මීගමුව බන්ධනාගාරය තුළ මෑතකදී හටගත් බරපතළ නොසන්සුන්කාරී තත්ත්වය සහ ඉන් සිදු වූ ජීවිත හානි සම්බන්ධයෙන් පාර්ලිමේන්තුවේ දැඩි අවධානය යොමු කිරීම සඳහා හදිසි කල්තැබීමේ විවාදයක් ලබාදෙන ලෙස විපක්ෂයේ මන්ත්රීවරුන් පිරිසක් කථානායකවරයාගෙන් ඉල්ලීමක් කර තිබේ.
පසුගිය ජූලි මස 5 සහ 6 යන දෙදින තුළ මීගමුව බන්ධනාගාරය තුළ ඇති වූ දරුණු ගැටුම් හේතුවෙන් පුද්ගලයන් 26 දෙනෙකු ජීවිතක්ෂයට පත්ව ඇති අතර, 100කට අධික පිරිසක් තුවාල ලබා ඇතැයි විපක්ෂය පෙන්වා දෙයි. මෙම සමස්ත විනාශයේ, මරණ සහ තුවාල සිදුවීම්වල සම්පූර්ණ වගකීම වත්මන් ආණ්ඩුව භාරගත යුතු බව ද ඔවුහු අවධාරණය කරති.
සිද්ධියේ ඇති බරපතළකම මෙන්ම මෙහි ඇති හදිසි ස්වභාවය සැලකිල්ලට ගෙන මෙම විවාදය වහාම ලබාදෙන ලෙස ඉල්ලමින් කථානායකවරයා වෙත විශේෂ ලිපියක් යොමු කර ඇත. මෙම ලිපිය සඳහා විපක්ෂ නායක සජිත් ප්රේමදාස, සර්ව ජනබලයේ නායක දිලිත් ජයවීර මෙන්ම රංජිත් මද්දුම බණ්ඩාර, කබීර් හෂීම්, සුජීව සේනසිංහ, කින්ස් නෙල්සන්, රෝහිණි විජේරත්න සහ හෙක්ටර් අප්පුහාමි යන විපක්ෂයේ ප්රමුඛ පාර්ලිමේන්තු මන්ත්රීවරුන් පිරිසක් අත්සන් තබා තිබේ.
