2019 වසරේ අප්රේල් 21 වනදා එල්ල වූ පාස්කු ඉරිදා මරාගෙන මැරෙන ත්රස්ත ප්රහාරය වළක්වා ගැනීමට පියවර නොගැනීම සම්බන්ධයෙන් සාපරාධී පැහැර හැරීම් ඇතුළු චෝදනා එල්ල වී සිටින හිටපු පොලිස්පති පූජිත් ජයසුන්දර, විත්ති කූඩුවේ සිට සිදුකළ ප්රකාශයට අලුතින් කරුණු ඇතුළත් කිරීමට කළ ඉල්ලීම කොළඹ මහාධිකරණ විනිසුරු මඩුල්ල අද (24) ප්රතික්ෂේප කළේය.
ප්රියන්ත ලියනගේ, විරාජ් වීරසූරිය සහ තිලකරත්න බණ්ඩාර යන ත්රිපුද්ගල මහාධිකරණ විනිසුරු මඩුල්ල හමුවේ මෙම නඩුව විභාගයට ගැනුණි.
පාස්කු ප්රහාරය එල්ල වන බවට බුද්ධි අංශ මගින් නිශ්චිත තොරතුරු ලබා දී තිබියදීත්, එම ප්රහාරය වළක්වා ගැනීමට අවශ්ය පියවර නොගැනීමෙන් මහා විනාශයක් සිදුවීමට ඉඩ හැරීම මෙන්ම රාජකාරිය පැහැර හැරීම සම්බන්ධයෙන් නීතිපතිවරයා විසින් පූජිත් ජයසුන්දරට එරෙහිව මෙම නඩුව ගොනු කර ඇත.
නීතීඥවරයාගේ තර්කය
විත්තිකාර පූජිත් ජයසුන්දර වෙනුවෙන් පෙනී සිටි නීතීඥ රොෂාන් දෙහිවල අධිකරණයට දන්වා සිටියේ, සිය සේවාදායකයා මීට පෙර විත්ති කූඩුවේ සිට ප්රකාශයක් ලබා දීමේදී අතපසුවීමකින් කරුණු දෙකක් මඟ හැරී ඇති බවය. එම කරුණු දෙක නැවත අධිකරණය හමුවේ තැබීමට අවසර දෙන ලෙස ඔහු ඉල්ලා සිටියේය.
මෙහිදී සභාපති විනිසුරු ප්රියන්ත ලියනගේ අවධාරණය කළේ නීතිමය ප්රතිපාදන අනුව විත්තිකරුවෙකුට විත්ති කූඩුවේ සිට ප්රකාශයක් සිදු කිරීමට අවසර ලැබෙන්නේ එක් අවස්ථාවකදී පමණක් බවය.
නීතිපති පාර්ශවයේ විරෝධය
අතිරේක සොලිසිටර් ජනරාල් දිලීප් පීරිස් මේ සම්බන්ධයෙන් දැඩි විරෝධය පළ කරමින් කියා සිටියේ, විත්තිකරුවෙකුට තමන් කැමති පරිදි වරින් වර විත්ති කූඩුවේ ප්රකාශයට කරුණු එකතු කිරීමට ඉඩ දුනහොත් එය නරක පූර්වාදර්ශයක් වන බවය. එමෙන්ම පවතින නීතියට අනුව වරක් සිදුකළ ප්රකාශයක් යාවත්කාලීන කිරීමට හෝ අලුතින් කරුණු එක් කිරීමට අවසරයක් නොමැති බවද ඔහු පෙන්වා දුන්නේය.
ඉදිරිපත් වූ කරුණු සලකා බැලූ ත්රිපුද්ගල විනිසුරු මඩුල්ල එම ඉල්ලීම නිශ්ප්රභ කළ අතර, නඩුව නැවත මැයි මස 22 වනදා කැඳවීමට නියම කළේය.
