කොළඹ ආර් ප්රේමදාස ක්රීඩාංගනයේ දිවා තරගයක් ලෙස පැවැත්වෙන දෙවැනි එක් දින තරගයේ ශ්රී ලංකා ඉනිම අවසානය. කාසියේ වාසිය දිනාගෙන පන්දුවට පහරදීමට තීන්දු කළ පසු ශ්රී ලංකා පිතිකරුවෝ ස්වකීය වගකීම ඉටු කර ඇත්තාහ.
ලකුණු 281ක් කඩුළු 04ක් දැවී ලබාගෙන තිබේ. ඒ ලකුණු 281ට කුසල් මෙන්ඩිස්ගේ මනරම් ශතකයක් අන්තර්ගතය. නිශාන් මධුෂ්ක ලබා ගත් ලකුණු 51ක්, චරිත් අසලංක ලබා ගත් වේගවත් ලකුණු 78ක් සහිත අර්ධ ශතක දෙකකින් ඉනිම ස්ථාවර වී ඇත. ජනිත් ලියනගේ පන්දු 21ක් තුල ලැබූ ලකුණු 32ක අවසන් පන්දු ඕවර කීපය තුළ ශ්රී ලංකා කණ්ඩායම විශ්වාසනීය ස්ථාවරයකට රැගෙන ගියේය.
ඔස්ට්රේලියානු කණ්ඩායමේ පන්දු යැවීම මෙන්ම පිටියේ පන්දු රැකීමට ද අර්බුදයක තිබුණු ආකාරය දුටුවෙමු. චරිත් අසලංකගේ ගිලිහී ගිය උඩ පන්දුවක් ලකුණු හයේ පහරක් බවට පත්වූයේය. පන්දුව වෙත දිව ඒමේ ප්රමාදයන් නිසා උඩපන්දු ගිලිහී ගියේය.
සමස්ථයක් ලෙස මුල් ඉනිමේ පූර්ණ ගෞරවය ශ්රී ලංකා කණ්ඩායමටය. කුසල් මෙන්ඩිස් පන්දු 115ක් තුළ ලබා ගත් ලකුණු 101 ඉනිම ස්ථාවර කරන්නේ පැතුම් නිශ්ශංක ලකුණු 06කට සහ කමිඳු මෙන්ඩිස් ලකුණු 04කට බිඳ වැටෙන අවකාශය තුළය. නිශාන් මධුෂ්ක සහ කුසල් මෙන්ඩිස් අතර දෙවැනි කඩුල්ල වෙනුවෙන් ලකුණු 98ක සම්බන්ධතාවයක් ගොඩනැගිනි. කමිඳු මෙන්ඩිස් ලකුණු 4කට දැවී යෑමත් සමග චරිත් අසලංක සහ කුසල් මෙන්ඩිස් අතර ලකුණු 94ක සම්බන්ධතාවයක් ඇති විය. කුසල් මෙන්ඩිස් දැවී යන්නේ 45 වැනි පන්දු ඕවරයේ පළමු පන්දුවේදී ය.
එතැන් සිට පන්දු 35ක් තුළ දී චරිත් අසලංක සහ ජනිත් ලියනගේ ඔස්ට්රේලියානු පන්දු යවන්නනට එල්ල කළ ප්රහාරය බිහිසුණු එකක් විය. ඔවුහු අවසන් පන්දු 35 තුළ ලකුණු 66ක් රැස් කළහ.
බෙන් ඩ්රොව්ෂයිස්, ආරොන් හාර්ඩි, ෂේන් ඇබොට් සහ ඇඩම් සම්පා කඩුල්ල බැගින් ලබා ගත්හ. කඩුල්ල පිතිකරණයට කදිමය. ඔස්ට්රේලියානු පිතිකරණ බලඇණිය ප්රබලය. මේ ඉලක්කය හඹා යෑම සම්බන්ධව ධනාත්මක ප්රවේශයක් ලබා ගැනීමට ඔවුන්ට අපහසුවක් නොවනු ඇත. සියල්ල පිටියේ පන්දු රැකීම සහ පන්දු යවන්නන්ගේ ඉලක්කය මත රැඳී තිබේ. තරගාවලි ජයග්රහණයක් සඳහා වඩාත් කිට්ටු ප්රවේශයක මේ වනවිට ශ්රී ලංකා කණ්ඩායම පසුවන බව කිව යුතුව ඇත.
