කටුනායක බණ්ඩාරනායක ජාත්යන්තර ගුවන්තොටුපොළින් ඊයේ රාත්රීයේ ඕස්ට්රේලියාවේ සිඩ්නි නුවර බලා ගමන් ආරම්භ කළ ශ්රීලන්කන් ගුවන් සේවයට අයත් යානයක් අකුණු සැර වැදීමක් හේතුවෙන් යළි කටුනායක ගුවන්තොටුපොළ වෙත හදිසියේ ගොඩබස්වා තිබේ.
මෙසේ හදිසි ගොඩබෑමකට ලක් කර ඇත්තේ ඊයේ රාත්රී කටුනායකින් පිටත් වූ යූ.එල්. 606 (UL 606) දරණ ගුවන් යානයයි.
ගුවන් යානය මෙරට ගුවන් සීමාවෙන් නික්ම යාමට පෙර ඉහළ අහසේදී එක් එන්ජිමකට සෘජුවම අකුණු සැර වැදී ඇති අතර, පියාසර කාර්ය මණ්ඩලය විසින් වහාම ක්රියාත්මක වී ආරක්ෂිත පියවරක් ලෙස යානය යළි හරවා කටුනායක වෙත ගොඩබෑමට පියවර ගෙන ඇත. ගුවන් යානා තාක්ෂණික ඉංජිනේරුවන් පවසන්නේ මෙලෙස අකුණු සැර වැදීමෙන් යානයේ එක් එන්ජිමක බාහිර කොටස්වලට සුළු හානි සිදුව ඇති බවයි.
කෙසේ වෙතත්, අදාළ සිදුවීමෙන් යානයේ ගමන් ගත් මගීන් කිසිවෙකුට හෝ කාර්ය මණ්ඩලයට කිසිදු අනතුරක් සිදුව නොමැති බව ශ්රීලන්කන් ගුවන් සමාගමේ ප්රකාශකයෙක් තහවුරු කළේය.
ගොඩබෑමෙන් පසු යානයේ සිටි මගීන් පිරිස වෙනත් විකල්ප ගුවන් යානයක් වෙත මාරු කිරීමට පියවර ගත් අතර, පවතින මෙහෙයුම් අවශ්යතා මත එම යානය සිඩ්නි නුවර වෙනුවට ඕස්ට්රේලියාවේ මෙල්බර්න් නුවර බලා පිටත් කර හැරීමට ගුවන් සමාගම කටයුතු කර තිබේ. මෙම හදිසි තත්ත්වය හේතුවෙන් මගීන්ගේ ගුවන් ගමන පැය 5කට අධික කාලයක් ප්රමාද වී ඇත.
අකුණු සැර වැදීමට ලක්වූ යානය මේ වන විට කටුනායක ගුවන්තොටුපොළේ ඉංජිනේරු අංශය වෙත යොමු කර ඇති අතර, එහි පූර්ණ තාක්ෂණික පරීක්ෂණ සහ අලුත්වැඩියා කටයුතු ආරම්භ කර තිබේ.
