මැතිව්ස් ඊයේ ජාතියෙන් සමාව ගත්තේය. ජාතියේ අභිමානය වෙනුවෙන් අද නෙදර්ලන්තය සමග තරග වදින බව කීවේය. ඉකුත් තරග දෙකේදීම වගකීම් අත්හළ පිතිකරුවෝ සිය ඩියුටිය කළහ. නෙදර්ලන්තයට ලැබුණු ජයග්රාහී ඉලක්කය ලකුණු 202කි. මේ ලෝක කුසලාන තරගාවලියේ ශ්රි ලංකා කණ්ඩායම ලකුණු සංඛ්යාවක් වාර්තා කළ තරගය මෙයය. ශ්රී ලංකා පන්දු යවන්නෝ නෙදර්ලන්ත කණ්ඩායම ලකුණු 118කට සීමා කළහ. ඒ පන්දු ඕවර 16.4ක දී සියලු දෙනා දවා ගනිමිනි. ශ්රී ලංකා කණ්ඩායම නෙදර්ලන්තය පරදවා ලකුණු 83කින් දිනුම්ය. නෙදර්ලන්ත ශ්රී ලංකා තරගයක දී මෙතෙක් වැඩිම ලකුණු ගණනක් වාර්තා වන්නේත් මේ තරගයේ දීය. කණ්ඩායම් දෙකම ලකුණු 319ක් රැස් කරගෙන තිබිණි.
ක්රිකට් වගකීම ජාතික වගකීමක් බව තේරුම් ගැනීමට අහසේ පාවෙමින් සිටි තරුවලට වැටහෙන්නට බිමට ඇද වැටී කොන්ද බිඳෙන තුරු ඉඳින්නට සිදුවිය. ලෝක මට්ටමේ ඇති විශිෂ්ට පුද්ගල දක්ෂතා සමූහයක් සහිත ක්රීඩකයින්ගෙන් සමන්විත ශ්රි ලංකා කණ්ඩායම මේ තරගාවලියේ මුල් වරට කණ්ඩායමක් ලෙස ක්රීඩා කළ ආකාරය දුටුවේ අදය.
අවාසනාවකට ඒ වනවිට පෙරහර ගොස් හමාරය. අද පැවති ශ්රී ලංකා නෙදර්ලන්ත ලෝක කුසලාන ප්රදර්ශන තරගය නැරඹීමට ද ශ්රී ලාංකිකයන් පැමිණ සිටි අයුරු පෙනුනි. එහෙත් මහා ප්රේක්ෂාගාර මුලුමනින්ම පාහේ හිස්ය. කෙසේ වෙතත් අපේ අවසන් තරගය වී තිබුණේ ඩී ඛාණ්ඩයේ අන්තිමයා ලෙස නේපාලයට පහළින් තරගය නිමා නොකිරීමය. එය සාර්ථක වී ඇත. අප තරගාවලිය නිමා කරන්නේ ඩී ඛාණ්ඩයේ තුන්වැනියා ලෙසය. නෙදර්ලන්තය හා නේපාලය අපට පහළිනි.
තරග හතරෙන් තරග හතරම ජයග්රහණය කර දකුණු අප්රිකාව සහ තරග තුනක් ජයග්රහණය කළ බංගලාදේශය සුපිරි අට දෙනාගේ වටයට තේරෙන විට අප ඊලඟ ෆ්ලයිට් එකෙන් ගෙදර එන්නේය.
ඒ ඛාණ්ඩයෙන් ඉන්දියාව සහ ඇමරිකා එක්සත් ජනපද කණ්ඩායම සුපිරි අට දෙනාටය. පකිස්ථානය අප මෙන්ම එළියේය.
බී ඛාණ්ඩයෙන් ඔස්ට්රේලියාව සහ එංගලන්තය අපේක්ෂා කළ ලෙසම සුපිරි අට දෙනාට තේරී තිබේ.
සී ඛාණ්ඩයේ ඇෆ්ගනිස්ථානය සහ බටහිර ඉන්දීය කොදෙව් කණ්ඩායම් සුපිරි 08 ආසන්නයේ ය. නවසීලන්ත කණ්ඩායමත් අප වගේම සුපිරි අටෙන් විසිවී ඇත.
අද නෙදර්ලන්තය සමග ශ්රී ලංකාව තරග වැදුනේ බටහිර ඉන්දීය කොදෙව් දූපත්වල සෙන්ට් ලුසියාහි ඩැරන් සමී ජාත්යාන්තර ක්රිකට් ක්රීඩාංගනයේ ය. ඇමරිකාවේ දී මෙන් නොව ලැබී තිබුනේ සුපුරුදු තණ තීරුය.
