මනම්පිටිය නිමල් ජයරත්න –
වී කිලෝවක් සඳහා රජය මගින් සහතික මිලක් නියම කළ ද එම මිලටවත් වී ලබාදීමට පොළොන්නරුව දිස්ත්රික්කයේ වී අලෙවි මණ්ඩලයේ වී ගබඩා විවෘතකර නැති ඇති බවත්, රජයේ වී මිලදී ගැනීමේ වැඩපිළිවෙළ ආරම්භ කරන විට ගොවියාගේ වී අස්වනු පොළොන්නරුවේ මහා පරිමාණ වීමෝල් හිමිකරුවන් තුට්ටු දෙකට මිලදීගෙන අවසන් බවත් පොලොන්නරුවේ සහ මහවැලි ව්යාපාරයේ ගොවි සංවිධාන දැඩි කළකිරීමෙන් යුතුව හෙළිදරවු කරයි.
මේ වනවිට වී කිලෝවක් නිෂ්පාදනය කිරීම සඳහා වැයවන මුදල අනුව රජය මගින් වී කිලෝවකට නියම කරන ලද මුදල කිසිසේත්ම ප්රමාණවත් නොවන බවද මහවැලි ගොවීන් මේ සමගම පෙන්වා දෙයි.
මෙහිදී මාධ්යයට අදහස් දැක්වූ මහවැලි බී කලාපයේ ව්යාපාර කමිටුවේ හිටපු උපසභාපති ඩබ්ලිව්.ජී. තිලකරන්න පෙන්වා දුන්නේ මෙවර යල කන්නයේ ගොවීන්ගේ වී අස්වනු මිලදී ගැනීමට මුදල් වෙන් කර ඇති බවට මාධ්ය මගින් ප්රකාශ කළද මෙතෙක් මහවැලි බි හා සී කලාපවල වී මිලදී ගැනීමට වී අලෙවි මණ්ඩලය කිසිදු සූදානමක් නොමැති බවය.
පොළොන්නරුවේ මහා පරිමාණ වී මෝල් හිමිකරුවන් ගොවියාගේ වී තුට්ටු දෙකට මිලදී ගැනීමේ අවසන් වූ සැනින් රජය වී මිලදී ගැනීමට මුදල් වෙන් කිරීම විහිළු සහගත සහ ලැජ්ජා සහගත විය යුතු බවත්, වී ගොවියාට ලබාදෙන සහනයන් පිළිබඳ මෙවර කිසිදු ජනාධිපති අපේක්ෂකයකු තම ප්රතිපත්ති ප්රකාශයට ඇතුළත් නොකිරීම පිළිබඳව තුන් වේල බත් කන ජනාධිපති අපේක්ෂකයින් ලැජ්ජා සහගත විය යුතු බවත් ඔහු පැවසුවේය.
පොළොන්නරුව ඇතුළු මහවැලි බි කලාපයේ බොහෝ ගොවීන් තම කණ, කර ඇතුළු සේසතම බැංකුවලට උගස්කර වී වගාකර සාර ඵලදාවක් ලබා ගත්තත් උකසට තැබූ වත්කම් බේරා ගැනීමට නොහැකි වීම මොනතරම් ඛේදවාචකයක් දැයි ගොවි නියෝජිතවරු රජයෙන් ප්රශ්න කළහ.
අප මේ සම්බන්ධයෙන් වී අලෙවි මණ්ඩලයේ පොළොන්නරු දිස්ත්රික් කාර්යාලයෙන් දුරකථනයෙන් කළ විමසීමකදී එහි නිලධාරීයෙකු සඳහන් කළේ රජය මගින් වෙන් කළ මුදල් මෙතෙක් තමන්ට මුදල් ලැබි නැති බවය.
මුදල් ලැබුණු සැනින් වී මිලදි ගැනීමේ වැඩපිළිවෙළ ආරම්භ කරන බවය.
