හිටපු ජනාධිපතිවරයා අමුතු ගැහිල්ලක් ගැන කී බවත් සමහරවිට සහරාන්ගේ ගැහිල්ලත් ඒ වගේ ගැහිල්ලක් විය හැකි බවත් කී රාජ්‍ය අමාත්‍ය රොෂාන් රණසිංහ නැවත ඒ අයට එවැනි ගැහිලි ගැසීමට ඉඩ නොතබන බව අද පාර්ලිමේන්තුවේ දී ප්‍රකාශ කළේය.
කැබිනට් එකඟතාවයක් සහිතව සම්මතවුණු කාබනික වගාව සම්බන්ධ රාජ්‍ය එකඟතාවය බිඳිමින් පිරිහී ගිය ශ්‍රී ලංකා නිදහස් පක්ෂයේ නායකයා පක්ෂ ප්‍රතිසංවධානය කළේ කාබනික වගාවට එරෙහිව ගොවීන් උසිගන්වමින් බව ඕනෑම තැනක කියන්නේ යැයි කී රොෂාන් රණසිංහ රාජ්‍ය ඇමතිවරයා තමන් කේලම් කාරයෙක් නොවන බවත් කියන දේ මූණටම කියන බවත් පැවසුවේ තමන් නැති අතරේ හිටපු ජනාධිපතිවරයා තම නම සඳහන් කරමින් රටට බොරු කී බව දක්වමිනි.
රාජ්‍ය ඇමතිවරයා මෙසේ ද කීවේය.
“ඊයේ දිනයේ හිටපු ජනාධිපතිතුමා මගෙ නම සඳහන් කළා. මම කේලම් කාරයෙක් කිව්වා. මහින්දානන්ද ඇමතිතුමා එහෙම ප්‍රකාශ කළේ මගෙ කීම් අහලා කියලා කිව්වා. මම ජීවතේට කේලම් කියන කෙනෙක් නෙමෙයි. එතුමලාට ඒ කේලම් කීමේ පුරුද්ද තියනවා.“
“අපි දන්නවා කාබනික වගාව සම්බන්ධයෙන් ජනාධිපතිතුමා කැබිනට් මණ්ඩලය දි තීරණය ගත්තේ. ඒ තීරණය ගත්තෙ නිමල් සිරිපාල ද සිල්වා මැතිතුමා, පරිසර ඇමතිවරයා විදිහට මහින්ද අමරවීම මැතිතුමා, කැබිනට් මණ්ඩලයේ නැති වුනත් ලසන්ත අලගියවන්න මැතිතුමා ඇතුළු සියලු දෙනාගෙම එකඟතාවය මත.“
“ ඒක සාමුහික තීන්දුවක්. හිටපු ජනාධිපතිතුමා ඒ තීන්දුව විවේචනය කළා පමණක් නොවෙයි. බොරුවක් කිව්වා මම කේලමක් කිව්වා කියලා. කේලමක් නෙමෙයි. කියන දේ කෙළින්ම කියනවා. එතුමා පක්ෂය ප්‍රතිසංවිධානය කළේ මේ වී ප්‍රශ්නය අල්ලගෙන. කාබනික වගාව අල්ලගෙන. ඒක තමයි ඇත්ත. අන්ත පල්ලෙහාට වැටිලා තිබුන නිසා එතුමගෙ දේශපාලන වෙනුවෙන් එතුමා ඒක කළා. ජනාධිපතිතුමා හොඳ තීන්දුවක් ගත්තා. අපි ඒ තීන්දුව වෙනුවෙන් පෙනී හිටියා. ගොවි ජනතාවත් සියට 50ක් කාබනික වගාවට එකතු වුණා. ඒ ගොවි මතයත් අවුස්සලා එතුමා යම් දේශපාලන වැඩපිළිවෙළක් කළා.“
එතුමා ඊයෙ කිව්වා අපි ගහන ගැහිලි වෙනමම ක්‍රමයක් කියලා. මම හිතන්නෙ සහරාන්ගෙ ගැහිල්ලත් ඒ විදිහෙ ගැහිල්ලක් වෙන්න ඇති. එහෙම ගැහිලි තවදුරටත් ගහන්න නැතිවෙන්න අපි කටයුතු කරන්න ඕන.
ඒ නිසා ශ්‍රී ලංකා නිදහස් පක්ෂය එක්ක අපට ගැටලුවක් නෑ. ඒ අය අපිත් එක්ක ඉන්නවා. එක්කෙනෙක් දෙන්නෙක් ගියා කියලා අපිට ප්‍රශ්නයක් නෑ කතා නායක තුමනි.
මේ අවස්ථාවේ දී රාජ්‍ය ඇමති ලසන්ත අලගියවන්න රොෂාන් රණසිංහට පිළිතුරු දෙන්නට නැගී සිටියේය.
“මේ පිළිබඳ සියලු පක්ෂවලින් අදහස් යෝජනා ඉදිරිපත් කළා. මේ ගැන නැවත කතා කළ යුතුද යන්න සියලු දෙනා සිතිය යුතුයි. ඊයෙ දයාසිරි ජයසේකර මැතිතුමාගෙ ප්‍රශ්නයට පිළිතුරු ලබා දීමේ දී සභානායක තුමා ගෙ අදහස වුනේ යම් කරුණක් ඉදිරිපත් කරනවා නම් අදාල මන්ත්‍රීවරයාත් දැනුම්වත් කරන්න. එතුමාට එතකොට සභාවෙ ඉන්න පුලුවන් කියලා. ඒ නිසා මං හිතන්නෙ ගරු මෛත්‍රීපාල මැතිතුමා දැනුම්වත් කරලා මේ ප්‍රශ්නය ඉදිරිපත් කළානම් එතුමාට පිළිතුරක් දෙන්න හැකිවේවි.
මේ පිලිබඳ සභානායක තුමා ඊයේ සිය මතය ඉදිරිපත් කළා.
මේ පිළිබඳව දිගින් දිගටම අදහස් ඉදිරිපත් කරනවා නම් අපටත් ශ්‍රී ලංකා නිදහස් පක්ෂය ලෙස දිගින් දිගටම කතා කරන්න සිද්ධ වෙනවා.
යළි රොෂාන් රණසිංහ රාජ්‍ය ඇමතිවරයා නැගී සිටියේය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
“ඔබතුමා එක්ක මම එකඟයි. එතුමා අවුරුදු 30ක් පාර්ලිමේන්තුවෙ ඉන්නවා. කොච්චර සදාචාර විරෝධීද මම නැති වෙලාවෙ මගෙ නම කියලා මං කේලම් කාරයෙක් කියපු එක..“