-
රුසියානු ඉතිහාසයේ තෙල් අපනයනයට සිදුවුන ධරුණුම ප්රහාරය මෙය බව ජාත්යාන්තර මාධ්ය වාර්තා කරයි…
යුක්රේනය එල්ල කරන අඛණ්ඩ ඩ්රෝන ප්රහාර, ප්රධාන නල මාර්ගවලට එල්ල වූ බාධා සහ තෙල් නැව් අත්අඩංගුවට පත්වීම හේතුවෙන් රුසියාවේ තෙල් අපනයන ධාරිතාවෙන් 40%ක් පමණ මේ වන විට ඇනහිට ඇති බව රොයිටර් පුවත් සේවය වාර්තා කරයි. වෙළඳපල දත්ත විශ්ලේෂණය කරමින් ඔවුන් පෙන්වා දෙන්නේ මෙය රුසියානු ඉතිහාසයේ එරට තෙල් සැපයුමට එල්ල වූ දරුණුතම බාධාව බවයි.
ඉරාන යුදමය වාතාවරණය හමුවේ ලෝක වෙළඳපලේ බොරතෙල් බැරලයක මිල ඩොලර් 100 සීමාව ඉක්මවා ගොස් ඇති මොහොතක, ලොව දෙවන විශාලතම තෙල් අපනයනකරුවා වන රුසියාවට මෙම තත්ත්වය දැඩි ආර්ථික බලපෑමක් එල්ල කර තිබේ.
රුසියාවේ ඩොලර් ට්රිලියන 2.6ක් වන දැවැන්ත ආර්ථිකයේ සහ ජාතික අයවැයේ ප්රධානතම ආදායම් මාර්ගය වන්නේ තෙල් නිෂ්පාදනයයි.
යුක්රේන ප්රහාර දැඩි වෙයි
මෙම මාසය තුළ රුසියාවේ තෙල් හා ඉන්ධන අපනයන යටිතල පහසුකම් ඉලක්ක කරගනිමින් යුක්රේනය සිය ඩ්රෝන ප්රහාර දැඩි කර ඇත. කළු මුහුදේ නොවරොසිස්ක් (Novorossiysk) වරාය මෙන්ම බෝල්ටික් මුහුදේ ප්රිමෝර්ස්ක් (Primorsk) සහ උස්ට්-ලුගා (Ust-Luga) යන රුසියාවේ ප්රධාන බටහිර අපනයන වරායන් තුනටම මෙම ප්රහාර එල්ල වී තිබේ.
රොයිටර් ගණනය කිරීම්වලට අනුව, බදාදා වන විට රුසියාවේ බොරතෙල් අපනයන ධාරිතාවෙන් දිනකට බැරල් මිලියන 2ක් පමණ අහිමි වී ඇත. මෙයට යුක්රේනය හරහා හංගේරියාව සහ ස්ලෝවැකියාව දක්වා දිවෙන ‘ඩ්රුෂ්බා’ (Druzhba) නල මාර්ගය අඩාල වීම ද ඇතුළත් ය.
රුසියාවේ රාජ්ය අයවැයෙන් හතරෙන් එකක් පමණ උපයනු ලබන තෙල් හා ගෑස් ආදායම අඩාල කිරීම සහ ඔවුන්ගේ යුද ශක්තිය දුර්වල කිරීම සිය අරමුණ බව කිව් (Kyiv) පාලනය පවසයි. රුසියාව මෙම ප්රහාර ‘ත්රස්ත ප්රහාර’ ලෙස හඳුන්වන අතර සිය ආරක්ෂක පියවර දැඩි කිරීමට පියවර ගෙන ඇත.
වරාය සහ ප්රවාහන බාධා
ජනවාරි අග භාගයේදී එල්ල වූ රුසියානු ප්රහාරවලින් ඩ්රුෂ්බා නල මාර්ගයේ කොටසකට හානි වූ බව යුක්රේනය පවසන අතර, සැපයුම වහාම යථා තත්ත්වයට පත් කරන ලෙස ස්ලෝවැකියාව සහ හංගේරියාව ඉල්ලා තිබේ. මීට අමතරව, නොවරොසිස්ක් තෙල් පර්යන්තයේ කටයුතු ද ඩ්රෝන ප්රහාර හේතුවෙන් සැලසුම් කළ ප්රමාණයට වඩා පහළ මට්ටමක පවතී.
යුරෝපයේදී රුසියාවට සම්බන්ධ තෙල් නැව් නිතර අත්අඩංගුවට පත්වීම හේතුවෙන් මර්මන්ස්ක් (Murmansk) වරායෙන් සිදුවන ආක්ටික් තෙල් අපනයනයට ද දිනකට බැරල් 300,000ක පමණ බාධාවක් එල්ල වී ඇත.
ආසියානු වෙළඳපල කෙරෙහි අවධානය
බටහිර අපනයන මාර්ග අවහිර වීමත් සමඟ මොස්කව් පාලනයට ආසියානු වෙළඳපල කෙරෙහි වැඩි වශයෙන් විශ්වාසය තැබීමට සිදු වී ඇතත්, එම මාර්ගවල පවතින සීමිත ධාරිතාව හේතුවෙන් ගැටලු මතුව තිබේ.
කෙසේ වෙතත්, චීනය වෙත නල මාර්ග හරහා සිදුවන සැපයුම් සහ කොස්මිනෝ (Kozmino) වරාය හරහා සිදුවන මුහුදු මාර්ග අපනයන අඛණ්ඩව ක්රියාත්මක වේ. මෙම මාර්ග ඔස්සේ දිනකට තෙල් බැරල් මිලියන 1.9ක් පමණ අපනයනය කෙරේ.
මීට අමතරව සකාලින් (Sakhalin) ව්යාපෘතියෙන් දිනකට බැරල් 250,000ක් සහ බෙලරුස් රාජ්යයේ පිරිපහදු සඳහා දිනකට බැරල් 300,000ක් පමණ රුසියාව විසින් අඛණ්ඩව සපයනු ලබයි. (රොයිටර්)
