ඉඳුනිල් කහටපිටිය –
එංගලන්ත කණ්ඩායම කඩුළු 05ක පහසු ජයක් සහිතව දෙවැනි එක් දින තරගය නිමා කළේය. ඒ පිට පිට පරාජය වූ එක්දින තරග 05ක් සහිත අවාසනාවන්ත අපගමනයට තිත තබමිනි. දැන් තරගාවලියේ කණ්ඩායම් දෙක 1-1 ලෙස සම තැනය.
පන්දු යවන්නන් විඩාවට පත් කරන දැඩි ප්රහාරක පිතිකරණ රටාවක් සමග එංගලන්තය ටෙස්ට් ක්රිකට් ක්රීඩාව මුල් කරගෙන දියත් කරමින් අත් හදා බැලු Bazball ක්රිකට් රටාව දකුණු ආසියාතික තණතීරුවලට ගලපා ගන්නට එංගන්ත කණ්ඩායම උත්සාහ කළේ ශ්රි ලංකාවේදී ය. ඒ විස්සයි 20 ලෝක කුසලානයට සති තුනක් නුදුරේ හිඳිමිනි. පළමු තරගයේ දී එම උත්සාහය සාර්ථක වූයේ නැත. මුල් තරගයේ දී ඛෙත්තාරාම ක්රීඩාංගනයේ මන්දගාමී තණතීරුවේ දී ශ්රි ලංකාව අභිබවන්නට එංගලන්ත කණ්ඩායමට හැකි වූයේ නැත.
අද දෙවැනි තරගය ය. ඒ තරගයත් ආර්. ප්රේමදාස ක්රීඩාංගනයේ ය. එංගලන්තය මුලුමනින්ම සිය තරග රටාව වෙනස් කළේය. කණ්ඩායමේ පන්දු යවන්නට හැකි හැම දඟ පන්දු යවන්නාම කැඳෙව්වේය. දඟ පන්දු යවන්නන් 06කි. වේග පන්දු යවන ආරම්භක පන්දු යවන්නන් වන ජෙමී ඕවර්ටන් සහ සෑම් කරන්ට ලබා දුන්නේ පන්දු ඕවර 09ක් පමණි. ඕවර්ටන් එක් නිලකුණු ඕවරයක් සමග පන්දු ඕවර 5ක් යවා ලකුනු 21කට කඩුළු 02ක් ලබා තිබුණද ඔහුට ඉන් පසු තරගයේ කිසිම අවස්ථාවක පන්දුව ලැබුනේ නැත. සෑම් කරන්ටත් එසේය. ඔහු යැව්වේ පන්දු ඕවර 04ක පමණි. ලකුණු ලබා දුන්නේ 16කි. අවසානයේ කණ්ඩායමේ 08 දෙනෙක් පන්දු යැවූහ. කඩුළු රකින ජෝ රූට් හැරුණු විට පන්දු යැවීමෙන් වැලකී සිටියේ නායක හැරී බෲක් සහ බෙන් ඩකර්ට් පමණි.
ආරම්භක පන්දු යවන්නන් දෙදෙනාගේ පන්දු ඕවර 9න් පසු ඉතිරි පන්දු ඕවර 40 යි පන්දු 3ම යැව්වේ දඟ පන්දු යවන්නන්ය. මේ මන්දගාමී දඟ පන්දුවලට එරෙහිව සීමා ඉරෙන් එපිටට පහරක් ගසා ගන්නට අපේ ක්රීඩකයින් දඟලන දැඟලිල්ලට දුක හිතුනේය. ශ්රී ලංකා ඉනිමේ දී මුලු ඉනිමටම එල්ල වී තිබුණේ එක් හයේ පහරක් පමණි. ඒ හය ගැහුවේ පැතුම් නිශ්ශංකය. හයේ පහර ගහන්න ගිය අනෙක් සියලුම ක්රිඩකයෝ උඩපන්දු ලබා දී දැවී ගියහ. ශ්රි ලංකා පිතිකරුවන් මුලුමනින්ම එංගලන්ත දඟ පන්දු යවන්නන්ගේ ග්රහණයේ සිටියේය.
