හිටපු ජනාධිපති මහින්ද රාජපක්ෂ පාලන සමයේ ශ්රී ලංකා සංචාරක ප්රවර්ධන කාර්යාංශයේ (SLTPB) සභාපතිවරයා ලෙස කටයුතු කළ භාෂ්වර ගුණරත්න, හිටපු අමාත්ය බැසිල් රාජපක්ෂට එරෙහිව රජයේ සාක්ෂිකරුවෙකු ලෙස පෙනී සිටීමට එකඟ වී ඇතැයි Sunday Times වාර්තා කර තිබේ. බැසිල් රාජපක්ෂගේ සමීපතමයෙකු ලෙස සැලකෙන ගුණරත්න, 2014 වසරේදී ශ්රී ලංකා සංචාරක ප්රවර්ධන කාර්යාංශයට අයත් රුපියල් මිලියන 7.8 ක මුදලක් අවභාවිත කිරීම සම්බන්ධයෙන් අත්අඩංගුවට පත්ව දැනට රක්ෂිත බන්ධනාගාරගත කර සිටියි.
මෙම නඩුව කොළඹ කොටුව මහේස්ත්රාත් පසන් අමරසේන ඉදිරියේ විභාගයට ගත් අවස්ථාවේදී, ගුණරත්න වෙනුවෙන් පෙනී සිටි ජනාධිපති නීතිඥ රියන්සි අර්සකුලරත්න අධිකරණයට දන්වා සිටියේ අපරාධ නඩු විධාන සංග්රහයේ 127 වැනි වගන්තිය යටතේ තම සේවාදායකයා මහේස්ත්රාත්වරයා වෙත ප්රකාශයක් ලබා දී ඇති බවයි. ඒ අනුව තම සේවාදායකයා මෙම නඩුවේ රජයේ සාක්ෂිකරුවෙකු ලෙස නම් කර ඇප මත මුදාහරින ලෙස ඔහු අධිකරණයෙන් ඉල්ලා සිටියේය.
මේ අතර අපරාධ පරීක්ෂණ දෙපාර්තමේන්තුව (CID) අධිකරණයට දැනුම් දුන්නේ මෙම නඩුවේ සැකකරුවෙකු ලෙස බැසිල් රාජපක්ෂ නම් කරන බවයි. දැනට විදේශගතව සිටින බැසිල් රාජපක්ෂ අත්අඩංගුවට ගැනීම සඳහා මහේස්ත්රාත් අමරසේන වරෙන්තුවක් ද නිකුත් කළේය.
මීට අමතරව, භාෂ්වර ගුණරත්න රුපියල් ලක්ෂයක ශරීර ඇපයක් සහ රුපියල් මිලියන 10 බැගින් වූ පුද්ගල ඇප දෙකක් මත මුදා හැරීමට මහේස්ත්රාත්වරයා නියෝග කළේය. මෙම නඩුවේ තුන්වැනි සැකකරු වන ශ්රී ලංකා සංචාරක ප්රවර්ධන කාර්යාංශයේ හිටපු කළමනාකාර අධ්යක්ෂ රූමි ජවුෆර් ජූනි 17 වැනිදා දක්වා යළි රක්ෂිත බන්ධනාගාරගත කිරීමටද නියෝග කෙරිණි.
බැසිල් රාජපක්ෂ වෙත ජාත්යන්තර සිතාසියක් (summons) නිකුත් කිරීමට අධිකරණයේ නියෝගයක් අවශ්ය වන්නේ නම්, ඒ සඳහා දිවුරුම් ප්රකාශයක් ඉදිරිපත් කරන ලෙස මහේස්ත්රාත්වරයා අපරාධ පරීක්ෂණ දෙපාර්තමේන්තුවට වැඩිදුරටත් නියෝග කළේය. ඌව පළාත් සභා මැතිවරණය සඳහා ටී-ෂර්ට් මුද්රණය කර ඒවා මැතිවරණ ප්රචාරක කටයුතු සඳහා යොදා ගැනීම සම්බන්ධයෙන් මෙම නඩුව පවරා ඇත.
