ලලිත් චාමින්ද –
ලෝක වෙළෙඳපොළේ පොහොර මිල ශීඝ්රයෙන් ඉහළ යෑම හේතුවෙන්, මෙරට පොහොර ආනයන වියදම කැපී පෙනෙන ලෙස ඉහළ ගොස් ඇති බවත්, පසුගිය 2025 වසරේ අප්රේල් මාසයට සාපේක්ෂව මෙම වසරේ (2026) අප්රේල් මාසයේදී පොහොර ආනයන වියදමේ වැඩි වීම සියයට 213.6 ක් බවත් මහ බැංකුව පවසයි.
මහබැංකු වාර්තාවලට අනුව 2025 අප්රේල් මාසයේදී පොහොර ආනයනය සඳහා වැය වී ඇත්තේ ඇමෙරිකානු ඩොලර් මිලියන 12.7කි. එහෙත් මෙම වසරේ අප්රේල් මාසය වන විට එම වියදම ඇමෙරිකානු ඩොලර් මිලියන 39.7ක් දක්වා ඉහළ ගොස් ඇත.
මුල් මාස 4 තුළ වියදම
මෙම වසරේ මුල් මාස හතර (ජනවාරි – අප්රේල්) සැලකීමේදී පොහොර ආනයනය සඳහා සමස්තයක් ලෙස ඇමෙරිකානු ඩොලර් මිලියන 67.8ක මුදලක් වැය වී තිබේ. එය 2025 වසරේ මුල් මාස හතරට සාපේක්ෂව සියයට 5.9ක වැඩිවීමකි.
ගොවීන් සහ රජය අතර මතගැටුම
මේ අතර, වගා කටයුතු සඳහා වෙළෙඳපොළ තුළ ප්රමාණවත් පරිදි පොහොර නොමැති බවත්, පවතින පොහොර මිල අධික බවත් ගොවි සංවිධාන චෝදනා කරති. විශේෂයෙන්ම වී වගාව සඳහා අවශ්ය පොහොර සොයාගැනීමේ දුෂ්කරතා පවතින බව ඔවුහු පෙන්වා දෙති.
කෙසේ වෙතත්, කෘෂිකර්ම අමාත්යාංශය මෙම චෝදනා ප්රතික්ෂේප කරයි. අමාත්යාංශය අවධාරණය කරන්නේ රට තුළ කිසිදු පොහොර හිඟයක් නොමැති බවය. එමෙන්ම ගොවිජන සේවා මධ්යස්ථාන මගින් යුරියා පොහොර මිටියක් රුපියල් 10,200ක ස්ථාවර මිලකට මිලදී ගැනීමට ගොවීන්ට අවශ්ය පහසුකම් සලසා ඇති බවද කෘෂිකර්ම අමාත්යාංශය වැඩිදුරටත් සඳහන් කරයි.