එක් පිතිකරුවෙකුට හෝ හරි ඉනිමක් ක්රිඩා කිරීමට බැරිවිය. හැමෝම ගැහුවේ බාග ඉනිම් ය. එක් අර්ධ ශතකයක්වත් නැත. වැඩිම ලකුණ ගණන චරිත් අසලංක ගැසු ලකුණු 45 ය. ධනංජය ද සිල්වා ලකුණු 40කි. පවන් රත්නායක 29කි. පැතුම් නිශ්ශංක සහ කුසල් මෙන්ඩිස් 26 බැගිනි. දුනිත් වෙල්ලාලගේ ලකුණු 20කි. සියල්ලන්ම ලකුණු 219කට දැවී ගියේය.
මුලින් කී ලෙස එංගලන්ත කණඩායමේ 08 දෙනෙක් පන්දු යැවූහ. ආරම්භක වේග පන්දු යවන්නන් දෙදෙනා හැරෙන්නට දඟ පන්දු යැවූ ලියම් ඩේව්සන්, විල් ජැක්, රෙහාන් අහමඩ් කඩුල්ල බැගින් ලැබූහ. නිත්ය දඟ පන්දු යවන අඩිල් රෂීඩ් කඩුළු 02ක් ලැබුවේය. ජෝ රූට් කඩුලු 02කි.
එංගන්ත පිතිකරණය –
අප දුටුවේ ලකුණු 220ක ජයග්රාහී ඉලක්කයක් හඹා යන එංගලන්ත කණඩායම තමන් පුහුණු කළ ටෙස්ට් තරගවල ආක්රමණශීලී ක්රීඩා රටාව එක්දින තරගය වෙත ආදේශ කරගන්නා ආකාරය ය. ලකුණු 20 දි රෙහාන් අහමඩ් ලකුණු 13කට දැවි ගිය පසු බෙන් ඩකර්ට් සහ ජෝ රූට් අතරත්, ජෝ රූට් සහ නායක හැරී බූක් අතරත් ඇතිවුන සම්බන්ධතාවය එංගලන්ත කණ්ඩායමේ පිතිකරණ ප්රමිතිය කියා පෑවේය.
බෙන් ඩකට් ලකුණු 39ක් ලැබුවේය. ඒ පන්දු 52කදී ය. ජෝ රූට් පිතිකරණ බලඇනියේ කොඳු නාරටිය වී පන්දු 90ක දී ලකුණු 75ක් ලැබුවේය. නායක හැරී බූක් ලකුණු 42ක් ලැබුවේ පන්දු 75ක දි ය. මේ එකම ක්රීඩකයෙකුට හෝ හදිස්සියක් තිබුණේ නැත. අත පොවන දුරක ඇති දිනුම ඩැහැ ගන්නට හදිස්සියක් එංගලන්ත කණ්ඩායමට තිබුණේ නැත.
එමෙන්ම ශ්රි ලංකා දඟ පන්දු යවන්නන් මේ තරගයේ දී මුලුමනින්ම පාහේ එංගලන්ත ක්රීඩකයින්ට නතු වූයේය. එංගලන්ත පිතිකරුවන් අද පිටියට පැමිණ තිබුණේ අපේ දඟ පන්දු ගැන නිශ්චිත අධ්යයනයක් කර බව ඔවුන්ගේ පිතිකරණයෙන් පැහැදිලි වූයේය. මුල් තරගයේ සිදුකළ බොහෝ වැරදි එංගලන්ත කණ්ඩායම මුලුමනින්ම පාහේ මගහරවාගෙන තිබිණි.
අවසානයේ දී සුපුරුදු ප්රවේගකාරී පිතිකරණයත් සමග ජොස් බට්ලර් පන්දු 21 දී ලකුණු 33ක් ලබාගෙන තරගය නිමා කළේය. ඒ පන්දු 20ක් ඉතිරිව තිබියදී ය.
තරගයේ වීරයා ජෝ රූට් ය. තරගාවලි ජයග්රහණය පිළිබඳ තීන්දුව ලබන තරගයට කල් ගොස් ඇත්තේය.
