අසේල කුරුළුවංශ –
මහනුවර මහ නගර සභාවේ කර්මාන්ත දෙපාර්තමේන්තුවට අයත් ට්රැක්ටර් රථයක් මහනුවර මුල්ගම්පොල විහාරමාවත පැනරාමා අතුරු මාර්ගයේදී අඩි 30 ක පමණ බෑවුමකට පෙරළීමෙන් එහි රියදුරු මියගොස් තවත් දෙදෙනෙකු බරපතළ තුවාල ලබා මහනුවර ජාතික රෝහලට ඇතුළත් කර තිබේ.
අනතුර අද (03) පෙරවරු 9.45 ට පමණ සිදුව ඇත. මුල්ගම්පොල ප්රදේශයේ කාණුවක් ප්රතිසංස්කරණය කිරීම සඳහා භාණ්ඩ රැගෙන යාමේදී ට්රැක්ටරය බෑවුමට පෙරළී තිබෙන අතර අනතුරට හේතුව මෙතෙක් අනාවරණය වී නොමැත.
ඉහළ මාර්ගයේ සිට ට්රැක්ටරය බෑවුම ඔස්සේ පහළ මාර්ගයට වැටී තිබෙන බව පොලීසිය පවසයි.
හන්තාන උඩුවෙල ප්රදේශයේ පදිංචි නගර සභා සේවකයෙකු වන අසේල නිශාන්ත පෙරේරා (48) නැමති දෙදරු පියා අනතුරින් මියගොස් තිබෙන අතර ආර්. පී. සිවකුමාර් (46) සහ කේ. ජී විජේරත්න (48) යන දෙදෙනා තුවාල ලබා මහනුවර ජාතික රෝහලට ඇතුළත් කර තිබේ. ඔවුන් ට්රැක්ටරයේ ටේලරයේ ගමන් කර තිබෙන බව පොලීසිය පවසයි.
මහනුවර පොලිස් මූලස්ථානාධිපති ප්රධාන පොලිස් පරීක්ෂක රසික සම්පත් පතිරණගේ මෙහෙය වීම මත මහනුවර පොලිසීයේ රථ වාහන අංශය අනතුර සම්බන්ධයෙන් පරීක්ෂණ පවත්වයි.
