හිටපු පාර්ලිමේන්තු මන්ත්රී සජින් වාස් ගුණවර්ධන අද (09) උදෑසන අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අත්අඩංගුවට ගත්තේය.
අතාර්කික ලෙස උපයාගත් බව කියන රුපියල් මිලියන 243.8 ක දේපළ හා වත්කම් සම්බන්ධයෙන් සිදුකෙරෙන විමර්ශනයකට අදාළව ප්රකාශයක් ලබා දීම සඳහා ඔහු අද පෙරවරුවේ කොළඹ පිහිටි අල්ලස් කොමිසම වෙත පැමිණි අවස්ථාවේදී මෙලෙස අත්අඩංගුවට ගෙන තිබිණි.
රුපියල් මිලියන 243.8 ක පමණ වටිනාකමකින් යුත් නීතිවිරෝධී වත්කම් රැස් කිරීමට අදාල විමර්ශන සඳහා ස්වේච්ඡාවෙන් ප්රකාශයක් ලබා දීමට පැමිණි අවස්ථාවේදී මෙම අත්අඩංගුවට ගැනීම සිදුවී තිබිණි.
මීට පෙරද මන්ත්රීවරයාට එරෙහිව මිහින් ලංකා ගුවන් සේවයේ සිදුවූ රුපියල් මිලියන 883 ක මූල්ය අක්රමිකතා සහ වත්කම් බැරකම් ප්රකාශ ඉදිරිපත් නොකිරීම සම්බන්ධයෙන් චෝදනා එල්ලවූයේය.
හිටපු ජනාධිපති මහින්ද රාජපක්ෂගේ සමීපතම හිතවතෙකු මෙන්ම විදේශ කටයුතු අමාත්යාංශයේ හිටපු අධීක්ෂණ මන්ත්රීවරයා ලෙස කටයුතු කළ සජින් වාස් ගුණවර්ධන මීට පෙර අධිකරණය හමුවේ විභාග වූ නඩු කිහිපයකින් නිදහස් කර තිබුණද, 2025 වසරේදී අභියාචනාධිකරණය මගින් එම නඩු නැවත විභාග කරන ලෙස නියෝග කර තිබුණි.
අත්අඩංගුවට ගත් හිටපු මන්ත්රීවරයා අද දිනයේදී අධිකරණයට ඉදිරිපත් කිරීමට නියමිත අතර, එහිදී ඔහු රක්ෂිත බන්ධනාගාර ගත කරන්නේද නැතහොත් ඇප මත මුදා හරින්නේද යන්න තීරණය වනු ඇත.
