තරීෂා අබේවික්‍රම –
උද්ගත ව ඇති තත්ත්වයට විසඳුමක් ලෙස රජය තවත් රාජ්‍ය සේවකයින් සේවයට ගෙන්වීම සීමා කර තිබේ. 2022.05.25 දිනැති 10/2022 චක්‍රලේඛය සහ 2022.03.08 දිනැති “විදුලිය හා ඉන්ධන අරපිරිමැස්මෙන් භාවිත කිරීම” සම්බන්ධ අංක 04/2022 දරන රාජ්‍ය පරිපාලන චක්‍රලේඛයට අනුව මේ සීමා කිරිම් සිදුකර ඇත.
ඉන්ධන පෝළිම්වල, ගෑස් පෝළිම්වල මිනිස් පැය කා දමන්නට ශ්‍රී ලංකාවේ වෙසෙන බහුතරයකට අද සිදු ව තිබේ. එසේ කා දමන කාලය යළි කිසිදා මුදල් බවට පත් කර ගත නොහැකි ය. ඒ අතරේ මේ සිදුවන්නට යන්නේ රාජ්‍ය සේවය ද බිඳ වැටීමකි.
රාජ්‍ය සේවය තුළ සිටින හෘදය සාක්ෂියක් රහිත සේවකයින් අතලොස්සකගේ බොරුව සහ වංචාව හේතුවෙන් සමස්ථ සේවයම ගර්හාවට අවමානයට ලක් වී තිබේ. දාමයක එක් පුරුකක් බිඳුනු විට සමස්ථයම බිඳීයන්නා සේ එවැන්නන් අතලොස්සක් නිසා සමස්ථ රාජ්‍ය සේවයම අකාර්යක්ෂම බවට වූ චිත්‍රය සමාජයට ලැබී තිබේ. පොදුවේ රාජ්‍ය සේවය යනුම අනවශ්‍ය බරක් සේ සලකන ආකල්පයක් රටේ නිර්මාණය වී ඇත.
රාජ්‍ය සේවය සඳහා සේවකයින් අඩුවෙන් ගෙන්වා වියදම අඩු කරගැනීමට රජය උත්සාහ කරන්නේ ඒ රාජ්‍ය සේවයේය.
අද පවතින බොහෝ රජයේ කාර්යාල අඳුරෙන් බර ය. ඝණ අඳුරු තිර රෙදිවලින් වටකොට, ස්වභාවික ආලෝකය එන්නට නොදී, විදුලි බල්බ ඕනෑවටත් වඩා දල්වා විදුලි පංකා හෝ වායු සමීකරණ සහිතව මෙම කාර්යාල පවත්වාගෙන යයි.
එහෙව් තැන්වල රාජ්‍ය සේවයට පැමිණීම සීමා කිරීමෙන් රජය අපේක්ෂා කරන විදුලිය පිරිමැසීම සිදුවන්නේ නැත. මේ බොහෝ ගොඩනැගිලි අභ්‍යන්තරය සකසා ඇත්තේ එළියට විවෘත ජනේල රහිතවය. මහා දවාලෙත් විදුලි බුබුළු නොදල්වන්නේ නම් අන්ධකාරයේ ගලී යන ලෙසය.
එවැනි කාර්යාලයක එක් අයෙක් පැමිණිය ද සියලු දෙනා පැමිණියා සේ විදුලි පහන්, විදුලි පංකා, වායු සමීකරණ ක්‍රියාත්මක වන්නේය. මේ ක්‍රමයෙන් විදුලිය පිරිමැසීමක් එයින් සිදු නොවේ.
විදුලිය හා රාජ්‍ය වියදම් පිරිමසා ගැනීමට නම් කළයුතු වන්නේ සමස්ත රාජ්‍ය සේවය ම සතියකට දින එකක් හෝ දෙකක් මුළුමනින් ම වසා දැමීම ය. එදිනට අත්‍යවශ්‍ය ම සේවා හැර අනෙකුත් සේවාවන් මුළුමනින්ම නවතා දැමිය යුතු ය. අඩු ම තරමේ කාර්යාලයක දොරක්වත් විවෘත නොකළ යුතු ය. අතිකාල සේවා ද එම දිනවල නවතා දැමිය යුතු ය. එදිනට දුම්රිය ගමන් හා බස් ධාවනය ද සීමා කළ යුතු ය.
එපමණක් නොව සෑම රාජ්‍ය සේවකයෙක් ම නිලධාරීන් ඇතුළු ව නිවසේ සිටින දිනය හෝ දින දෙක ගෙවතු වගාවක නිරත වීම රාජ්‍ය සේවයේ ම කොටසක් ලෙස අනිවාර්ය කළ යුතුය. රජයේ කෘෂි නිලධාරීන් ඒවා දැඩි ව අධීක්ෂණය කළ යුතු ය.
සම බරව ඇත්ත කියන ලංකාසර පුවත් ඔබට සෑම විටෙක දැකීමට ඕනෑ නම් පහත අපේ වට්ස්ඇප් / ටෙලිග්‍රෑම් සමූහයන්ට එක්වෙන්න.
මේ අවස්ථාවේ කළයුතු නුවණක්කාර ම සහ දූරදර්ශී විසඳුම වන්නේ එයයි.