-
කුරුළු උයනේ කෝටි ගණන් වටිනා නීති විරෝධී යතුරුපැදි ඇති බව අවුරුදු 05ක් තිස්සේ නිලධාරීන් දැනගෙන ඉඳලා… මේ යතුරුපැදි විටින් විට කුරුළු උයන භූමියේ ධාවනය කර ඇති බවටත් වාර්තා…
හම්බන්තොට පිහිටි කුරුළු උයන නමින් හඳුන්වන ස්ථානයේ කන්ටේනර් සහ ගබඩාවල සඟවා තිබියදී සොයා ගත් රුපියල් කෝටි 25ක් පමණ වටිනා යතුරුපැදි 21 මෙරටට නීති විරෝධීව රැගෙන ඒමට ශ්රී ලංකා රේගුවේ දූෂිත නිලධාරීන්ගෙන් සහයක් ලැබුණේ දැයි සොයා මධ්යම විමර්ශන කාර්යාංශයෙන් පුළුල් විමර්ශනයක් ආරම්භ කර තිබේ.
මධ්යම විමර්ශන කාර්යාංශයට ලද තොරතුරකට අනුව එහි අධ්යක්ෂ, පොලිස් අධිකාරී කමල් ආරියවංශ ගේ මෙහෙයවීමෙන් කුරුළු උයන තුළ පෙරේදා (12) කළ වැටලීමකදී නීති විරෝධීව මෙරටට රැගෙන ආ මේ යතුරුපැදි 21 සොයාගෙන ඇත.
මධ්යම විමර්ශන කාර්යාංශය ස්ථාපිත කරන්නේ ඉකුත් පෙබරවාරි මාසයේදීය.මධ්යම විමර්ශන කාර්යාංශය ස්ථාපිත කිරීමෙන් පසු කළ විශාලම වැටලීම වන්නේ මෙයය.
මෙම කාර්යාංශයේ ප්රථම අධ්යක්ෂ ලෙස පත්කරන්නේ ජ්යෙෂ්ඨ පොලිස් අධිකාරී ශානි අබේසේකරය. අපරාධ පරීක්ෂණ දෙපාර්තමේන්තුවේ අධ්යක්ෂ ලෙස මෑතකදී ඔහු ස්ථාන මාරුවීමක් ලැබීමත් සමඟ කමල් ආරියවංශ එහි අධ්යක්ෂ ලෙස පත්කරනු ලැබීය. එම පත්කිරීමෙන් සති දෙකක් ඉක්ම යෑමට මත්තෙන් මේ වැටලීම ක්රියාත්මක කර තිබේ.
මෙහිදී සොයා ගත් යතුරුපැදි අතර අමෙරිකාවේ නිෂ්පාදිත හාර්ලි ඩේවිඩ්සන් වර්ගයේ 1000 සීසීට වැඩි යතුරුපැදි 08ක් ද, එම වර්ගයේම 1000 සීසීට වැඩි ට්රයිසිකල් 04ක් ද සොයාගෙන තිබේ. ඒ අතර බී.එම්.ඩබ්ලිව්. වර්ගයේ යතුරුපැදියක් ද වන බව මධ්යම විමර්ශන කාර්යාංශය සඳහන් කළේය. මේ යතුරුපැදි රුපියල් කෝටිය ඉක්මවන බවත්, ඇතැම් යතුරුපැදි රුපියල් කෝටි එකහමාරක් පමණ වටිනා බවත් පොලිස් මාධ්ය කොට්ඨාසය සඳහන් කළේය.
මීට අමතරව හොන්ඩා වර්ගයේ ස්කූටර් 03ක්, එම වර්ගයේම 90 සී.සී. යතුරු පැදි 05ක් ද චීනයේ නිෂ්පාදිත ට්රයිසිකල් 01ක් මෙහි තිබී සොයාගෙන ඇත.
හම්බන්තොට නාගරවැව ප්රදේශයේ අක්කර 34ක් පමණ වූ භූමි භාගයක් පුරාවට මේ කුරුළු උයන විහිදී තිබේ. යතුරුපැදි තොගය හමු වූයේ කුරුළු ආහාර ගබඩාවේ සහ කන්ටේනර් තුළ සඟවා තිබියදී බව මධ්යම විමර්ශන කාර්යාංශය සඳහන් කරයි.
