රටේ ජාතික අවශ්යතාවයක් සේ සලකා වැව් රක්ෂිතවල අනවසර ඉදිකිරීම් ඉවත් කර වැව් ආරක්ෂා කිරීමේ ව්යාපෘතියක් වැව් 23ක් කේන්ද්ර කරගනිමින් අද ආරම්භ වූයේය.
අද එම වැඩසටහන ආරම්භ වූයේ අනුරාධපුර නුවරවැව රක්ෂිතයෙනි.
මේ ව්යාපෘතිය ආරම්භ කළ නුවරවැව සම්බන්ධව විශේෂ අවධානය යොමු කරමින් පසුගිය දිස්ත්රික් සම්බන්ධීකරණ කමිටු රැස්වීමේ දී වාරිමාර්ග නියෝජ්ය ඇමතිවරයා නිලධාරීන්ට දැනුම් දුන්නේ නුවර වැව රක්ෂිතයේ අනවසර පදිංචිකරුවන් ගැන විමර්ශනයක් කර වාර්තාවක් ලබා දෙන ලෙසය.
ඒ අනුව නුවරවැව රක්ෂිතය තුළ ඉදිකර ඇති මහ ඇමති නිල නිවස, ආණ්ඩුකාර නිල නිවස, යුද්ධයෙන් ආබාධිත යුද හමුදා සාමාජිකයින් පුනරුත්ථාපනයට ඉදිකර ඇති අභිමංසල යක ගොඩනැගිලිද ඉවත් කිරීමට දිස්ත්රික් සම්බන්ධීකරණ කමිටුවේ දී තීරණය කර ඇතැයි වාර්තා විය.
මීට අමතරව කන්තලේ වැව, ගිරිතලේ වැව, පුත්තලම තබ්බෝව වැව, වාරියපොල දැදුරුඔය ජලාශය, මින්නේරිය වැව, හම්බන්තොට තිස්ස වැව, හම්බන්තොට රිදියගම වැව, මාපාකඩ දම්බරාවැව, බදුල්ල දෙමෝදර වැව, මඩකලපුව උන්නච්චයි වැව, මඩකලපුව නවකිරි වැව, මාතර කැකනදුර ඇල්ල, කන්ද වැව ඇතුළු වැව් 23 මුල් කරගෙන ද රක්ෂිත ලකුණු කර අනවසර ඉදිකිරීම් ඉවත් කිරීම සිදුකිරීමට නියමිතව ඇත.
මේ සම්බන්ධව ඊයේ අදහස් දක්වමින් කෘෂිකර්ම ඇමති ලාල් කාන්ත ප්රකාශ කළේ වැව් තාවුල්ලේ හොරෙන් හදාගත් ඉදිකිරීම් ඉවත් කිරීමේ දී කිසිම වන්දියක් ලබා නොදන බවත්, එම පදිංචිකරුවන් වන්දි ගෙවිය යුත්තේ රජයට බවත්, ඉවත් කරන්නට පෙර ඉවත්වී යන ලෙස එම අනවසර පදිංචිකරුවන්ට දැනුම් දෙන බවත්ය.
ඊයේ (18) ඇමතිවරයා මෙසේ ද කීවේය.
” වැවේ මායිම වැවට දිය යුතුමයි… ඒ වැඩේ අනුරාධපුරෙන් පටන් ගන්නවා. ප්ලීස්… රටටම මේ කියන්නෙ. හෙට පටන් ගන්නවා වැඩපිළිවෙළ. වැව් ඇතුළෙ ඉන්න අය ප්ලීස් වැව්වලින් එළියට යන්න. පන්නන කලින්. උද්ඝෝෂණ කොච්චර කළත් අපි අපේ ස්ථාවරයන්, ප්රතිපත්ති වෙනස් කරන්නේ නෑ. ඇති තරම් උද්ඝෝෂණ කරන්න පුලුවන්.”
