම පන්දු ඕවර 20 ක්රීඩා කළේ නැත. පන්දු ඕවර 19ක් තුළ ලකුණු 137කට සියල්ලෝ දැවී ගියහ.
ඊයේ (01) සාජාහි පැවති තරගයෙන් පසු ලංකාවේ ක්රීඩා ලෝලීන්ගේ ප්රාර්ථනා සුන් වී ඇත. දැන් අවසන් පූර්ව වටයට යෑමේ බලාපොරොත්තුවත් ඉවරය.
කාසියේ වාසිය දිනා ශ්රී ලංකාව මුලින්ම පන්දු රැකීම තේරුවේය. පන්දුවට පහර දුන් එංගලන්ත කණ්ඩායම කඩුලු 04කට ලකුණු 163ක් ලබාගෙන ලකුණු 164ක ඉලක්කයක් ශ්රි ලංකා කණ්ඩායමට ලබා දුන්නේය.
පන්දු ඕවර පහයි පන්දු දෙක්ක අවසන් වනවිට එංගලන්ත පිලේ කඩුලු 3ක් බිඳ වැටී තිබිණි. ලබාගෙන තිබුණේ ලකුණු 35කි. එහෙත් තරගයක ස්වරූපය වෙනස් කරන ආකාරය එංගලන්තය පෙන්නුවේය. සිවුවන කඩුල්ලට ජොස් බට්ලර් සහ නායක ඉයන් මෝර්ගන් ලකුණු 112ක සම්බන්ධතාවයක් ගොඩනැගුවේය.
බිඳවැටී තිබූ එංගලන්ත ඉනිම පුදුමාකාර ජවයකින් යුතුව ගොඩගැනීමට ජොස් බට්ලර් සමත් වූ අයුරු වෘත්තීය ක්රීඩාවක ස්වරූපය පෙන්වා දුන්නේය. ලකුණු 95 දී ඔහු ලබා දුන් උඩපන්දුව පැතුම් නිශ්ශංක අතින් ගිලිහිනි. ජොස් බට්ලර් පන්දු 67කදී ලකුණු 101ක් රැස් කළේය. ඒ ඉනිමේ අවසාන පන්දුවට හයේ පහරක් එල්ල කරමිනි. .
වනිදු හසරංගට ජේසන් රෝයි සහ ජොනි බිස්ට්රොව් ගොදුරු වුනේය. එක් අන්තයක පන්දු යැවීම ආරම්භ කළ වනිඳු හසරංග තමන් යැවූ දෙවන පන්දුවෙන් ජේසන් රෝයි දවා ගත්තේය. හතරවන ඕවරයේ අවසන් පන්දුවේ දී දුෂ්මන්ත චමීර ඩේවිඩ් මිලර්ගේ කඩුල්ල ලබා ගත්තේය. පස්වෙනි ඕවරයේ දෙවැනි පන්දුවේ දී ජොනි බ්රිසෝව් වනිඳුට ගොදුරු විය. ශ්රී ලංකා කණ්ඩාය දවාගත් සිවුන කඩුල්ල වූ ඉයන් මෝර්ගන් දවා ගත්තේත් වනිඳු හසරංගය. ඒ වනවිට මොර්ගන් පන්දු 36ක දී ලකුණු 40ක් ලබාගෙන තිබිණි.
වනිඳු ඕවර හතර අවසානයේ ලකුණු 21කට කඩුළු 03ක් බිඳ හෙළුවේය. එක් කඩුල්ලක් ලබා ගත් දුෂ්මන්ත චමීර පන්දු ඕවර හතර අවසානයේ දී ලකුණු 44ක් ලබා දී තිබිණි.
විශිෂ්ට පන්දු යැවීමක් මහීෂ් තීක්ෂණගෙන් ද දක්නට ලැබිණි. ඔහු කඩුලු නොලැබුවත් පන්දු ඕවර 4ටම ලබා දුන්නේ ලකුණු 13කි.
පන්දුවට පහර දෙන්නට පැමිණි ශ්රී ලංකා කණ්ඩායම එංගලන්ත පන්දු යවන්නන් හමුවේ මුලුමනින්ම අසරණ වූයේය.
ඉනිමේ දුවද්දී දැවී යෑම් දෙකකි. පළමු කඩුල්ල ලෙස පැතුම් නිශ්ශංක එක් ලකුණක් ලබා සිටිද්දී දුවද්දී දැවී ගියේය. දසුන් ශානකත් දැවී ගියේ දුවද්දීය.
යළිත් කුසල් ජනිත් අසාර්ථකය. ඔහු ලකුණු 07කි. චරිත් අසලංක සුපුරුදු වේගවත් පිතිකරණයේ යෙදුනේය. පන්දු 16ක දී ලකුණු 21කට දැවී ගියේය. පහළට ඇද දැමූ අවිශ්ක ප්රනාන්දුගේ රිද්මය ඉතා අවාසනාවන්ත ලෙස බිඳ වැටී ඇති අයුරු යළිත් දැක ගත හැකි විය. ඔහු ලකුණු 13කි. භානුක රාජපක්ෂ පන්දු 18ක දී ලකුණු 26ක් ද දසුන් ශානක පන්දු 25ක දී ලකුණු 26ක් ද රැස් කළහ
හොඳම පන්දු යැවීම මෙන්ම හොඳම ඉනිම ක්රීඩා කළේත් වනිඳු හසරංගය. ඔහු පන්දු 21 තුළ ලකුණු 34ක් රැස් කළේය. මොයින් අලි පන්දු ඕවර 03ක් යවා ලකුණු 15ට කඩුලු 2ක්, ක්රිස් වොකර්ස් පන්දු ඕවර 2.3ක් යවා කඩුල්ලක්, ආදිල් රෂිඩ් පන්දු ඕවර 4ක් යවා ලකුණු 19ට කඩුලු 02ක්, ලියම් ලිවින්ග්සටන් පන්දු ඕවර 4ක් යවා ලකුණු 34ට කඩුල්ලක් ලබා ගත්තේය.
