කොළඹ අහස අවසානයේදී තීන්දුව ලබා දුන්නේය. පන්දුවාර 20යි විස්ස ලෝක කුසලාන තරගාවලියේ සුපිරි 8 දෙනාගේ වටයේ සමාරම්භක තරගය වූ පකිස්ථානය සහ නවසීලන්තය අතර අද (21) පැවැත්වීමට සැලසුම් කළ තරගය නිල වශයෙන් අත්හැර දැමීමට විනිසුරුවරු තීරණය කළහ.
කාලගුණික තත්ත්වයන්හි වෙනසක් අපේක්ෂාවෙන් නිල ආරම්භක වේලාවේ සිට පැය දෙකකට වැඩි කාලයක් නිලධාරීන් බලා සිටියේය. එහෙත් කාසියේ වාසිය උරගා බැලීමෙන් අනතුරුව ආරම්භ වූ වර්ෂාව තුරල් නොවූ අතර එක දිගටම එකම ආකාරයකින් පැවතියේය.
කාසියේ වාසිය ලබා ගැනීමේ කාලය ළඟා වන විට වැසි ඇද හැලීමට ආසන්නව තිබිණි. පෙර දිනයේ ද මේ ආකාරයේම වර්ෂාවක් විය. එම වර්ෂාව හේතුවෙන් පාකිස්තානයට සිය සන්ධ්යා පුහුණු සැසිය ද අවලංගු කිරීමට සිදුවිය.
කෙසේ වෙතත් කාසියේ වාසිය උරගා බැලීමෙන් පසු කාසියේ වාසිය දිනාගත් සල්මන් ආගා පළමුවෙන් පන්දුවට පහර දීමට තීරණය කළේය. අනතුරුව දෙදෙනා නායකයින් කතා කරමින් සිටියදී පොද වැස්සක් ආරම්භ වූ අතර, ක්රීඩාංගනයේ කාර්ය මණ්ඩලය ආවරණ ස්ථානගත කිරීමට පටන් ගත්හ.
වර්ෂාව හේතුවෙන් අත්හැර දැමූ තරගයේ දී දෙපිලටම ප්රසාද ලකුණු බැගින් හිමි වූයේය. .ජයග්රහණයක් වෙනුවෙන් සටන් වැදීමට බලාපොරොත්තුවෙන් සිටි පකිස්ථාන කණ්ඩායමට දැන් සිදු වී ඇත්තේ හෙට පැවැත්වෙන තීරණාත්මක තරග ද්විත්වය දෙස අවධානය යොමු කරමින් සිය සැලසුම් නැවත සකස් කර ගැනීමටය.
ක්රිකට් ලෝලීන්ගේ දැඩි උනන්දුවට ලක්ව ඇති හෙට සවස 3 ට මහනුවර පල්ලෙකැලේ ක්රීඩාංගණයේදී ශ්රී ලංකාව සහ එංගලන්තය අතර සටන දිග හැරේ.
හෙට රාත්රි 07ට අහමදාබාද්හිදී පැවැත්වෙන ඉන්දියාව සහ දකුණු අප්රිකාව අතර තරගය දෙස ලෝකයේ වඩාත් වැඩි අවධානයක් යොමු වී තිබේ. එම තරගය මෙම වටයේ වඩාත්ම උණුසුම් මුහුණුවරක් ගනු ඇතැයි අපේක්ෂිතය.
පාකිස්තානය පෙබරවාරි 24 දා එංගලන්තය සමගත්, 28 වැනිදා ශ්රී ලංකාව සමගත් තරඟ වදින අතර, නවසීලන්තය 25 වැනිදා ශ්රී ලංකාව සමඟත්, 27 වැනිදා එංගලන්තය සමඟත් තරඟ වදිනු ඇත. මෙම කාණ්ඩයේ සියලුම තරඟ ශ්රී ලංකාවේදී පැවැත්වේ.