කාසියේ වාසිය දිනූ නෙදර්ලන්ත කණ්ඩායම පන්දු රැකීම තේරුවේය. පැතුම් නිශ්ශංක දෙවැනි පන්දුවේ දීම ලකුණු නොලබා දැවී ගියත් කුසල් මෙන්ඩිස් ලකුණු පන්දු 29ක දී හතරේ පහර 05ක් සමග ලකුණු 46ක්, ධනංජය ද සිල්වා පන්දු 26ක දී හතරේ පහර තුනක් සහ එක්හයේ පහරක් සමග ලකුණු 34ක්, චරිත් අසලංක පන්දු 21ක දී හයේ පහර 05ක් සහ හතරේ පහරක් සමග ලකුණු 46ක්, ඈන්ජලෝ මැතිව්ස් පන්දු 15ක දී හතරේ පහරක් සහ හයේ පහර දෙකක් සමග නොදැවී ලකුණු 30ක්, වනිඳු හසරංග හයේ පහර දෙකක් සහ හතරේ පහරක් සමග පන්දු 06ක දී නොදැවී ලකුණු 20ක් ලැබුවේය.
දසුන් ශානක තමන්ගේ සියවැනි විස්සයි 20 තරගයේ දී වාර්තාවක් තැබුවේය. ඒ විස්සයි විස්ස තරග රටාවේ ශ්රී ලංකාව නියෝජනය කරමින් වැඩිම වාර ගණනක් ලකුණු නොලබා දැවී ගිය ක්රීඩාකයා ලෙසය. දැන් ඒ තැන දසුන් ශානකටය. ඔහු ඉනිම 92ක් ක්රීඩා කර ඉනිම 11ක ලකුණු නොලබා දැවී ගොස් ඇත. මීට කලින් මෙම වාර්තාව හිමි කරගෙන හිටියේ දැන් ක්රිකට් පොර ටෝක් දෙන ටිඑම් ඩිල්ෂාන්ය. ඩිල්හාන් ඩිල්ෂාන් තරග 80ක් ක්රීඩා කර ඉනිම 79ක දී 10 වරක් ලකුණු නොලබා දැවී ගොස් තිබිණි.
පන්දු යැවීමේ දී ලොගන් වැන් බීක් ලකුණු 45ට කඩුළු 02ක් ලැබුවේය. විවියන් කින්ග්මා, ආර්යන් දත්, පෝල් වැන් මිකෙරෙන්, ටිම් පින්ගල් කඩුල්ල බැගින් ලැබූහ. අන්තර්ජාතික විචාරකයන්ගේ මහත් ඇගයීමට ලක් වුන පන්දු රැකිම් කීපයක් ද නෙදර්ලන්ත කන්ඩායමෙන් ප්රදර්ශනය විය.
පිළිතුරු ඉනිම ක්රිඩා කිරීමට පැමිණි නෙදරලන්ත කණ්ඩායම කදිම ආරම්භයක් ලබා ගත්තේය. පළමු කඩුල්ල බිඳවැටෙන්නේ පස්වන ඕවරයේ 3වැනි පන්දුවේ දීය. ඒ වනවිට ඔවුන් ලකුණු 45කි. මිචෙල් ලෙවිට් හයේ පහර තුනක් සහ හතරේ පහර දෙකක් සමග පන්දු 23ක දි ලකුණු 31ක් ලැබුවේය. නායක ස්කොට් එඩ්වඩ් මැද පෙළ රැඳෙමින් පන්දු 24ක දි ලකුණු 31ක් ලැබුවේය. අනෙක් එක් පිතිකරුවෙක්වත් ශ්රී ලංකා පන්දු යවන්නන් ඉදිරියේ සාර්ථක වූයේ නැත.
පන්දු යැවීමේ දී නුවන් තුෂාර පන්දු ඕවර 3.4ක් තුළ ලකුණු 24කට කඩුළු 03ක් ලැබුවේය. මතීෂ පතිරණ පන්දු ඕවර 3ක් තුළ ලකුණු 12කට කඩුළු 02කි. වනිඳු හසරංග ලකුණු 25ට කඩුළු 02කි. මහීෂ් තීක්ෂණ සහ දසුන් ශානක කඩුල්ල බැගින් ලැබූහ. තරගයේ වීරයා චරිත් අසලංකය.
නෙදර්ලන්ත කණ්ඩායම ලකුණු 118කට සියල්ලෝ දැවී ගියහ. ඒ ක්රීඩා කිරීම සඳහා තවත් පන්දු 20ක් ඉතිරිව තිබිය දී ය.