මේ කුරුළු උද්යානයේ විදේශීය කුරුල්ලන් දහස් ගණනක් සිටින බවත්, එම කුරුල්ලන්ට කුරුළු ආහාර මෙරටට ගෙන්වන අවස්ථාවලදී කන්ටේනර් තුළ සඟවා මේ යතුරුපැදි රැගෙනවිත් ඇති බවත් විමර්ශනවලින් අනාවරණයවී තිබේ. කුරුළු ආහාර ගෙන එන විට කන්ටේනරයේ කෙළවරේම යතුරුපැදි සඟවා ඉදිරිපස කුරුළු ආහාර උර අසුරා විටෙන් විට මෙරටට රැගෙනවිත් ඇති බව ද විමර්ශනයේදී අනාවරණය වූ බව මධ්යම විමර්ශන කාර්යාංශයේ අධ්යක්ෂ පොලිස් අධිකාරී කමල් ආරියවංශ වැඩ බලන පොලිස්පතිවරයාව දැනුම්වත් කර ඇත.
මේ යතුරුපැදි මෙරටට ගෙනැවිත් ඇත්තේ පසුගිය වසර 05ක කාලයේදී බවත්, මේවා කුරුළු උයන පරිශ්රයේ විටින් විට ධාවනය කර ඇති බවට තොරතුරු ඇති බවත් මධ්යම විමර්ශන කාර්යාංශය සඳහන් කරයි. මේ පරිශ්රයේ මෙවැනි යතුරුපැදි ඇති බව පොලීසිය මෙන්ම වගකිවයුතු අංශවල බොහෝ අය දැන සිටියත් පසුගිය කාලය පුරාවට ඒ ගැන සොයා බැලීමට ඒ කිසිවෙක් ඉදිරිපත් වී නැති බව ද මධ්යම විමර්ශන කාර්යාංශයට පෙනී ගොස් තිබේ.
කුරුළු ආහාර ආනයනය කිරීමේදී මේ ආයතනයට අයත් කන්ටේනර් නිසි ලෙස පරීක්ෂා කළේ නම් මේ තරම් යතුරුපැදි මෙරටට ගෙන්වීමට හැකියාවක් නොලැබෙන බව ද මධ්යම විමර්ශන කාර්යාංශයේ මතයවී ඇත. ඒ අනුව ඒ සම්බන්ධයෙන් මේ වන විට කරුණු සොයමින් ඇති බව ද මධ්යම විමර්ශන කාර්යාංශය සඳහන් කරයි.
මේ කුරුළු උයනට කුරුල්ලන් ආනයනය කිරීම සම්බන්ධයෙන් ද ලැබී ඇති තොරතුරු කිහිපයක් කෙරෙහි ද විශේෂ අවධානයක් යොමු කරමින් විමර්ශන පැවැත්වෙන බව මධ්යම විමර්ශන කාර්යාංශය සඳහන් කළේය.
මේ සම්බන්ධව අත්අඩංගුවට ගත් මේ සැකකරුවන් දෙදෙනා හම්බන්තොට මහේස්ත්රාත් අධිකරණයට ඉදිරිපත් කිරීමෙන් අනතුරුව ලබන 27 වැනිදා දක්වා රක්ෂිත බන්ධනාගාරගත කර තිබේ. මේ කුරුළු උයනේ හිමිකරු ප්රධාන සැකකරු වන බැවින් ඔහු අත්අඩංගුවට ගැනීමට විමර්ශන පවත්වන බව පොලීසිය අධිකරණයට කරුණු දක්වමින් ඔහුට එරෙහිව විදෙස් ගමන් තහනමක් ද ලබාගෙන ඇත. ඔහුගේ බැංකු ගිණුම් සහ දුරකතන වාර්තා ලබා ගැනීමට අධිකරණ නියෝගයක් ගත් බව ද සඳහන් කළේය. (ගයාන් කුමාර වීරසිංහ – දිනමිණ)
